Kato Ni Taro

◼ Me ripotetaki beka ena ivavakoso na vuli iVolatabu vakavuvale?

Kevaka e vuli iVolatabu kei iratou nona vuvale e dua na itubutubu ra qai okati tale ga kina na luvena era se bera ni papitaiso, ena ripotetaka ena loma ni macawa oya e dua na aua, dua na veisikovi lesu, ena wili oya me dua na vuli iVolatabu ena vula oya. Oqori na ka ena ripotetaka kevaka mada ga e sivia na dua na aua nona veivakavulici, e cakava vakarua ena dua na macawa se mani vakavulici iratou yadudua na gone.​​—⁠Raica na ivola Cokonaki, t. 104.

Kevaka era sa papitaiso kece na lewenivuvale, ena sega ni ripotetaki (vakavo ga ke se bera ni vakaotia o gone na ikarua ni ivola ni oti nona papitaiso). Na vuna oya ni ripote ni cakacaka vakavunau e soli ena ivavakoso e baleta vakatabakidua na kena tukuni na itukutuku vinaka kei na nodra vakavulici ena ka dina vakaivolatabu o ira na se bera ni yalayala se ra papitaiso mera dauveiqaravi i Jiova. (Maciu 24:14; 28:​19, 20) Ia, e sega ni kena ibalebale kina oqori ni sa sega ni bibi me caka wasoma na vuli vakavuvale.

E nodra itavi na itubutubu lotu Vakarisito mera vakavulici ira na luvedra. O ira na vinakata mera vukei era rawa ni kerei ira na qase ni ivavakoso ena sala mera tauyavutaka kina se vakavinakataka nodra vuli vakavuvale. Kevaka e vakavulica na gone e se bera ni papitaiso e duatani tale ena ivavakoso dina ga ni rau tiko ena dina na nona itubutubu, me na vakaraitaki mada vua na ivakatawa daulewa se na ivakatawa ni cakacaka. Ke sa vakadonui ena ripotetaki koya me nona vuli iVolatabu.

Eda kila ni levu cake na gauna kei na sasaga e vauci ena nodra vakavulici na gone ena sala i Jiova mai na kena e dau ripotetaki. (Vkru. 6:​6-9; Vkai. 22:⁠6) E veiganiti dina mera vakacaucautaki na itubutubu lotu Vakarisito ena nodra colata tiko na nodra itavi levu ni tuberi ira na luvedra ena “vunau kei nai vakavuvuli ni Turaga.”​​—⁠Efeso 6:⁠4.