Wase 3—Na Ka me Caka Mera Toso Kina Noda Vuli iVolatabu
Me Laulau Noda Vakayagataka na iVolatabu
1. Na cava meda vakabibitaka kina na iVolatabu nida caka vuli iVolatabu?
1 Na inaki ni noda caka vuli iVolatabu oya meda ‘veivakatisaipelitaki’ mera kila na tamata na ivakavuvuli ena Vosa ni Kalou, ra ciqoma, ra qai bulataka sara. (Maciu 28:19, 20, VV; 1 Ces. 2:13) E bibi kina me yavutaki ga ena iVolatabu na vuli. Ni se qai tekivu na vuli, ena vinaka meda vukei ira na gonevuli mera kunea na tikinivolatabu ena nodra iVolatabu. Eda na vakayagataka vakacava na iVolatabu meda vukei ira kina noda vuli iVolatabu mera tubu vakayalo?
2. Eda na digia vakacava na tikinivolatabu me wiliki qai veivosakitaki?
2 Digia na Tikinivolatabu me Wiliki: Ni o vakavakarau, veidutaitaka na tikinivolatabu e tabaki kei na tikina e veivosakitaki tiko ena parakaravu, qai digia na tikinivolatabu me wiliki qai veivosakitaki ena gauna ni vuli. E vinaka ga me wiliki na kena e yavutaki kina na noda vakabauta. Me kua ni wiliki na tikinivolatabu e ikuri ga ni ivakamacala. Vakasamataka na kena ituvaki o gonevuli kei na ka e gadreva.
3. Na cava na yaga ni taro? Eda na cakava vakacava?
3 Mo Taro: Mo kua ni vakamacalataka na tikinivolatabu, kerei gonevuli me vakamacalataka mai vei iko. Rawa ni o uqeti koya me vakamacala ni o tarogi koya ena so na taro vakavure vakasama. Ke sa matata na ibalebale ni tikinivolatabu, taroga ga se tokona vakacava na tikinivolatabu na ka e tukuni tiko ena parakaravu. Ena so na gauna ena gadrevi e dua na taro se vica vata na taro me kila kina o gonevuli na ka e veivosakitaki tiko. Ke gadrevi me vakamacalataki tale e so na tikina, cakava ni sa sauma oti o gonevuli na taro.
4. Me vakacava na levu ni noda ivakamacala ena tikinivolatabu e wiliki?
4 Me Rawarawa Nomu Vakamacala: Na dauvana ena vakayagataka ga e dua na dakaititi me vana kina na nona takete. E vaka kina na qasenivuli maqosa, ena sega ni vakayatuyatu ni vakamacalataka na tikina bibi. E rawa ni rawarawa ga, matata, qai dodonu na ka e tukuna. Ena so na gauna ena gadrevi mo vakekeli ena ivola ni isoqosoqo mo kila vinaka kina na ibalebale ni tikinivolatabu mo qai vakamacalataka vakadodonu. (2 Tim. 2:15) Kua ni saga mo vakamacalataka kece na tikinivolatabu ena gauna ni vuli. Tukuna na kena e salavata kei na tikina e veivosakitaki tiko ena parakaravu.
5, 6. Eda na vukei ira vakacava na gonevuli mera bulataka na Vosa ni Kalou, ia na cava meda kua ni cakava?
5 Me Yaga Vua: Ena gauna e gadrevi kina, vakaraitaka vei gonevuli na sala e yaga kina vua na tikinivolatabu. Kena ivakaraitaki, ni veivosakitaki tiko na Iperiu 10:24, 25 kei gonevuli e se bera ni lakova na soqoni, rawa ni o vakamacalataka vua e dua na soqoni, qai sureti koya kina. Kua ni vakasaurarataki koya. Laiva na Vosa ni Kalou me uqeti koya me cakava na ka e rawa ni vakamarautaki Jiova kina.—Iper. 4:12.
6 Nida muria na ivakaro ni veivakatisaipelitaki, meda vukei ira mada ga mera “vakabauta ka talairawarawa” ena laulau ni noda vakayagataka na iVolatabu.—Roma 16:26.