iVakavakayagataki ni Brochure iTukutuku Vinaka Mai Vua na Kalou!

Vakarautaki na Brochure Vou me Vukei Keda ena Veisikovi Lesu kei na Tauyavu ni Vuli iVolatabu

1. Na brochure vou cava a sevutaki ena Soqo ni Tikina ‘Qarauna Vinaka na Lomamu!’ e vakarautaki me vukei keda ena veisikovi lesu kei na tauyavu ni vuli iVolatabu?

¹ Eda marautaka dina na noda taura ena Soqo ni Tikina ‘Qarauna Vinaka na Lomamu!’ na brochure vou me vukei keda ena veisikovi lesu kei na tauyavu ni vuli iVolatabu. Na brochure iTukutuku Vinaka Mai Vua na Kalou! ena sosomitaka na Loma ni Kalou qai tautauvata na brochure ruarua qori nira leleka ga na lesoni. Qori ena vukei keda me laulau noda vakayagataka na brochure meda tauyavutaka kina na vuli iVolatabu ena matanikatuba. A vakamacalataki ena brochure Loma ni Kalou na ivakatagedegede vaKarisito ena rairai dredre mera ciqoma o ira era se qai tekivu vuli iVolatabu. Ia na brochure vou e vakatabakidua sara ga ena itukutuku vinaka ena iVolatabu.​—⁠Caka. 15:⁠35.

2. Na cava e tabaki kina na brochure iTukutuku Vinaka Mai Vua na Kalou?

² Na cava e tabaki kina? Era kerea na mataveitacini ena veiyasa i vuravura me dua na ivukevuke ena rawarawa kina mera taleitaka na ka dina na lewenivanua qai vakamua na veivosaki ina ivola e vakayagataki vakalevu duadua ena noda caka vuli iVolatabu, na Kaya na iVolatabu. Eso era na rairai makutu na vulica na iVolatabu ni vakayagataki na brochure, mai na nodra vulica e dua na ivola. E rawarawa tale ga na kena vakadewataki e dua na brochure ina vica vata na vosa.

3. E duidui vakacava na brochure vou mai na ivola tale eso ni vuli?

³ Kena Vakarautaki: E vakarautaki e levu na noda ivola ni vuli me rawa ni wilika ga e dua sa kila sara na ka dina, ke sega mada ga ni vukei kina. E duidui na ivola qo ni vakarautaki me ivukevuke ni vuli iVolatabu e veivakavulici kina e dua. Ni o solia gona vua e dua na brochure, e vinaka mo drau veivosakitaka e dua se rua na parakaravu. E leleka na parakaravu me rawa ni veivosakitaki e matanikatuba se vanua ni cakacaka. Ena rairai vinaka me tekivu na vuli ena lesoni 1, ia eda rawa ni lewa na lesoni me tekivu kina.

4. E yaga vakacava na brochure meda veivakavulici sara ga kina mai na iVolatabu?

⁴ Ena levu noda ivola, e dau tiko ga ena parakaravu na isau ni taro. Ia ena brochure vou, ena laurai ga vakalevu ena iVolatabu na isaunitaro. E levu era sega ni via vuli ena noda ivola, ia mera vuli sara ga ena iVolatabu. Oya na vuna e levu kina na tikinivolatabu e sega ni lavetaki. Mera wiliki sara ga qori mai na iVolatabu. Ena kila kina o gonevuli ni vu mai vua na Kalou na veika e vulica tiko.​—⁠Aisea 54:⁠13.

5. Na cava e bibi kina me vakavakarau vinaka o qasenivuli ena gauna kece ni vuli?

⁵ E sega ni vakamacalataki ena brochure na tikinivolatabu kece. Na vuna? E vakarautaki me uqeti gonevuli me dau taro, me rawa ni maqosataka tale ga o qasenivuli nona veivakavulici. E bibi kina meda vakavakarau vinaka ena gauna kece ni vuli. Dua na ka me qarauni: Kua ni vosa tu ga. Eda dau taleitaka meda vakamacalataka na iVolatabu, ia ena vuavuaivinaka sara na vuli ke da kerei gonevuli me tukuna na nona nanuma ena tikinivolatabu. Nida maqosataka noda taro, eda rawa ni vukei koya me vakasamataka na ibalebale ni tikinivolatabu yadua.​—⁠Caka. 17:⁠2.

