Vukei Luvemu me Toso ena Cakacaka Vakavunau

¹ E nodra itavi na itubutubu lotu Vakarisito mera vakavulici luvedra era se gone mera cakacaka vakavunau. E tiko e vica na sala eda rawata kina oqori. So na gone era rawa ni wiligusutaka e dua na tikinivolatabu nira se bera ni kila na wilivola. Oqori e dau tarai ira sara ga na rogoci ira. Nira tubu tiko, e rawa ni tosoi cake vakalailai na ka mera dau kaya. E rawa vakacava vei kemuni na itubutubu mo ni vukei luvemuni mera vakaitavi tale ga ena vunau? De rawa ni veivuke e so na vakatutu oqo.

² Ni oti na vakabula, e rawa mo kaya:

◼ “E via wilika o luvequ o [yacana] e dua na tikinivolatabu e vinakata mo ni rogoca.” Rawa ni kaya o luvemu: “Na tikinivolatabu oqo ena Same a vakaraitaka vei au na yaca ni Kalou. [Wilika se wiligusutaka o luvemu na Same 83:18.] Rau na vakaraitaka na ivoladraudrau oqo na veika ena cakava vei keda na Kalou o Jiova. E rawa beka meu solia vei kemuni?” Qai tinia ena nomu vakamacalataka na kena vakailavotaki na noda cakacaka e veiyasa i vuravura.

³ Se o rawa ni tovolea na vakatutu oqo:

◼ “Ni bula. Au vakavulici luvequ yalewa tiko o [yacana] me dau kauaitaki ira na tiko ena itikotiko oqo. E via wasea vei kemuni e dua na itukutuku lekaleka mai na iVolatabu.” E rawa ni kaya: “Dua na sala au dau vukei ira kina na tamata oya na noqu vakaraitaka vei ira na inuinui e tukuna na iVolatabu me baleta na gauna e se bera mai. [Wilika se wiligusutaka o gone na Vakatakila 21:⁠4.] Rau na vakamacalataka na ivoladraudrau oqo na veika ena cakava vei keda na Matanitu ni Kalou. Au kila ni oni na taleitaka mo ni wilika.”

⁴  Nira vakayagataka tiko na iwalewale rawarawa era na matau cake sara na gone ena nodra vunautaka na itukutuku ni Matanitu ni Kalou. Ni caka na vakatovotovo me vukei ira mera dau vosa vakamatata ra qai vosa e cake, oqo ena vukei ira me maqosa nodra vosa nira sotava na duidui ituvaki. Ena vukei ira na gonelalai mera vakamacalataka na nodra vakabauta ke ra vakavakarau vinaka ra qai vakacaucautaki tale ga.

⁵ Nira uqeti vaka oqori, era na rawa ni dautukutuku bera ni papitaiso e levu na gone. E marautaki dina nida raici ira na luveda ni toso tiko na ivakatagedegede ni nodra cakacaka vakavunau.​​—⁠Same 148:​12, 13.