Vuli iVolatabu e Matanivale se ena Talevoni

1, 2. Eda na veisautaka vakacava na ivalavala ni noda caka vuli iVolatabu meda vukei ira kina na tamata osooso?

¹ Era sa rui osooso na tamata nikua. Ia e levu era kauaitaka tu na nodra bula vakayalo. E rawa vakacava nida vakacegui ira vakayalo? (Maciu 5:​3, NW) E levu na dautukutuku era caka vuli iVolatabu sara ga ena matanivale se ena talevoni. Rawa beka nida vakarabailevutaka noda cakacaka vakavunau ena rua na sala oqo?

² Me tekivutaki e dua na vuli iVolatabu, e dodonu meda tu vakarau meda vakaraitaka na icakacaka ni vuli iVolatabu ke gadrevi me caka vaka kina. Eda na cakava vakacava? Eda na cakava e vei?

3. Na cava me vakaraitaki kina na iwalewale ni vuli iVolatabu ena imatai ga ni gauna eda sotavi ira kina na tataleitaki? Me caka vakacava?

³ E Matanivale: Ni o sotava e dua e makutu na veitalanoataka na iVolatabu, cega sara na parakaravu o sa vakarautaka tu, me vaka na imatai ni parakaravu ni lesoni 1 ena brochure na Loma ni Kalou, drau tekivu sara. Wilika na parakaravu, taroga na taro, qai veivosakitaka e dua se rua na tikinivolatabu e sega ni lavetaki. E rawa sara ga ni caka oqo ena matanivale ena lima ina tini ga na miniti. Ke taleitaka o itaukeinivale na nomudrau veitalanoa, lokuca na gauna mo drau qai veivosakitaka kina na parakaravu e tarava se rua tale na parakaravu.​​—⁠Raica e so tale na vakatutu ena Noda Cakacaka Vakaitalatala, Janueri 2002, t. 6, me baleta na veisureti vakadodonu me tekivu kina e dua na vuli iVolatabu.

4. Eda na tekivutaka vakacava na vuli iVolatabu ena matanivale nida veisikovi lesu?

⁴ E rawa ni muri tale ga e dua na iwalewale vaka oqo ena veisikovi lesu me tekivu kina e dua na vuli iVolatabu. Kena ivakaraitaki, vakamacalataka na yaca ni Kalou, cega sara na brochure na Loma ni Kalou, lesoni 2, parakaravu 1-2. Ena veisiko e tarava e rawa ni drau veivosakitaka na ka e tukuna na iVolatabu me baleta na itovo uasivi i Jiova, ni drau vakayagataka na parakaravu 3-4. Ena veivosaki tale e tarava, e rawa ni drau veivosakitaka na parakaravu 5-6 kei na iyaloyalo ena tabana 5 mo vakabibitaka ni kena vulici na iVolatabu eda na kilai Jiova kina vakavinaka. E rawa ni caka kece oqo ena matanivale.

5, 6. (a) Na cava na vuna era na vinakata kina e so mera vuli iVolatabu ena talevoni? (b) Na iwalewale cava eda rawa ni vakayagataka nida caka vuli ena talevoni?

⁵ Ena Talevoni: E so e vinaka cake vei ira mera vuli iVolatabu ena talevoni mai na nodra veirai tiko. Dikeva mada na vakasavuirogorogo oqo: A cakacaka vakavunau tiko e dua na tacida yalewa e veivale qai sotava e dua na marama gone, e cakacaka saumi tiko, e tina, qai osooso tale ga. Ni dredre vua na tacida me sotavi koya tale, mani nanuma kina me sa na qiri koya. A vakamacalataka na marama gone oya ni sega vua na gauna me na veitalanoataka kina na iVolatabu. A kaya vua na tacida yalewa: “O rawa ni vulica e dua na ka vou ena talevoni ena loma ga ni 10 se 15 na miniti.” “Ke caka ena talevoni, sa donu!” a kaya na marama. Sega ni dede, sa vuli iVolatabu sara tiko na marama gone oqo ena talevoni.

⁶ Ena so beka noda veisikovi lesu era vinakata mera vuli ena talevoni? Rawa ni o tovolea na iwalewale e cakava na tacida yalewa oya, se o rawa ni kaya: “Ke oni vinakata, e rawa ni daru veitalanoataka na iVolatabu ena talevoni. Ena vinaka beka oqori vei kemuni?” Nida veisautaka na iwalewale ni vuli iVolatabu me ganiti ira e so, eda sa vukei ira tiko mera ‘kunea na Kalou mera kilai koya.’​​—⁠Vkai. 2:5; 1 Kor. 9:​23.