Saga Mo Maqosa ena Vakamacala
1. Na itukutuku cava ena iVolatabu eda na dikeva? Na cava na vuna?
1 Na ivakamacala i Paula na yapositolo ena valenisoro mai Anitioki e Pisitia e volatukutukutaki tu ena Cakacaka 13:16-41. Oqo e ivakaraitaki vinaka ni maqosa ena vakamacala. E vakasamataka o Paula na ivakarau ni nodra bula kei na nodra rai na vakarorogo, qai moica nona vakamacalataka na itukutuku vinaka me ganiti ira. Nida dikeva na itukutuku oqo meda raica se sala cava eda rawa ni vakatotomuria kina ena cakacaka vakavunau.
2. Na cava eda vulica ena ivalavala ni nona tekivutaka na nona vunau o Paula?
2 Tukuna na Ka Drau Duavata Kina: Dina ga ni itukutuku i Paula e yavutaki ena nona vakayacora o Jisu na inaki ni Kalou, ia a sega ni cavuta oqori ena gauna a tekivu vunau kina vei ira. A tukuna e liu e dua na ka e duavata kina kei ira na Jiu, oya na kedra itukutuku makawa na Jiu. (Caka. 13:16-22) Ena rawa ni laulau tale ga vaka oqori na noda vunau kevaka eda tukuna e dua na ka eda duavata kina. De gadrevi kina meda taro vakamatau, da qai rogoci ira vinaka mera tukuna na lomadra, meda kila kina na ka e bibi dina vei ira.
3. Na cava e dredre kina vei ira na rogoci Paula tiko mera vakabauta ni o Jisu ga na Mesaia yalataki?
3 Nona tukuna tiko na kedra itukutuku makawa na Jiu, a vakadreta vei ira o Paula na ka a yalataka na Kalou me baleta nona na vakarautaka e dua na iVakabula ena basika ena iyatukawa i Tevita. E levu na Jiu era namaka tiko e dua na tagane qaqa ni mataivalu me na sereki ira mai na nodra veiliutaki na Roma, me qai vakacerecerei ira na Jiu vei ira na veimatanitu kece. Ia era kila vinaka tu ni o ira na iliuliu ni lotu Vakajiu e Jerusalemi era cati Jisu ra qai soli koya vei ira na vakailesilesi ni matanitu o Roma mera vakamatei koya. Ena maqosataka vakacava o Paula nona ivakamacala mera kila kina ni oya ga na Mesaia yalataki?
4. E maqosataka vakacava o Paula nona vakamacala vei ira na Jiu?
4 Veiveisautaka Nomu iWalewale: Ni kila o Paula na ivakarau ni nodra vakasama, a maqosataka nona vakayagataka na iVolatabu ni vakamacala vei ira, e yavutaka tale ga ena veika era sa vakabauta tu. Kena ivakaraitaki, a tukuna ni basika mai o Jisu ena kawa i Tevita, a vakadinadinataki koya tale ga e dua a kilai tu me parofita ni Kalou o Joni na Dauveipapitaiso. (Caka. 13:23-25) A vakaraitaka o Paula ni nodra cati Jisu ra qai lewai koya me mate, era sa “vakayacora tiko” kina na iliuliu ni lotu “na nodra vosa na parofita.” (Caka. 13:26-28, VV) E kuria ni so era raica sara ga na nona vakaturi mai na mate o Jisu, oti oya sa qai tukuna na veika e kaya na iVolatabu era kila vinaka e vakayacori ena nona vakaturi o Jisu.—Caka. 13:29-37.
5. (a) A moica vakacava o Paula na nona iwalewale ni vunau vei ira na kai Kirisi? (b) Eda na muria vakacava na ivakaraitaki i Paula nida vunau ena noda yalava?
5 Ena yasana adua, e duatani na iwalewale e vakayagataka o Paula ena nona vosa vei ira na kai Kirisi ena vanua cecere nei Arisi e Aceni. (Caka. 17:22-31) E dua ga na itukutuku e kacivaka tiko, ia e yaga ena vanua ruarua oqori na nona ivakamacala. (Caka. 13:42, 43; 17:34) E vakatale ga kina nikua, ena laulau na noda cakacaka vakavunau kevaka eda tukuna e dua na ka eda duavata kina kei ira na vakarorogo, da qai moica na noda iwalewale me ganita na nodra ivakatagedegede ni bula kei na nodra rai.