6. Eda rawa vakacava ni vakayagataka na brochure (a) nida sotavi ira era sega ni vakabauta na Kalou kei na iVolatabu? (b) ena vunau e veivale? (c) me tauyavutaki kina na vuli iVolatabu ni muri na vakatutu ni veisureti vakadodonu? (d) nida veisikovi lesu?

⁶ Ni vakatauvatani kei na ivola tale eso ni vuli iVolatabu, na brochure vou e rawa ni soli ena gauna kece ga, se mani ivola cava e tuvanaki me soli ena dua na vula. Era na marautaka e levu mera vakayagataka na brochure nira muria na vakatutu ni veisureti vakadodonu me tauyavutaki kina na vuli iVolatabu e matanikatuba. Me vaka e vakamacalataki ena soqo ni tikina, na nomu vakayagataka na brochure ni o lesuvi ira na tataleitaki “ena vakavuna mo taleitaka sara ga na veisikovi lesu!”​—⁠Raica na kato ena tabana e 7-9.

7. O rawa ni veivakavulici vakacava ena iVolatabu ni vakayagataki na brochure?

⁷ iWalewale ni Vuli: E rawa ni tekivu na veivosaki ena kena wiliki na taro e nabataki tu qai volai ena matanivola kata. Oti wilika sara na parakaravu kei na tikinivolatabu e vakalai. Vakayagataka vakamaqosa na taro mo vukei taukeinivale kina me kila na ibalebale ni tikinivolatabu. Ni bera ni o toso ina taro tarava, kerei taukeinivale me sauma rawa na taro ena matanivola kata ena iwasewase drau sa veivosakitaka oti mo vakadeitaka kina ni sa taura rawa na ka e vulici. Ena imatai ni vica na vuli, ena rairai vinaka me veivosakitaki ga e dua na taro ena matanivola kata. Ni toso na gauna, e rawa ni qai dede na veivosaki ni vulici e dua na lesoni taucoko.

8. Meda vakamacalataka vakacava na tikinivolatabu, na vuna?

⁸ Na tikinivolatabu e volai e yasana na “wilika” e vakalevu ga me sauma sara ga vakadodonu na taro ena matanivola kata. Ni o vakamacalataka e dua na tikinivolatabu, kua ni tukuna, “E vola na yapositolo o Paula” se “Raica mada na ka e parofisaitaka o Jeremaia.” Ena rairai nanuma kina o taukeinivale nida wilika tiko na ka era tukuna ga na tamata. E vinaka cake meda kaya, “E tukuna na Vosa ni Kalou” se “Raica mada na ka e parofisaitaka na iVolatabu.”

9. Vakacava me wiliki kece ena gauna ni vuli na tikinivolatabu e sega ni lavetaki?

⁹ Vakacava e dodonu meda wilika kece na tikinivolatabu e sega ni lavetaki se na kena ga e volai toka kina “wilika”? Qori ena vakatau ena ituvaki. E tiko na vuna era biu kina na tikinivolatabu e sega ni lavetaki. Na tikinivolatabu kece qori e tiko kina na itukutuku e yaga me veivosakitaki. Ia ena so na gauna ke osooso o gonevuli, sega soti ni kauai se sega ni vinaka nona wiliwili, ena rairai vinaka meda wilika ga na tikinivolatabu e volai toka kina “wilika.”

10. Gauna cava sa rawa ni dewa kina na vuli ena ivola Kaya na iVolatabu?

¹⁰ Gauna me Dewa Kina ena Kaya na iVolatabu: Ni toso tiko na veivosaki qai wasoma na vuli iVolatabu, e rawa ni dewa sara na vuli ena ivola Kaya na iVolatabu se vakayagataki tiko ga na brochure iTukutuku Vinaka Mai Vua na Kalou me yacova sara ni sa oti. Meda qai vakalewa vinaka toka ga na dautukutuku na gauna me veisau kina na ivola. Ke da nanuma me sa dewa ina Kaya na iVolatabu, vakacava e dodonu meda tekivu sara ga mai na imatai ni wase? E sega ni dua na kena lawa qori, era duidui tale ga na gonevuli. Ia ena yaga vei ira e levu na gonevuli ke ra dikeva vakamatailalai ena ivola Kaya na iVolatabu na usutu vata ga era se qai dikeva mai.

