Wase 12—Na Ka me Caka Mera Toso Kina
Noda Vuli iVolatabu
Vukei Ira na Vuli iVolatabu Mera Veivakavulici Tale Ga
1 Nira sa tekivu vunau e veivale noda vuli iVolatabu, era na rairai leqataka na nodra sa na vakavulica tale e dua ena iVolatabu. Eda na uqeti ira vakacava me tiko vei ira na rai dodonu ena tiki bibi ni cakacaka vakavunau oqo?—Maciu 24:14; 28:19, 20, VV.
2 Ni sa vakadonui e dua na vuli iVolatabu me dautukutuku bera ni papitaiso, sa rairai vakaitavi tiko ena Koronivuli ni Vuli Vunau. Na nona vulica na vakavakarau, kei na nona vakayacora na itavi e dau lesi vua, ena bucina kina na ivakarau ni veivakavulici vinaka e gadrevi vua e dua e ‘daucakacaka, e sega na ka me madua kina, qai wasea vakadodonu na ivakavuvuli dina.’—2 Tim. 2:15.
3 Me iVakaraitaki na Nomu Veivakavulici: A vakavulici ira na nona tisaipeli o Jisu ena matata ni nona ivakamacala kei na nona ivakaraitaki vinaka. E kaya: “Ko koya yadua sa vakaotia vakavinaka na nona vuli sa na qai tautauvata kei na nona qasenivuli.” (Luke 6:40, VV) E bibi gona meda vakadamurimuri Jisu ena noda ivakaraitaki vinaka ena cakacaka vakavunau. Ni raica o gonevuli na noda ivakaraitaki ena cakacaka vakavunau, ena kila ni inaki ni veisikovi lesu oya me tekivutaki kina e dua na vuli iVolatabu.
4 Vakamacalataka vei ira noda vuli iVolatabu ni noda sureta e dua me vulica na iVolatabu e sega ni gadrevi meda tukuna sara vakamatailalai na veika ena caka ena vuli. E vinaka meda vakaraitaka ga vei ira na icakacaka ni vuli ena noda vakayagataka e dua se rua na parakaravu ena ivola ni vuli. E so na vakatutu yaga e rawa nida muria e tiko ena tabana 8 ni ilavelave oqo, kei na Noda Cakacaka Vakaitalatala, Janueri 2002, tabana 6.
5 Ke veiganiti, sureti gonevuli mo drau salavata ina dua na vuli iVolatabu, se me salavata kei na dua na dautukutuku matua. E rawa ni vakamacala tale ga ena parakaravu se na tikinivolatabu e veivosakitaki tiko. Ni raica oqo o gonevuli ena vulica kina e levu na ka me caka mera toso kina na vuli iVolatabu. (Vkai. 27:17; 2 Tim. 2:2) Vakacaucautaki gonevuli, drau qai veivosakitaka na ka me vakavinakataka.
6 Nodra vakavulici na dautukutuku vou mera qasenivuli ni Vosa ni Kalou ena vakarautaki ira ena ‘cakacaka vinaka’ ni nodra vukei tale e so mera vuli iVolatabu. (2 Tim. 3:17, VV) E ka marautaki dina na noda cakacaka vata kei ira na noda vuli iVolatabu nida sureti ira tale e so: “O koya sa vinakata, me mai gunuva walega na wai ni bula”!—Vkta. 22:17.