Kua ni Wele!

¹ E kila o Jisu ni yalani ga na gauna me vakayacora kina e vuravura na ka e talai koya mai kina o Tamana. (Joni 9:⁠4) Oya na vuna e sega ni weletaka na cakacaka vakavunau, e vakavulici iratou tale ga kina na nona tisaipeli. (Luke 4:​42-​44; 8:1; 10:​2-4) E ikarua ni ka vua na iyau vakayago. (Maciu 8:​20) Sa rauta me mai vakayacora vinaka o Jisu na cakacaka a lesia vua o Jiova.​​—⁠Joni 17:⁠4.

² Sa Lekaleka na Gauna: E lekaleka ga na gauna me vunautaki kina e “vuravura taucoko” na itukutuku vinaka. (Maciu 24:​14, VV) E vakaraitaka na parofisai ena iVolatabu nida sa bula tu oqo ena gauna ni ivakataotioti. Sa voleka “me ra vakarusai” o ira “era bese ni kila na Kalou kei ira era sega ni vakabauta nai Tukutuku Vinaka ni noda Turaga ko Jisu.” (2 Ces. 1:​6-9, VV) Ena yaco mai vakidacala na veivakarusai oqori. (Luke 21:​34, 35; 1 Ces. 5:​2, 3) E dodonu mera na yadra na tamata mera kila na ituvaki leqataki era sa tu kina. E noda itavi gona meda vukei ira mera vakasaqara na veivuke i Jiova ni se vo na gauna.​​—⁠Sefa. 2:​2, 3.

³ Cakava na Kena Levu O Rawata: Eda vakaliuca na dauveiqaravi ni Kalou na cakacaka vakavunau nida kila ni “sa vakalekalekataki na gauna sa vo.” (1 Kor. 7:​29-​31; Maciu 6:​33) So era biuta na qarailavo se na nodra saga ga na veika e baleti ira mera vakalevutaka kina nodra cakacaka vakavunau. (Mari. 10:​29, 30) E so tale era ‘vakaogai ira tiko ga ena cakacaka ni Turaga’ dina ga nira sotava tiko na veivakatovolei. (1 Kor. 15:​58, VV) E levu tale era sega ni soro ni vunautaka tiko ena yalodina na itukutuku vinaka ena dua na gauna balavu. (Iper. 10:23) E vakamareqeta dina o Jiova na kena tokoni vaka oqori na veika e vauca na Matanitu ni Kalou.​​—⁠Iper. 6:​10.

⁴ Nida vakaliuca na qaravi Jiova ena noda bula, okati kina na cakacaka vakavunau, ena vukei keda meda waraka tiko kina na siga i Jiova. E taqomaki keda mai na vuravura i Setani, qai vakaukauataka noda inakinaki meda savasava tiko ga. (2 Pita 3:​11-​14) Nida sega ni cegu, da sega tale ga ni weletaka na cakacaka vakavunau, eda na rawa ni vakabulai kina kei ira na rogoci keda.​​—⁠1 Tim. 4:​16.