Ra Taroga na iTabagone . . .

E Dodonu Beka Meu Sarava na Vidio ni iVakatagi?

“E maleka na sarava na vidio ni ivakatagi. E so e vaka sara ga na iyaloyalo leleka. Era tukuna e dua na italanoa, au dau taleitaka nodra dau biuta vata na kena ivakamacala.”​—Casey.

“E sala vinaka ni kena kunei kina na ivakatagi vou. O na kila na 40 na matasere kilai levu ena ituvatuva ni sere taleitaki. Na iyaloyalo tale ga ni ivakatagi e ulutaga vinaka ni veitalanoa.”​—Josh.

“E bibi vei au na veika e vakaraitaki ena vidio​—o koya e lagasere, na ka e daramaka, kei na nona ivukivuki. Ni veisotari vata na veika oqo ena kilai kina na ibalebale ni qaqanisere.” ​—Kimberly.

“Au via raica sara ga na ka ena cakava ena gauna oqo na mataqiriqiri au taleitaka. Au dau taleitaka na kena katoni. E so na iyaloyalo e lasa. Ia, e dodonu meda qaqarauni.”​—Sam.

O RAIRAI dau taleitaka tale ga na sarava na vidio ni ivakatagi. Na imatai ni gauna era vakaraitaki mai kina ena retioyaloyalo era sega soti ni saulevu. Ia, ni sa vakadinadinataki ni sega ni ka wale na vidio ni ivakatagi qai cakayaco vakalevu ena kena volitaki, sa qai toso cake tiko ga na duatani ni kena vakarautaki, na vereverea ni katokatoni kei na ka e vakaraitaka. Ena gauna oqo na vidio ni ivakatagi e tiki bibi sara ga ni vuravura ni ivakatagi qai kilai levu vei ira na itabagone. Ena so na vanua, e so na kabani ni retioyaloyalo e vakatabakidua sara ga nodra vakaraitaka na vidio ni ivakatagi!

Ia, na cava ga na vuna era kaya kina e so na itabagone me vakataki Sam, ni dodonu meda qaqarauni? Baleta beka ni so na vidio ni ivakatagi e rawa ni ca​—ena vakacaraka beka na nomu vakasama, itovo vinaka kei na nomu veiwekani kei na Dauveibuli? Ena rairai rogo vakatani tale beka na taro oqo. Ia, vakasamataka mada, ke o lai sisili ena drano se wasawasa, qai volai tu kina e dua na ivakasala ni ca se rerevaki na sisili kina, e ka vakayalomatua beka mo vakalecalecava na ivakasala oya? Sega. E bibi gona mo dikeva e so na ivakasala me baleta na saravi ni vidio ni ivakatagi.

Vanua Rerevaki

E dodonu mo vakadinata mada e liu ni ka o raica kei na ka o rogoca ena cakayaco vei iko! E tukuna vei keda na iVolatabu ni o koya na imatai ni tui kei Isireli o Saula, e yaga vua na ivakatagi​—e vakaceguya na lomana. (1 Samuela 16:14-23) E tiko tale beka ga na yasana ca ni ivakatagi? E kaya na ivola Rock and Roll​—Its History and Stylistic Development: “E sega ni dua e rawa ni kaya ni cakayaco ena dua ga na yasana na ivakatagi. Kevaka eda kaya ni tiko na yasana vinaka ni ivakatagi na rock, meda vakadinata tale ga ni tiko na yasana ca. O koya e dokadoka ni tukuna ni sega ni na cakayaco vua na nona rogo ivakatagi, e vagonegonea se lecaika.”

E dusia vakavica na iVolatabu na ka e rawa ni cakava na matada ina noda vakasama kei na lomada. (Vosa Vakaibalebale 27:20; 1 Joni 2:16) Na kena vakaikuritaki na ka e laurai ena vidio ni ivakatagi, era lai vakalevutaka kina na dau caka iyaloyalo na ka e rawa ni uqeti ira na dau rogo ivakatagi. Na mataqali iyaloyalo vakacava e dau vakaraitaki vakalevu?

