Vakayagataka Vinaka na iVolatabu
1. Na cava o na cakava ni o vakavakarau tiko ena cakacaka vakavunau?
1 Se mani ivola cava eda vakarautaka meda solia ena cakacaka vakavunau, e bibi meda digia e dua na tikinivolatabu e vakavure vakasama meda wilika vei ira na vakarorogo. (Iper. 4:12) Ena vakarawarawataka sara na soli ni ivola ke da wilika e dua na tikinivolatabu e tiko ena ivola. Era raica e so na dautukutuku ena so na vanua ni yaga nodra dau taura tu ga e ligadra na iVolatabu nira cakacaka vakavunau se nira vosa vua e dua.
2. (a) Eda rawa ni tekivuna vakacava noda vosa nida vakayagataka e dua na tikinivolatabu? (b) Na ulutaga vakaivolatabu cava era taleitaka na tiko ena nomu yalava?
2 Tekivu ena Dua na Tikinivolatabu: E so na dautukutuku era tekivuna nodra veivosaki ena nodra tarogi itaukeinivale ena dua na taro rawarawa e yavutaki ena tikinivolatabu era na vakarau wilika. Na iwalewale oqo e vakamua na veivosaki ina Vosa ni Kalou. Ena yaga beka ena nomu yalava e so na ikau ni vosa oqo?
◼ “Ke tu vei iko na kaukaua mo vakayacora vaka kina, o na vakayacora beka na veisau oqo?” Wilika na Vakatakila 21:4.
◼ “Na cava eda bula tu kina ena gauna dredre oqo?” Wilika na 2 Timoci 3:1-5.
◼ “Cava nomuni nanuma, ena vinaka beka na noda itikotiko kevaka meda muria kece na ivakasala oqo?” Wilika na Maciu 7:12.
◼ “Cava nomuni nanuma, ena rawa beka ni marautaka na luvemu na ituvaki e vakamacalataki tiko e ke?” Wilika na Same 37:10, 11.
◼ “Cava nomuni nanuma, ena yaco dina beka ena dua na siga na vosa oqo?” Wilika na Aisea 33:24.
◼ “Oni kila beka se matanitu cava e tukuni tiko e ke?” Wilika na Taniela 2:44.
◼ “Oni dau via taroga beka na Kalou ena taro oqo?” Wilika na Jope 21:7.
◼ “E rawa beka nida raici ira tale na wekada lomani era sa mate?” Wilika na Joni 5:28, 29.
◼ “Era kila beka na mate na ka eda cakava na tamata eda bula tiko?” Wilika na Dauvunau 9:5.
3. Eda na vukei ira vakacava na itaukeinivale me matata vei ira na tikinivolatabu eda wilika?
3 Vakamacala, Vosa Vakatautauvata, Vakaibalebaletaka: Ke sa vakarorogo o itaukeinivale, kua ni vakatotolotaka na nomudrau veivosaki. Tovolea mo vakamacala vua, tukuna e dua na kena ivakatautauvata, qai tukuna na ibalebale ni tikinivolatabu o wilika me matata vua. (Niem. 8:8) Nira taura rawa na itaukeinivale ra qai ciqoma na ka e vakatavulica na Vosa ni Kalou, e rawa nira na vakila na veisau ena nodra bula.—1 Ces. 2:13.
4. Eda na vakayagataka vinaka vakacava na iVolatabu nida veisikovi lesu?
4 Meda tomana tiko ga na noda vakayagataka vinaka na iVolatabu ena noda saga mera tataleitaki. O rawa tale ga ni muria na iwalewale vata oqo ni o veisikovi lesu: (1) Digia e dua na tikinivolatabu veiganiti. (2) Bulia e dua na taro rawarawa me baleta na tikinivolatabu oqori. Wilika sara. (3) Vakamacala, vosa vakatautauvata, qai vakaibalebaletaka. Ena veigauna kece o lesuvi koya, saga mo vakalevutaka na nona kila na Vosa ni Kalou. De dua o sa na tekivutaka sara kina na vuli iVolatabu!