Na Vuli Cava e Yaga Duadua ena Noda Bula?

O VAKILA beka ena so na gauna ni vaka mo sa luvu tiko ena waitavikoviko ni sa rui veitaqataqai na nomu leqa? Ia, vakasamataka mada na nomu sa na qai rarawa ga vakalevu, ke cala na nomu vakatulewataka na sala mo walia kina e dua se vica vei ira na leqa oqori! Vakauasivi, ni sega ni dua e sucukaya mai na kila me walia rawa kina na leqa taucoko, se me vakatulewa vinaka ena veigauna kece. E bibi gona e ke na vuli. Ia, e rawa nida vulica e vei na noda vakarautaki keda meda kila na iwali ni leqa eda dau sotava ena noda bula?

Levu na itabagone kei ira na itabaqase era okata na vuli me ka bibi ena nodra bula. So sara mada ga na kenadau ena tabana ni vuli era kaya nira “vakabauta deivaki ni o na sega ni kunea rawa e dua na nomu cakacaka [vinaka] ke o sega ni vakoroi.” Ia, e so na ka eda gadreva na tamata e sega ni vakaceguya na vakamatanivola. Me kena ivakaraitaki, ena vukei iko beka na nomu vuli torocake mo dua kina na itubutubu, itokani, tagane vakawati se yalewa vakawati vinaka? O ira sara mada ga era dau qoroi nira vuli vinaka e rawa nira bucina tale e so na itovo lolovira, e kavoro nodra vuvale, se ra lai tini vakamatei ira ga vakataki ira.

E so era nuitaka na lotu me dusimaki ira ena nodra vakavulici, ia era yalolailai nira sega ni kunea kina na ivakasala yaga me rawa nira vosota na ituvaki dredre era sotava. Vakadinadinataki oqo ena ka e kaya o Ameliaa mai Mexico: “Sa oti oqo e 15 na yabaki na noqu a vakila niu sa sega ni rawa ni bula vata kei watiqu. Ni keirau dau veiba e veigauna. Au sega tale ga ni tarova rawa na nona daugunu. Vakavuqa au dau biuti iratou duadua tu mai na gone, e dina ni ratou se lalai sara, meu lai vaqarai tama i keitou. E vusolo na lomaqu ena levu ni noqu rarawa. Levu na gauna au dau lako i valenilotu ena noqu vaqara voli e dua na iwali ni noqu leqa. A vakayagataki vagauna kina na iVolatabu, ia au sega vakadua ni bau rogoca e dua na ivakasala e ganita sara ga na kequ ituvaki; se me bau dua e lako mai me tukuna vei au na ka meu cakava. E sega ni vakacegui au na noqu lai dabe vakalekaleka toka e valenilotu kei na noqu cavuqaqataka e so na qaqanimasu.” De so era na yalolailai nira raica na nodra ivakaraitaki ca na nodra iliuliu ni lotu. Yaco kina mera sega ni nuitaka na lotu me ivurevure ni veivakavulici e gadrevi me vinaka kina na nodra bula.

O koya gona, o na rairai taroga, ‘Na vuli cava e dodonu meu rawata me na yaga ena noqu bula?’ E sauma rawa beka na lotu Vakarisito dina na taro bibi oqo? Ena qai vakamacalataki oqori ena ulutaga e tarava.

[iVakamacala e ra]