11. Na cava meda vakayagataka vinaka kina na brochure vou?

¹¹ E tu tu yadua meda rogoca na itukutuku vinaka ena vuravura qo, e noda itavi dokai gona meda kacivaka na itukutuku vinaka duadua me bau rogoci​—sa veiliutaki tiko na Matanitu ni Kalou, sa vakarau vakavouya tale ga na vuravura mera bula kina na yalododonu! (Maciu 24:14; 2 Pita 3:13) Eda nuidei ni levu era rogoca na itukutuku qori era na duavata kei na vosa uqeti vakalou qo: “Na kena lagilagi e na ulu-ni-vanua na yava i koya sa kauta mai nai rogorogo vinaka, sa vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai, ka sa tukuna mai ki Saioni, ‘Sa lewa na nomu Kalou!’” (Aisea 52:7) Meda vakayagataka mada ga na brochure vou meda wasea kina na itukutuku mai vua na Kalou vei ira na karamaca tu vakayalo ena noda yalava!

[Kato ena tabana 7]

Nida Sotavi Ira Era Sega ni Vakabauta na Kalou kei na iVolatabu:

● Era raica na dautukutuku ena so na vanua nira dau sega ni via vakarorogo na taukeinivale nira rogoca na vosa “Kalou” kei na “iVolatabu.” Ena ituvaki va qori, ena rairai vinaka me veivosakitaki ena imatai ni veisiko na ulutaga era kauai kina na tiko ena yalava me vaka na kena vinakati e dua na matanitu vinaka, na vanua e rawa ni laurai kina na ivakasala e yaga ena vuvale, kei na veika ena yaco ena veigauna se bera mai. De dua e rawa ni vakayagataki na brochure iTukutuku Vinaka Mai Vua na Kalou nida sa veivosaki vakavica kei koya, me rawa ni kilai na vuna eda vakabauta kina ni bula tiko na Kalou qai rawa ni nuitaki na iVolatabu.

[Kato ena tabana 8]

Nida Vunau e Veivale:

● “Au via vakaraitaka ga na sala rawarawa mo kila kina na inaki ni Kalou me baleti keda na kawatamata ena veigauna se bera mai. O bau lomatarotarotaka tu se na vakaotia dina na Kalou na veika rarawa eda sotava? [Waraka me sauma.] E tiko ena ivola qo na tikinivolatabu e rawa ni sauma na taro qori. [Solia vua e dua na brochure, wilika na imatai ni parakaravu ena lesoni 1 kei na Jeremaia 29:11.] Vakacava o raica rawa ni vinakata sara ga na Kalou me vinaka cake noda bula ena veigauna se bera mai? [Waraka me sauma.] Ke o taleitaka, e rawa ni nomu na ivola qo. Ena noqu veisiko tarava, daru rawa ni veivosakitaka na ikarua ni parakaravu me daru raica kina na isau vakaivolatabu ni taro qo, ‘Ena vakaotia vakacava na Kalou na veika e vakavuna tiko na rarawa ni kawatamata? ‘” Ke o raica ni galala o taukeinivale ena imatai ni veisiko, drau rawa ni wilika qai veivosakitaka na ikarua ni parakaravu kei na tolu na tikinivolatabu. Lokuca na siga mo lesu kina mo drau lai veivosakitaka na ikarua ni taro ena lesoni ya.

