Vakaraitaka ni O Kauai Dina ena Nomu Taro kei na Nomu Vakarorogo
1 Era dau taleitaka e levu mera vakamacalataka nodra nanuma, ia era sega ga ni dau taleitaka mera vakadodonutaki se mera vakatarogi. E bibi gona vei keda na italatala lotu Vakarisito meda maqosataka noda taro me rawa nida takiva mai na ka e tu e lomadra na itaukeinivale.—Vkai. 20:5.
2 E dodonu me veiuqeti na noda taro, me kua ni veivakayalolailaitaki. E dau taroga e dua na tacida tagane ni vunau tiko e veivale, “Na cava nomu nanuma, ena dua beka na gauna eda na veirokorokovi da qai veidokai na tamata kece?” Ena vakatau ena ka e tukuna o itaukeinivale na nona tomana na tacida oqo me taroga, “Na cava beka ena gadrevi me na vakavatukana kina na ka oqo?” se “Na cava beka e vaka kina oqori na nomu nanuma?” Ni vunau tawalokuci tiko e dua tale na tacida, e dau tarogi ira na vakaluveni, “Ni o qarava tiko nomu itavi vakaitubutubu, na cava e dua na ka o marautaka vakalevu?” Oti, e qai taroga, “Ia na cava o dau leqataka?” Na taro oqo e sega ni veivakayalolailaitaki, e uqeti ira ga mera vakamacala. Ni duidui na ituvaki, ena gadrevi meda veiveisautaka na ka eda taroga me ganiti ira na tiko ena yalava.
3 Takiva Mai na Ka e Tu e Lomadra: Kevaka era tu vakarau na itaukeinivale mera tukuna na ka era nanuma, mo vakarorogo vinaka, qai kua ni curu takoso nira vosa tiko. (Jeme. 1:19) Ciqoma ena yalovinaka na nodra ivakamacala. (Kolo. 4:6) O rawa ni kaya: “E vakavure vakasama sara ga na tikina oqori. Au marautaka vakalevu na nomu tukuna vei au.” Vakavinavinakataki koya kevaka o duavata kei na ka e tukuna. Taroga e so tale na taro mo kila kina na ka e nanuma kei na vuna e vaka kina oya na nona rai, ia mo cakava ena yalovinaka. Qara e dua na ka o drau duavata kina. Kevaka o vinakata me raica na iVolatabu, o rawa ni kaya, “O sa bau vakasamataka tu beka na tikina oqo?” Meda kua ni dre ga noda mua se via veiba.—2 Tim. 2:24, 25.
4 Na nodra via sauma se sega na itaukeinivale na noda taro ena vakatau ke ra vakila nida rogoci ira vinaka tiko. E rawa sara ga nira kila ke da rogoci ira tiko se sega. A dikeva e dua na ivakatawa dauveilakoyaki, “E dau taleitaki e dua e dau vakarorogo, e rawarawa vei ira na itaukeinivale mera talaucaka na lomadra vua nira vakila ni kauaitaki ira dina.” Noda vakarorogo e vakaraitaka na noda dokai ira, ena rawa ni uqeti ira tale ga mera rogoca na itukutuku vinaka eda kauta tiko yani.—Roma 12:10.