Na Dinau Meda Sauma Vei Ira na Tani
1 E raica na yapositolo o Paula me nona itavi me vunau vei ira na tamata. E kila o koya ni nakita o Jiova mera vakabulai na tamata kece ga ena dra talei i Luvena. (1 Tim. 2:3-6) Oya na vuna e kaya kina o Paula: “Sa tu e dua na noqu i tavi [“dinau,” NW] ki vei ira na tamata kece ga, vei ira sa rarama kei ira na butobuto, vei ira na vuli kei ira tale ga na lecaika.” E oga sara vakalevu ena nona sauma na nona dinau vei ira ena gauna oya ena nona vunautaka vei ira na itukutuku vinaka.—Roma 1:14, 15, VV.
2 Me vakataki Paula, era saga tale ga na lotu Vakarisito nikua mera wasea na itukutuku vinaka ena veigauna kece ga vei ira era vakaitikotiko vata. Ni sa roro mai na “veivakararawataki levu,” e vinakati meda vakasaqarai ira vakatotolo na tamata lomadina. Me uqeti keda mada ga meda gugumatua ena cakacaka ni veivakabulai oqo na noda lomani ira dina na tamata.—Maciu 24:21, NW; Isik. 33:8.
3 Saumi ni Noda Dinau: E sala uasivi ni noda tarai ira na tamata na noda vunau e veivale. Ena yalava e dau levu kina na vale e lala, ena vinaka meda dau vola vinaka toka na veivale e lala me rawa kina nida qai sikovi ira ena duatani na gauna. (1 Kor. 10:33) E rawa tale ga nida tarai ira vakalevu na tamata ena noda vunau ena yalava ni bisinisi, ena salatu, vanua ni gade kei na ikelekele ni motoka, kei na noda vosa vei ira ena talevoni. Meda dui tarogi keda, ‘Au sa saga tiko beka ena noqu igu taucoko meu qara na sala kece au rawa ni vunautaka kina na itukutuku ni veivakabulai oqo?’—Maciu 10:11.
4 A raica e dua na painia me nona itavi me vosa vei ira kece na tiko ena nona yalava. E dua na vale, e dau sogo tu na kena katubaleka qai lala tu ga. Ia, ena dua na siga e sega ni cakacaka vakavunau tiko kina na painia oqo, e raica sara ni kele tu e dua na motoka ena vale dau lala oya. E sega tale ni wawa, sa lai tukituki sara e katuba. E dolava mai na katuba e dua na tagane. Na nodrau veitalanoa oya e dewa sara ina vica na veisikovi lesu erau dau salavata kina kei watina. E qai vakadonuya na tagane oya me vuli iVolatabu. Ena gauna oqo sa tacida papitaiso o koya. E marautaka na tagane oya nona raica na tacida yalewa oqo na nona vunau me vaka e nona dinau.
5 Ni sa roro mai na ivakataotioti, sa kena gauna oqo meda sauma kina na noda dinau vei ira na wekada ena noda gumatua ena cakacaka vakavunau.—2 Kor. 6:1, 2.