Ni Lala na Vale
1. Na cava eda sotava vakalevu nida cakacaka vakavunau e veivale?
1 Sa qai dredre ga ena levu na vanua nikua meda kunei ira na tamata ena nodra vale. Ena “iotioti ni veisiga” oqo e levu era ogaoga ena nodra qarava na veika mera bula kina e veisiga. (2 Tim. 3:1, NW) So era sega ni tu e vale nira lai volivoli se ra gole tu ena dua na ka ni veivakamarautaki. Ia, e rawa vakacava nida tarai ira na vaka oqori?
2. Eda na vakadeitaka vakacava nira na lesuvi kece na vale era lala?
2 Me Matata na Kedra iTukutuku: Na imatai ni ka meda cakava meda vola ga na vale era lala. E bibi me caka oqo ena yalava e tarai wasoma. Eda dau vola beka na yaca ni gaunisala, na naba ni yalava, na yacada, kei na tikinisiga? Na vanua eda vakavola kina na veika oqori meda biuta toka e dua na vanua e lala meda qai vola kina e so na ka ena gauna eda sa lesuva tale kina, se o koya ena soli vua me lai raica na vale oqori. Ni sa oti na cakacaka vakavunau ena dua na siga, meda solia na ivolatukutuku ni vale e lala vua e qarava tiko na yalava, ena qai lewa o koya meda lesuva se me na soli tale vua e dua. Ia, me duatani ga na tikiniveva meda vola kina na yacadra na tataleitaki eda na lesuvi ira.
3. Na cava e so na vakatutu e rawa nida cakava meda tarai ira kina na sega ni dau tu e vale?
3 Lesu ena Dua Tale na Gauna: O ira na sega ni dau tu e vale ena gauna ni cakacaka, sa rawa nira tiko e vale ena yakavi se na muanimacawa. E rawa beka nida veisautaka noda ituvatuva meda lesuvi ira ena gauna oqori? (1 Kor. 10:24) Kevaka e sega ni rawa, meda solia vua e dua na dautukutuku e rawa ni lesuvi ira ena dua tale na gauna. Ke sega, meda volavola vei ira, se qiriti ira. De rawa nira vukei keda ena ka oqo o ira na dautukutuku era tautauvimate era sega ni dau vakaitavi vakalevu ena cakacaka vakavunau.
4. Na itukutuku cava e vakaraitaka ni bibi meda dau lesuva na vale era lala?
4 Oqo e dua na ivakaraitaki e laurai kina na bibi ni noda lesuva tiko ga na vale e lala. Rauta ni tolu na yabaki na nodra lesuva tiko na dautukutuku e dua na vale lala sa ra qai tarai itaukeinivale rawa. E qai kilai ni o koya na marama itaukeinivale oya e waraki ira tiko na iVakadinadina ena gauna kece oqori me tosoya na vuli iVolatabu a dau cakava tu ni bera ni toki yani ina vanua oya.
5. Gauna cava e sa na tukuni kina ni sa tarai vinaka na yalava?
5 Tara Vinaka na Yalava: Gauna cava e sa na tukuni kina ni sa tarai vinaka na yalava? Na gauna e laurai kina ni sa tarai kece na vale. Ena vinaka me biu toka e dua na ivolacebaceba se dua na ivoladraudrau makawa ena vale e lala, me biu toka vakavinaka, ia me caka ena yalava e sega ni dau tarai wasoma. Ena loma ni va na vula me sa tarai oti kina e dua na mape. Ni sa oti, me qai soli na mape vua e qarava tiko na yalava me volaitukutukutaka.
6. Na cava meda saga kina meda vunautaka na itukutuku vinaka vei ira kece na tiko ena yalava?
6 E vinakati e levu na tamata mera vulica mera masuta na yaca i Jiova, me rawa nira vakabulai. (Roma 10:13, 14) Oqo e okati kina o ira na sega ni tu e vale ena gauna eda dau lako yani kina ena cakacaka vakavunau. Meda vakataki koya mada ga na yapositolo o Paula, oya me noda gagadre meda “vunautaka [“vakavinaka sara,” NW] na i Tukutuku Vinaka ni loloma soli wale ni Kalou.”—Caka. 20:24, VV.