Meda Tekivutaka Vakacava na Vuli ena iVola Kaya na iVolatabu?
Levu vei keda era na marau sara mera veivakavulici ena iVolatabu, ia e dredre wale tiko ga na nodra tauyavutaka rawa e dua! E rawa gona ni vukei keda na ivola vou Na Cava Sara Mada e Kaya na iVolatabu? Na imatai sara ga ni ulutaga ena tabana 3-7 e vakarautaki me vakarawarawataka na kena tekivutaki e dua na vuli iVolatabu ena ivola oqo. O ira mada ga era sega soti ni matau ena cakacaka vakavunau ena rawarawa sara nodra tekivutaka e dua na vuli iVolatabu.
◼ Rawa ni o taurivaka na iwalewale oqo ni o vakayagataka na tabana 3:
Ni o tukuna oti e dua na itukutuku e se qai kacivaki ga se dua na leqa era kila na tu ena yalava, vakamua sara na itaukeinivale ena tolu na taro e tabaki ena matanivola kata ena tabana 3, qai sureti koya me vakamacala. Cega sara na tabana 4-5.
◼ Se rawa ni o tekivu ena nomu vakamacalataka na tabana 4-5:
O rawa ni kaya, “Sega li ni na marautaki kevaka me yaco dina na veisau e tabaki tu oqo?” Se o rawa ni taroga, “Na vosa ni yalayala cava e tabaki tu oqo o na vinakata sara ga me vakayacori?” Rogoca vinaka na ka ena tukuna.
Ke taleitaka vakalevu o itaukeinivale e dua na tikinivolatabu ena tabana e 4 se 5, vakaraitaka vua na ka e tukuna na iVolatabu me baleta na tikina oqori ena nomudrau veivosakitaka na parakaravu e vakamatatataki tu kina na tikinivolatabu oya mai na ivola. (Raica na kato ena tabana oqo.) Drau veivosakitaka na tikina oqori ena ivalavala ga ni kena dau vulici na iVolatabu. Oqo e rawa ni caka ena imatai ni gauna o sotavi itaukeinivale kina, e rawa ni caka sara ga ena matanivale ena lima se tini na miniti.
◼ Dua tale na iwalewale oya mo tarogi koya ena veitaro e tiko ena tabana 6:
Vakaraitaka vei itaukeinivale na ono na taro ena tabana oqo qai taroga, “O bau dau lomatarotarotaka tu beka e so na taro oqo?” Ke taleitaka e dua na taro, cega na parakaravu ena ivola ena sauma vinaka na taro oqori. (Raica na kato ena tabana oqo.) Ni drau veivosakitaka vata na tikina oqori, o sa tekivuna sara tiko ga e dua na vuli iVolatabu.
◼ Rawa ni vakayagataki na tabana 7 me vakaraitaki kina na icakacaka ni vuli iVolatabu:
Wilika na imatai ni tolu na iyatuvosa ena tabana oqo, qai cega na wase 3, vakaraitaka sara na icakacaka ni vuli ena nomudrau veivosakitaka na parakaravu 1-3. Tuvanaka mo lesu tale mo drau qai veivosakitaka na isau ni rua na taro e tiko ena parakaravu 3.
◼ Ka mo kaya me idewadewa ni nomu veisikovi lesu:
Ni sa oti na imatai ni nomudrau vuli, tukuna e dua na ka me yavu ni veisikovi lesu. O rawa ni kaya: “Ena vica wale ga na miniti daru sa vulica kina na ka e kaya na iVolatabu ena ulutaga bibi oqo. Ena nodaru veivosaki e tarava, daru na raica kina na [taroga sara e dua na taro, me na qai veivosakitaki]. Au rawa ni lesu mai ena gauna vata ga oqo ena macawa mai oqo?”
Nida sa volekata tiko yani na siga lokuci i Jiova, e se vakarautaki keda tiko ga ena cakacaka eda cakava tiko oqo. (Maciu 28:19, 20, VV; 2 Tim. 3:17) Meda vakayagataka vinaka mada ga na iyaya ni cakacaka vinaka oqo meda tekivuna kina e dua na vuli iVolatabu.
[Kato ena tabana e 3]
Veivosakitaki ni Tikinivolatabu ena Tabana 4-5
◻ Vakatakila 21:4, VV (t. 27-8, p. 1-3)
◻ Aisea 33:24; 35:5, 6 (t. 36, p. 22)
◻ Joni 5:28, 29, NW (t. 72-3, p. 17-19)
◻ Same 72:16 (t. 34, p. 19)
iSau ni Taro ena Tabana 6
◻ Na cava eda rarawa voli kina? (t. 108-9, p. 6-8)
◻ Eda na walia vakacava na noda nuiqawaqawa? (t. 184-5, p. 1-3)
◻ Na cava meda cakava meda marautaka kina noda bula vakavuvale? (t. 142-3, p. 20)
◻ Na cava e yacovi keda nida mate? (t. 58-9, p. 5-6)
◻ Eda na raici ira tale beka na wekada voleka era sa takali yani? (t. 72-3, p. 17-19)
◻ Na ivakadei cava e tu meda kila kina ni na vakayacora dina na Kalou na nona vosa ni yalayala? (t. 25, p. 17)