Vua e Dau Wilika na iVoladraudrau Oqo

ME TEKIVU ena ilavelave oqo, sa na veisau vakalailai e so na ka e dau tabaki ena Yadra! (Awake!) Dina ni so na ka ena duidui, ia e levu na ka e sega ni veisau.

Ena vakamuria tiko ga na Yadra! na inaki ni kena tabaki sa muria tiko mai ena vicasagavulu na yabaki. E tukuni ena tabana e 4 ni “tabaki na ivoladraudrau oqo me yaga vei ira kece na lewenivuvale.” E dikeva na veika e yaco tu e vuravura, e vakaraitaka na duidui itovo vakavanua, e vakamacalataka na totoka ni veika e bulia na Kalou, e tara na tiko bulabula, e vakamacalataka na veika vakasaenisi vei ira na sega ni vulica, qai tomana tiko ga na Yadra! na noda vakavulici na dau wilika meda kila na ibalebale ni veika e yaco tiko e vuravura.

E yalataka na Awake! ena kena ilavelave ni 22 Okosita, 1946: “Ena saga na ivoladraudrau oqo me dau tukuna na veika dina.” Me vaka na ka e yalataka, e dau saga na Yadra! me tabaka ga na itukutuku e dina. Oya na vuna e dau vakadikevi vinaka sara kina na veika e tabaki qai vakadeitaki vinaka mera dodonu. Ia na ivoladraudrau oqo e “dau tukuna na veika dina” ena dua na sala e bibi cake.

Na Yadra! e dau veidusimaki ina iVolatabu. Ia me tekivu ena ilavelave oqo, sa na levu cake na ulutaga e yavutaki vakaivolatabu sa na dau tabaka na Yadra! (Joni 17:17) Ena tomana tiko ga na Yadra! na nona tabaka na veiulutaga era vakaraitaka na yaga ni ivakasala mai na iVolatabu ina noda bula ena gauna oqo. Me kena ivakaraitaki, e levu sara na ivakasala vakaivolatabu e dau tabaki ena ruku ni ulutaga “Ra Taroga na iTabagone . . . ” kei “Na Rai ni iVolatabu,” ena tomani tiko na kena tabaki na ulutaga e rua oqori. Kuria, ena tomana tiko ga na Yadra! nona vakamuai ira na dau wiliwili ina nona yalataka na iVolatabu e dua na vuravura vou ena vakarau sosomitaka na vuravura oqo e dau beca na lawa.​—Vakatakila 21:3, 4.

Na cava tale ena duidui? Me tekivu ena ilavelave oqo, sa na dau tabaki na Yadra! ena veivula ena levu vei ira na 82 na vosa era tabaki tiko kina (e liu a dau tabaki vakamacawa rua ena levu na vosa).a Na “Watching the World,” (Digovi Vuravura) e se tekivu tabaki sara mai na 1946, ena tabaki tiko ga, ia sa na vakalailaitaki mai na rua na drauniveva ina dua ga. Ena tekivutaki ena tabana e 31 e dua na tutuna vou qai taleitaki e vakatokai me “How Would You Answer?” (O na Sauma Vakacava?) Na cava ena tabaki kina, o na rawa ni vakayagataka vakacava?

Dikeva mada na tabana e 31 ena ilavelave vata oqo ena vosa vakavalagi. E so na tikina ena tabana oqo ena taleitaki sara vei ira na gone; so na tikina ena vakatovolei kina na vinaka ni nodra nanuma na ka era wilika o ira na gonevuli ni iVolatabu era sa matua. Na tikina “When in History?” (Yaco ena Gauna Cava?) ena vukei iko mo kila na gauna e bula kina e dua e cavuti ena iVolatabu kei na gauna era yaco kina e so na veika lelevu. Dina ena kunei na isaunitaro era tarogi toka ena lomanibai “From This Issue” (Ena iLavelave Oqo) ena loma ni ivoladraudrau, ia na isau ni veitaro tale e so ena tabaki toka ena duatani na tabana ena matanivola e vakatoboicu na kena volai. Vakacava mo saga taumada mo sauma na veitaro oqori ni bera ni o wilika na kena isau o qai wasea vei ira e so tale na ka o vulica? O rawa sara mada ga ni vakayagataka na tutuna vou, “How Would You Answer?” (O na Sauma Vakacava?) mo dou veitalanoataka vakavuvale se vakailawalawa.

A yalataka na Awake! ena rauta na 60 na yabaki sa oti: “Ena dau vakamacalataka na ivoladraudrau oqo na veika e tara raraba na vuravura. Era na taleitaka na tamata lomadina ena veivanua kece ga. . . . Na veika ena tabaki ena ivoladraudrau oqo . . . ena yaga, e ka ni vuli ra qai taleitaki vakalevu vei ira na qase kei na gone.” Era vakadinadinataka na dau wilika na ivoladraudrau oqo ni dina ina nona vosa ni yalayala na Awake! E via vakadeitaki yani ni na tomani tiko ga na veika e yalataki oya.

Koya e Tabaka

[iVakamacala e ra]

[iYaloyalo ena tabana e 3]

A Vakatokai me “The Golden Age” ena 1919, veisau me “Consolation” ena 1937, qai veisau me “Awake!” (Yadra!) ena 1946

[iYaloyalo ena tabana e 4]

Na “Yadra!” e dusimaki ira na dauwiliwili ina iVolatabu

[Credit Line]

Dakai: U.S. National Archives photo; gone waloloi: WHO photo by W. Cutting