Vakayagataka na Veika e Raici ni O Veivakavulici
1. E vakayagataka vakacava o Jiova na veika e raici se saravi me vakavulici ira kina nona dauveiqaravi? E cakayaco vakacava?
1 Ni dau vakasavuya o Jiova e dua na itukutuku bibi vei ira nona dauveiqaravi, e sega ni vosa ga, e dau vakayagataka tale ga ena so na gauna na raivotu kei na tadra. Vakasamataka mada na raivotu i Isikeli me baleta na qiqi vakaiukuuku i Jiova. (Isik. 1:1-28) Raitayaloyalotaka na ka e vakila o Taniela ni raivotutaka na tadra vakaparofisai e vakaraitaka na nodra cadra veitaravi na veimatanitu qaqa kei vuravura. (Tani. 7:1-15, 28) Ia vakacava ga na raivotu vakatubuqoroqoro e ‘vakatakilai’ vua na yapositolo o Joni me baleta na ka ena yaco ena “siga ni Turaga”? (Vkta. 1:1, 10, VV) E vakavulici iratou na lewe tolu oqo o Jiova ena nona vakayagataka na iyaloyalo vakatubuqoroqoro kei na igu kaukaua, e vakavuna na kena dei tu ga ena nodratou vakasama.
2. Na cava eda rawa ni vakayagataka meda vakavulica kina na ka dina ena iVolatabu?
2 Kevaka eda via wasea na ka dina ena iVolatabu me na dei ena nodra vakasama na vakarorogo, e rawa nida vakayagataka na vidio se na ka e saravi nida veivakavulici. Era tu ena vidio ni isoqosoqo na veiulutaga ena tara cake na noda vakabauta na iVolatabu, na isoqosoqo i Jiova, kei na yavu vakaivolatabu ena vakavinakataka noda bula na lotu Vakarisito. Meda raica mada e so na sala e rawa nida vakayagataka kina na noda vidio meda veivakavulici. Oqo e so na vidio e rawa nida vakayagataka.
3. Na cava eda rawa ni vakayagataka meda vagolei ira kina na vuli iVolatabu ina veika me baleta na isoqosoqo?
3 Ena Cakacaka Vakavunau: O sa bau vakamacalataka tiko vua na nomu vuli iVolatabu na noda isoqosoqo ni mataveitacini e vuravura raraba? Vakaraitaka vua na vidio Our Whole Association of Brothers. Rawa ni o solia vua me raica ni bera na nomudrau vuli, se drau sarava vata ena nomudrau vuli e tarava. Drau veivosakitaka, qai railesuva na taro ena Noda Cakacaka Vakaitalatala, June 2002.
4. Na iyaya ni veivakavulici cava e rawa ni vakayagataka e dua na itabagone iVakadindina e koronivuli?
4 Ra itabagone, e rawa ni oni kerea vei qasenivuli mo ni vakaraitaka vei ira na lewenikalasi na vidio Jehovah’s Witnesses Stand Firm Against Nazi Assault se Faithful Under Trials—Jehovah’s Witnesses in the Soviet Union. Tukuna ni o na vakarautaka e so na taro me veivosakitaki ena kalasi, vakayagataka na taro ena Noda Cakacaka Vakaitalatala, June 2001, se na Feperueri 2003.
5. Na cava e rawa nira vakayagataka na itubutubu ena nodra vuli vakavuvale?
5 Ena Vuvale kei Ira na iTokani: Ra itubutubu, oni vakasamataka na iotioti ni gauna oni sarava vata kina kei ira na gone na vidio Young People Ask—How Can I Make Real Friends? Vakacava mo dou sarava tale ena nomudou vuli vakavuvale e tarava? E koto ena Noda Cakacaka Vakaitalatala, Epereli 2002, e so na taro me vakabulabulataka na nomudou veivosaki.
6. E rawa vakacava ni veivakayaloqaqataki na noda veisureti vei ira na noda itokani?
6 E tiko beka e so na itokani ena ivavakoso o via sureta e vale? Na nomudou sarava vata na vidio Respect Jehovah’s Authority ena veivakayaloqaqataki, vakabibi ke dou railesuva na lesoni e vulici ena vidio ena kena vakayagataki na taro ena Noda Cakacaka Vakaitalatala, Sepiteba 2004.
7. Vanua cava tale eda rawa ni vakaraitaka kina na vidio?
7 Ena So Tale na Vanua: Vanua cava tale eda rawa ni vakaraitaka kina na 20 na noda vidio? Rawa nida vakaraitaka vua e dua se rua eda dau lesuva, me rawa nira toso kina vakayalo. Rawa nida kerea meda vakaraitaka ena nodra itikotiko na malumalumu se nodra itikotiko na sa qase. Rawa nida vakaraitaka vei ira na wekada era sega ni tiko ena dina, o ira eda tiko veitikivi, se o ira eda cakacaka vata. Na noda vidio e veilauti, e veivakavulici qai laulau. Meda vakayagataka ena veivakavulici.