Cakacaka Lavotaki ni Kena Veisoliyaki na Brochure Vou
1 E levu nikua era leqataka tu na ituvaki kei vuravura, ia e lewe lailai sara era kila na vuna eda sotava tiko kina na ituvaki oqo, na ka e se bera ni yaco, kei na ka mera cakava mera na rawata kina na bula ena siga ni lewa sa roro tiko mai. (Isik. 9:4) Meda vukei ira mera kila na bibi ni gauna eda sa bula tu kina oqo, e tuvanaki gona e dua na cakacaka lavotaki ena Moniti, 18 Okotova ina Sigatabu, 14 Noveba, me veisoliyaki kina na brochure vou Yadra Tiko!
2 E rawa nida solia na brochure ena cakacaka vakavunau e veivale, veisikovi lesu, vunau tawalokuci, se vunau ena vanua ni bisinisi. Ia, me kakua ni veisoliyaki vakaveitalia na brochure Yadra Tiko! Me soli ga vei ira era kauaitaka na ka e tukuna na iVolatabu me baleta na ka e yaco tiko e vuravura nikua. Ia me soli na ivolacebaceba vei ira na sega so ni kauai ena noda itukutuku.
3 Rawa ni o dreta na nona vakasama e dua ke o kaya:
◼ “E vuqa era kauaitaka na leqa lelevu e yaco tu nikua. [Tukuna e dua na kena ivakaraitaki e yaco ena nomu yalava.] Oni kila beka ni ka oqori e sa tukuni oti tu ena iVolatabu? [Waraka me sauma. Wilika sara e dua na tikinivolatabu me vaka na Maciu 24:3, 7, 8; Luke 21:7, 10, 11; se 2 Timoci 3:1-5, e ganita na ivakaraitaki o tukuna.] E tukuni ena iVolatabu na ibalebale ni gauna eda bula tu kina oqo, kei na ka ena qai yaco vei ira na kawatamata. Oni via kila tale beka e so na ka? [Waraka me sauma. Solia na brochure ke kauai dina o itaukeinivale.] E sega ni saumi na brochure oqo. Ke oni via solia e dua na cau me tokona na neimami cakacaka e vuravura raraba, au na ciqoma ena marau.”
4 Rawa tale ga ni yaga na kena icakacaka oqo:
◼ “E levu nikua era leqataka na levu ni ka ca e sa yaco tu se na leqa era dui sotava. Era taroga e so se cava e sega ni cakava kina e dua na ka na Kalou. E vakadeitaka vei keda na iVolatabu ni sa voleka ni vakaotia na Kalou na leqa e sotava tu na kawatamata. Ni rogoca mada na ka vinaka ena cakava na Kalou vua na kawatamata. [Wilika na Same 37:10, 11.] Oni via kila tale beka e so na ka?” Tinia me vaka e vakaturi e cake.
5 Vola na yacadra kei na nodra itikotiko o ira kece na taura na brochure, qai sikovi ira me vakabulabulataki na tataleitaki. Na iwalewale mera vakabulabulataki kina na tataleitaki ena tabaki tiko ena Noda Cakacaka Vakaitalatala ni vula o Noveba 2004. Ke tataleitaki o itaukeinivale ena imatai ni gauna o vosa kina vua, e rawa ni tekivu sara ga e kea na vuli iVolatabu ena kena vakayagataki na brochure Yadra Tiko!, se dua tale na ivola me vaka na Loma ni Kalou.
6 O rawa ni taura na brochure oqo ni oti na Soqoni ni Cakacaka e vakamacalataki kina na ulutaga oqo. Mera taura ga na dautukutuku kei ira na painia na levu ni brochure era rawa ni veisoliyaka ena imatai ni vica na siga ni cakacaka lavotaki oqo. Me vakalougatataka mada ga o Jiova na cakacaka lavotaki oqo me vakacerecerei kina o koya, me yaga tale ga vei ira na lomadina ena veivanua kece ga.—Same 90:17.