Sa na Vakabibitaki na iVolatabu!

1. A vakarautaki taumada Na Vale ni Vakatawa me baleti cei? Vakacava na Golden Age?

¹ A tabaki ena 1 Okotova, 1919, na imatai ni itabataba ni ivoladraudrau na Golden Age. E yaga sara vakalevu na ivoladraudrau oqo ena cakacaka vakavunau. Ena vuku ni cava? Baleta ni vakarautaki sara ga me baleti ira na lewenivanua raraba. E duatani na Vale ni Vakatawa, ni dua na gauna balavu e vakarautaki tiko kina na ivoladraudrau oqo me baleta vakatabakidua na “qele-ni-sipi lailai.” (Luke 12:32) Era maqusa na dautukutuku ni Matanitu ni Kalou ena nodra veisoliyaka na Golden Age, tini yaco me levu cake sara na kena iwiliwili e veisoliyaki ni vakatauvatani kei na Vale ni Vakatawa.

2. Na cava e sa yaca ni Golden Age nikua, na cava a kena inaki mai na gauna e tekivu tabaki kina?

² E tabaki na Golden Age (Gauna Uasivi) me vakaraitaka ni na qai wali ga na leqa ni kawatamata ni sa veiliutaki o Karisito me dua na udolu na yabaki. Oya ga na gauna uasivi dina e dau diva tu na kawatamata. Toso na gauna, a vakayacori e so na veisau ena Golden Age me rawa ni veiganiti kei na toso ni gauna. E veisau na yaca ni ivoladraudrau oqo ena 1937 me Consolation. Ena 1946, sa qai veisau me Awake!, na yaca e sa kilai kina nikua.

3. E yaga sara vakalevu na Awake! ena vakayacori ni parofisai cava?

³ Mai na kena itekitekivu ena 1919 sa yaga sara vakalevu na ivoladraudrau oqo ena vunautaki ni itukutuku vinaka me ivakadinadina ina veivanua kece ga. (Maciu 24:14) Ia, ena vuku ni cakacaka levu se vo kei na lekaleka ni gauna, e dikevi kina ni ka vakavuku me sa veisau tale e so na ka e vauca na Awake!

4. (a) Ke dua e vinakata me vunitaki “ena siga ni cudru i Jiova,” na cava me cakava? (b) Me vaka e volai ena Vakatakila 14:​6, 7, na cava e kacivaka na ‘agilosi e vuka voli ena maliwa i lomalagi kei vuravura’ meda cakava kece?

⁴ Vicasagavulu na milioni era dau taleitaka na Awake! baleta ni levu sara na ulutaga raraba e dau kovuti kina, e dau vakarautaki tale ga vakavinaka me veivakauqeti. Sega ni vakabekataki ni levu ga vei ira na dau tiko ena iVakananumi e veiyabaki era dau wili Awake! Ia, ke vinakata e dua me vunitaki “ena siga ni cudru i Jiova,” ena sega ni rauta me wilika wale tiko ga na noda ivola, e dodonu me vukei ena veika tale e so e bibi me vakayacora.​​—⁠Sefa. 2:3; Vkta. 14:​6, 7.

5. (a) Tekivu ena Awake! ni Janueri 2006, na cava e sa na vakabibitaki? (b) Na cava era na via cakava e levu ni uqeti na lomadra, e salavata oqo kei na parofisai cava?

⁵ O koya gona, mai na Janueri 2006, sa na vakamacalataki vakalevu sara ena Awake! na veika e vauca na Matanitu ni Kalou. Sa na uqeti ira sara ga na dauwiliwili mera raica na iwali ni nodra leqa ena iVolatabu, sa na vakamacalataka tale ga vakalevu na rai ni iVolatabu me baleta na veika e sa yaco tu ena gauna oqo. De dua era na kila vinaka kina na dauwiliwili na ibalebale ni veika sa yaco tu nikua, qai uqeti ira mera vakarabailevutaka na nodra kilai Jiova.​​—⁠Saka. 8:​23.

6, 7. (a) Ena saga vakacava na Awake! me vukei ira e levu mera muria na ka e tukuni ena 1 Cesalonaika 2:​13? (b) Sa na tekivu tabaki vakavica na Awake!, e vica ena vakilai vei ira na veisau oqo?

⁶ Ena tabaki tiko ga ena Awake! na veiulutaga e dau taleitaki raraba. Ia, e sa na vakabibitaka sara vakalevu na iVolatabu. (1 Ces. 2:​13) Me vaka ni dau kovuti ena Vale ni Vakatawa na veiulutaga titobu vakaivolatabu, sa na veisau tale ga na Awake! me vakamacala vakalevu ena veiulutaga vakaivolatabu, e kena irairai ni sa na sega ni gadrevi me taba vakarua e veivula na Awake! O koya gona, sa na dua ga na kena itabataba e veivula me tekivu ena Janueri 2006. Oqo e sa na vakamamadataka sara na itavi e vauci ena kena vakarautaki, vakadewataki, kei na kena veikauyaki.

⁷ Rauta ni 40 na pasede na vosa era dau vakadewataka na Awake! era na vakila na veisau oqo. Na vo ni vosa era sa dau tabaka tiko mai e dua ga na itabataba ni Awake! e veivula, se veivulatolu. E sega ni veisau na Vale ni Vakatawa.

8. Eda na vakayagataka vakacava na Awake! kei na Vale ni Vakatawa ena cakacaka vakavunau?

⁸ E rawa nida solia ena cakacaka vakavunau na Awake! ni dua na vula kei na dua ga vei rau na Vale ni Vakatawa ni vula oya. O koya gona, ena loma ni dua taucoko na vula, sa na sega ni veiveisau vakalevu na veika eda vakamacalataka me baleta na Awake! ni vakatauvatani kei na veigauna sa oti, nida sa na solia tiko e dua ga na itabataba.

9. Sala cava ena yaga tiko ga kina na Awake!?

⁹ Me tekivu sara mai na imatai ni kena itabataba ena 1919, e sa yaga vakalevu sara ena cakacaka vakavunau na ivoladraudrau a yacana na Golden Age, oti e veisau me Consolation, nikua e sa vakatokai me Awake! E neitou masu ni na vakalougatataka tiko ga o Jiova na veisoliyaki ni ivoladraudrau oqo ena kena veisau vou, ni na vukei ira tale e levu “mai na veivanua kece, kei na veimataqali, kei na veimatanitu, kei na duivosavosa” mera vakanuinui vakatabakidua ga ina Matanitu ni Kalou.​​—⁠Vkta. 7:⁠9.