Na Ka e Rawati ena Noda Cakacaka Vakavunau
1. E raica vakacava o Jiova na noda cakacaka vakavunau? Era ciqoma vakacava na tamata?
1 E tukuni ena Vosa ni Kalou ni vaka era tayabe tiko ena qaqa na lotu Vakarisito ena nodra cakava tiko na cakacaka i Jiova. (2 Kor. 2:14-16, VV) Nida wasea gona na veika dina me baleta na Kalou, na noda cakacaka oya e vaka sara ga eda sa cabora tiko na ka boi vinaka vei Jiova. E so e dreti ira na kamica ni itukutuku vinaka; e so tale era sega ni taleitaka. Na nodra sega gona ni taleitaka e levu na noda cakacaka e sega ni kena ibalebale ni sega ni yaga na noda cakacaka. Meda dikeva mada na ka e rawati ena noda cakacaka vakavunau.
2. Na cava e vukea meda vakaraitaka na cakacaka vakavunau?
2 Vakalagilagi o Jiova: E kaya voli o Setani nida qaravi Jiova ga ena vuku ni ka vinaka eda rawata kina. (Jope 1:9-11) Ia na cakacaka vakavunau e vukei keda meda vakaraitaka nida qarava dina na Kalou mai vu ni lomada. E levu gona na dautukutuku era muria tiko ga na ivakaro mera vunau ra qai veivakatisaipelitaki, dina ga nira sotava tiko na dredre se nira sega ni vakarorogo e so. Na yalodina vaka oqo e vakamarautaki Jiova sara ga!—Vkai. 27:11.
3. Na cava e bibi kina meda vakatakila tiko ga na yaca ni Kalou kei na nona inaki?
3 Na cakacaka vakavunau e vakayacori tale ga kina na inaki ni Kalou. Me baleta na kena vakarusai na vuravura i Setani, e kaya o Jiova: “Ka ra na kila na veimatanitu tani ni sai au ko Jiova.” (Isik. 39:7) Mera kila oqo na veimatanitu, e bibi gona vei ira na dauveiqaravi ni Kalou mera vakatakila tiko ga na yacana kei na nona inaki vei ira “na veimatanitu, kei na veimataqali, kei na duivosavosa, kei ira na tamata.”—Vkta. 14:6, 7.
4. Na sala cava e yavu kina ni veilewai na cakacaka vakavunau?
4 Yavu ni Veilewai: Na kacivaki ni itukutuku vinaka e yavu tale ga ni veilewai. E kaya na yapositolo o Paula ni o Karisito Jisu ena cudruvi ira ‘na sega ni kila na Kalou, kei ira na sega ni vakabauta na itukutuku vinaka ni noda Turaga o Jisu.’ (2 Ces. 1:8, 9) Era na lewai gona na tamata ena ivakarau ni nodra rogoca na itukutuku vinaka. E vakaraitaka oqo na bibi ni nodra itavi na dauveiqaravi ni Kalou! Me kua ni tarogi vei keda na nodra mate na tamata, e dodonu meda kua ni tuvakasuka ni vakatakila na itukutuku ni veivakabulai ni Matanitu ni Kalou.—Caka. 20:26, 27.
5. E laurai vakacava ena noda cakacaka vakavunau na yalololoma ni Kalou?
5 Na noda vukei ira tiko ga na tamata me rawa ni vakadonui ira na Kalou e vakaraitaka na yalololoma i Jiova. (1 Tim. 2:3, 4) Nida kila ni dau veiveisau na ivakarau ni bula, eda na lako tiko ga vei ira na itaukeinivale meda uqeti ira mera vakasaqarai Jiova ni se vo na gauna. Nida cakava oqori eda sa vakaraitaka tiko na “nona loloma levu na noda Kalou” baleta ‘ni sega ni vinakata me rusa e dua, mera veivutuni ga na tamata kece.’—Luke 1:78; 2 Pita 3:9.
6. Na cava na yaga ni noda vakaogai keda tiko ena cakacaka i Jiova?
6 Yaga Vei Keda: E itataqomaki tale ga na noda vakaogai keda ena cakacaka i Jiova. Ena uqeti keda meda ‘waraka tiko na kena yaco mai na siga ni Kalou [o Jiova],’ eda na sega tale ga kina ni vakadukadukalitaki keda ena ituvaki ca kei vuravura. (2 Pita 3:11-14; Taito 2:11, 12) Meda ‘tudei sara, meda kakua ni yavala, meda uasivi cake ena cakacaka ni Turaga ena gauna kece ga,’ nida kila ni sega ni ka wale na noda cakacaka vakavunau.—1 Kor. 15:58.