● “E levu era dau masu, vakabibi nira sotava na leqa. Vakacava o dau masu ena so na gauna? [Waraka me sauma.] Na cava mada oni nanuma, e dau rogoca na masu kece na Kalou se tiko eso na masu e sega ni vakadonuya? [Waraka me sauma.] E tiko vei au qo e dua na ivola e vakamacalataka na sala o na kila kina na isau vakaivolatabu ni taro qori. [Solia vua e dua na brochure, drau veivosakitaka na imatai ni parakaravu ena lesoni 12 kei na tikinivolatabu e volai toka kina “wilika.”] Dua na ka totoka ni tu vakarau na Kalou me rogoci keda, se vakacava? Ia me qai yaga sara vei keda na masu, e bibi meda kila vinaka na Kalou. [Raica na lesoni 2 qai vakaraitaka na ulutaga lalai.] Ke o taleitaka, e rawa ni nomu na ivola qo, daru qai rawa ni veivosakitaka ena dua tale na gauna na isau vakaivolatabu ni taro vakavure vakasama qo.”

● “Au veivosakitaka tiko mai nikua na nodra kauai e levu ena vanua sa mua tiko kina na vuravura qo. O nanuma ni na rawa ni vinaka na ituvaki kei vuravura? [Waraka me sauma.] Era kurabuitaka e levu na nodra kila ni tu ena iVolatabu na itukutuku vinaka e rawa ni solia vei keda na inuinui. Qo eso na taro e sauma na iVolatabu.” Solia vei taukeinivale na brochure, kerea me digitaka mai na waqana e muri na taro e taleitaka. Raica sara na lesoni e salavata kei na taro qori, qai vakaraitaka na iwalewale ni vuli. Lokuca na siga mo lesu kina mo drau lai veivosakitaka na taro tarava ena lesoni ya.

[iYaloyalo ena tabana 9]

Tovolea mo Veisureti Vakadodonu:

● “Au via vakaraitaka vakalekaleka ga e dua na sala e rawa ni vulici kina na iVolatabu. E tiko ena ivola qo e 15 na lesoni ena vakaraitaka na vanua o rawa ni raica kina ena nomu iVolatabu na isau ni taro bibi. [Vakaraitaka vua na waqana e liu kei na waqana e muri.] O sa bau saga mo kila na iVolatabu? [Waraka me sauma.] E rawarawa sara na lesoni era toka ena ivola qo, meu vakaraitaka mada vei iko. [Drau veivosakitaka na imatai ni parakaravu ena ikatolu ni taro ena lesoni 3, qai wilika na Vakatakila 21:​4, 5. Ke veiganiti, drau veivosakitaka na parakaravu tarava kei na veitikinivolatabu e vakatakilakilataki “wilika.”] Ke o taleitaka, e rawa ni nomu na ivola qo. Au uqeti kemuni moni vulica mada ga vakadua na iVolatabu. Ke o taleitaka, e rawa ni toso tiko ga na vuli. Niu lesu mai, daru rawa ni veivosakitaka na imatai ni lesoni. E dua wale ga na tabana.”

[iYaloyalo ena tabana 9]

Vakayagataka ena Veisikovi Lesu:

● Ni o lesuva e dua a tataleitaki ena veisiko e liu, eda rawa ni tukuna: “Au marau sara ga ni daru sota tale nikua. Au kauta tiko mai e dua na nomu ivola, e vakamacalataki kina na isau vakaivolatabu ni levu na taro vakavure vakasama. [Solia vua na brochure, qai kerea me raica na waqana e muri.] Vei ira na ulutaga qo, e vei o taleitaka? [Waraka me sauma. Raica na lesoni e digia.] Meu vakaraitaka mada na sala e rawa ni vakayagataki kina na ivola qo ena kena kilai na isau vakaivolatabu ni taro qori.” Vakaraitaka na icakacaka ni vuli ena nomudrau veivosakitaka e dua se rua na parakaravu kei na tikinivolatabu era vakatakilakilataki “wilika.” O sa tauyavutaka sara ga e keri e dua na vuli iVolatabu! Biuta toka vei taukeinivale na brochure, qai lokuca na siga mo lesuvi koya kina. Ni drau vakaotia na lesoni, drau rawa ni veivosakitaka e dua tale na lesoni e digitaka o taukeinivale se tekivu mai na kena imatai.