Meda Maqosa Tiko ga ena Cakacaka Vakaitalatala—Vunau ena Yalava ni Bisinisi

Vuna e Bibi Kina: Levu era dau cakacaka me vica vata na aua, ena veiganiti kina meda vunautaka na itukutuku vinaka ena nodra vanua ni cakacaka. E rawa ni marautaki qai vuavuaivinaka na cakacaka ena yalava ni bisinisi, ni na tiko o ira meda vosa vei ira ra qai dau veikauaitaki na tamata cakacaka vei ira na dauvolivoli. Ia me rawa ni vuavuaivinaka nona cakacaka na dautukutuku, ena vinakati vua me lewamatau qai rakorako na nona isulusulu kei na isasauni. (2 Kor. 6:3) Koya gona, me yadrava na ivakatawa ni cakacaka na levu ni gauna e tarai kina na yalava ni bisinisi, kei ira era dau cakacakataka.

Kena iWalewale:

Vakarautaka e dua nomu ivakamacala lekaleka. Ke da taura vakadede nona gauna e dua na tamata cakacaka, de dua ena sega ni vakatarai tale meda vosa vua.
Mo sikovi koya ena gauna e sega ni osooso kina, de dua ni se qai dola ga na sitoa.
Tovolea mo vosa e liu vua na iliuliu ni cakacaka. Mo vosa vakayalovinaka qai veikauaitaki. De dua o rawa ni tukuna: “Keimami sikovi ira tiko mai na tamata cakacaka, baleta ni dredre me keimami sotavi ira ena nodra dui vale.” Vakamacala sara vakalekaleka vua, qai solia na tikidua, mekesini se dua tale na ivola. Ena vinaka meda kua ni tukuna e dua na ka me baleta na cau, de ra qai nanuma nida dauvolivolitaki, vakavo sara ke ra taroga se vakailavotaki vakacava na noda cakacaka.
Ke rawarawa na veivosaki kei na iliuliu ni cakacaka, kerei koya mo vosa vakalekaleka ga vei ratou nona tamata cakacaka. Ena so na vanua ni bisinisi, ena vinaka meda kerea meda biuta tu eso na ivola ena rumu era dau kana se vakacegu kina.
Mo vakatulewa vinaka qai dau yalorawarawa. Kena ivakaraitaki, ke vosa tiko e dua na tamata cakacaka vua e dua na dauvolivoli se osooso, waraka na gauna e galala kina mo qai vosa vua.

Tovolea Qori ena Loma ni Vula Qo:

Ena nomudou Sokalou Vakavuvale, vakatovotovotaka e dua na ivakamacala o na via vakayagataka ke o cakacaka ena yalava ni bisinisi.