Era na Rogoca Vakacava?

1. Na cava ena rairai dredre kina na cakacaka vakavunau? Na cava meda vunau tiko ga kina?

¹ Ni sa toso totolo sara mai na siga i Jiova, sa qai vinakati ga vakalevu meda vukei ira e levu tale mera vulica na veika me baleti Jiova kei na nona inaki me baleti keda. (Joni 17:3; 2 Pita 3:​9, 10) De dua ena dredre toka ena so na gauna, ni levu era na rairai sega ni kauai se ra vakasewasewani keda me baleta na noda cakacaka vakavunau. (2 Pita 3:​3, 4) Ia e tiko na vuna vinaka meda vakabauta kina nira se tiko ga eso ena yalava era na ciqoma na itukutuku vinaka ena gauna era rogoca kina. Era na rogoca vakacava ke sega ni dua e vunautaka vei ira?​​—⁠Roma 10:​14, 15.

2. Ena vakayaloqaqataki keda vakacava na nona ivakaraitaki na yapositolo o Paula?

² Nida Tusaqati: Meda kua ni yalolailai, e levu era na via rogoca na itukutuku ni Matanitu ni Kalou. O Filipai na imatai ni siti e Urope era rogoci Paula na yapositolo ni vunautaka na itukutuku vinaka. Erau beitaki vakailasu kei Sailasa, erau kuitataki ena kau rau qai bala i valeniveivesu. (Caka. 16:​16-​24) Ia na veika mosimosi e sotava o Paula e sega ni vakarerei koya me datuvu kina na vunau. Ni sikovi Cesalonaika ena nona ilakolako vakadaukaulotu tarava, a ‘doudou ena veivakaukauataki ni Kalou.’ (1 Ces. 2:⁠2) E sega beka ni uqeti keda na ivakaraitaki i Paula meda ‘kua ni soro’?​​—⁠Kala. 6:⁠9.

3. Na cava e veisau kina na nodra ivakarau ni rai eso era a sega ni tataleitaki e liu?

³ E levu era sega ni dau via rogoci keda ena veigauna sa sivi, sa veisau na ivakarau ni nodra rai me baleta na itukutuku eda kacivaka. De dua e vu qo ena tatara ni leqa ni bula vakailavo, tauvimate, mate e dua na lewe ni nodra vuvale, se na itukutuku vakadomobula ni veika era yaco tu e veiyasa i vuravura. (1 Kor. 7:​31) Eso era dauveitusaqati na nodra itubutubu era sa uabula ena gauna qo ra qai via rogoca na itukutuku vinaka. Nida vunau tiko ga, e rawa kina vei ira qori mera “masuta na yaca i Jiova” ni se vo na gauna.​​—⁠Roma 10:⁠13.

4. Na cava e uqeti keda meda kua ni “cegu” kina ena vunau?

⁴ “Sega ni Cegu”: Na noda lomana na Kalou kei ira na kainoda eda na “sega ni cegu” kina na vunau kei na veivakatisaipelitaki me vaka era a cakava na yapositolo ena imatai ni senitiuri. (Caka. 5:​42) E levu “era sa vutugu ka qoqolou e na vuku ni ka vakasisila kecega” era caka tu nikua. (Isik. 9:⁠4) Koya gona na nodra rogoca na itukutuku vinaka e vakacegui ira ra qai nuidei! Ke levu mada ga era sega ni via rogoci keda, eda nuidei ni tukuna na iVolatabu ni o Jiova e taleitaka na noda caka vinaka.​​—⁠Iper. 13:​15, 16.