O Rawa ni Tekivutaka e Dua na Vuli iVolatabu ena Okotova?
1. Na cava eda na solia ena Okotova?
1 Ena soli ena Okotova Na Vale ni Vakatawa kei na Yadra! Nira sikovi na tataleitaki meda solia na tikidua O Via Kila na Ka Dina? Saga me tekivu sara na vuli iVolatabu. Meda cakava vakacava qori nida veisikovi lesu?
2. Nida sikova lesu e dua a taura na mekesini, eda na vakayagataka vakacava na tikidua Kila na Ka Dina me tekivu kina na vuli iVolatabu?
2 iWalewale me Soli Kina na Tikidua: Eda na rairai kaya: “Na mekesini au solia vei kemuni e uqeti ira na matatamata kece e duidui tale ga na nodra lotu mera dikeva na iVolatabu. [Solia vei itaukeinivale na tikidua Kila na Ka Dina, dusimaki koya sara ena taro ena tabana eliu.] Qo eso na taro vakavure vakasama, na kena isau veivakacegui e tiko ena iVolatabu. E dua beka na taro qo o vinakata mo kila na kena isau?” Waraka me sauma o taukeinivale qai vakaraitaka vua na isaunitaro ena tikidua, wilika e dua na tikinivolatabu e sega ni lavetaki. Vakamacalataka vua ni qo e dua ga na ivakaraitaki ni ivakavuvuli vakaivolatabu, oti solia sara na ivola Kaya na iVolatabu. Ke digitaka kina e dua na ulutaga eda rawa ni vakamacalataka vua na imatai ni vica na parakaravu ena ulutaga oya. Se o rawa ni vagolei koya ena tabana e tiko kina na ulutaga drau veivosakitaka ena tikidua. Qo eso na taro ena tikidua kei na taba ni ivola ni Kaya na iVolatabu eda rawa ni vakamua kina na veivosaki:
● E kauaitaki keda beka na Kalou? (t. 9-11, p. 6-10)
● Ena oti beka na ivalu kei na rarawa? (t. 12, p. 12-13)
● E bula tale tiko e dua na ka nida sa mate? (t. 59-60, p. 7-8)
● Na cava na inuinui me baleti ira na sa mate? (t. 71, p. 13-15)
● Na masu vakacava e rogoca na Kalou? (t. 166-167, p. 5-8)
● Rawati vakacava na marau? (t. 9, p. 4-5)
3. Na cava meda cakava ke sega ni tekivu rawa na vuli ena imatai ni veisiko?
3 Ni o sikovi koya lesu na itaukeinivale ena imatai ni gauna, ia o sega ni tekivutaka rawa na vuli ena vuku ni so na ituvaki, tuvanaka tale e dua na siga mo drau veivosaki kina. De na vinaka mo veivosakitaka tale e vica na ulutaga ena tikidua ni bera ni o solia vua na ivola Kaya na iVolatabu, ena vakatau ena veika e kauaitaka o taukeinivale. Meda vakayagataka vinaka mada ga na tikidua totoka qo ena Okotova me tekivu kina na vuli iVolatabu kei ira era via “kila na ka dina.”—Joni 8:31, 32.