E laurai ena dua na vakadidike ni rauta e 57 na pasede ni vidio na rock, e baleta na ivalavala kaukaua. Rauta ni 76 na pasede na veika e vauca na veiyacovi dukadukali. Dua tale ga na vakadidike e kunei kina ni 75 na pasede ni iyaloyalo e tukuna e dua na italanoa e okati kina na itovo vakasisila, qai sivia na kena veimama na itovo kaukaua, vakabibi ni caka vei ira na yalewa. Ena vakacaraki iko beka na sarava na iyaloyalo vaka oqori? E kaya e dua na ivola, “e kunei ena vakadidike e caka ni veika e raici ena vidio ni ivakatagi e tara sara ga nodra rai na itabagone me baleta na veiyacovi nira se gone.” E sega ni vakabekataki ni nodra saga na daunivakatagi mera vinaka cake sara mai vei ira e liu ena mataqali ivakatagi era cakava, e sa qai vakarisekete ga kina na ka era vakarautaka.

E dikeva rawa na ka oqo e dua e kenadau ena ka ni vuli: “E vuqa era kaya ni veika era rogoca kei na ka era sarava ena vidio ni ivakatagi e sega sara ga ni duidui kei na ka e vakayacora na ivakatagi vei ira na itabatamata sa oti . . . E kena irairai ni levu vei ira na daunivakatagi nikua era vakayagataka me iyaragi na vosa rogorogo ca kei na ivukivuki e tawaveidokai, me vakalevutaki kina na volitaki ni nodra vidio.” E kaya tale ga na ivola na Chicago ena vukudra na sarava tiko na porokaramu ni vidio ni ivakatagi: “E sega ni taqei rawa na levu ni ivukivuki veivagarogaroi era sarava kina.”

E kuria na ivola na Chicago me baleta e dua na vidio ni ivakatagi ni “dabe toka e dua na gonetagane ena dua na valenikana, a vakala sara e muri na uluna. E laurai na wadadamu ni dua na ita levu e domona qai lutu tani na uluna.” E dua tale na vidio e laurai ni dua na tagane e takavi dra tu qai luvaluva tiko, e wadruca na lewena kei na nona masela. E vakaraitaki tale ga kina e so na ka e sega ni tukuni rawa na kena vakasisila.

E so era vakalasuya na ka oqo, era kaya ni vidio e vakamacalataki e ke e dina ni rerevaki ia e sega soti sara ni ca. E so mada ga era na kaya nira sega ni kurabuitaka se mera vakila ni ca na vidio ni ivakatagi. E sega li ni vakaraitaka oqori nira sa sega ni sokonu nira dau raica wasoma na vidio vaka oya? E vakadinata o Casey e dua na gonetagane e sa tukuni oti mai e liu: “Ke o sega ni yalana na ka o sarava, sa na lai matau vei iko na ka o dau vakasisilataka e liu. O na sega ni vakila ni o na lai via raica na kena e ca sara, o sa na ciqoma na veika o dau vakasisilataka.”

Cava e rawa ni yaco? Sa rawa sara ga ni vakaleqai na vinaka ni nomu dau vakatulewa. E rawarawa ni moici na noda vakasama ina veika ca, e uqeti keda kina na iVolatabu meda “taura ga na vuku dina kei na lewa vinaka.” (Vosa Vakaibalebale 3:21; 5:2) Na ka oqo e rawa ni vakaleqa tale ga na nomudrau veiwekani kei na Kalou o Jiova. E sega li ni ka bibi duadua vei iko oqori? E dodonu mo taqomaka na veiwekani oya ena nomu levea na ka ni veivakalasai ca. O na rawata vakacava?

Taqomaki Iko

Kena imatai, mo vakadeitaka mada ni cala na saravi ni veika e vakacala na iVolatabu. (Same 11:5; Kalatia 5:19-21; Vakatakila 21:8) Ke vakacerecerea e dua na iyaloyalo na veika e sega ni “kilikili kei ira era sa lotu,” mo vakadeitaka ni o na sega ni sarava. (Efeso 5:3, 4) O na vakadinata ni sega ni rawarawa na kena veisautaki na porokaramu se me boko, vakabibi ke maleka sara tiko ga na ka o sarava tiko. Ena gadrevi mo masu me vaka e cakava na daunisame ena nona vola: “Mo ni tarova na mataqu me’u kakua ni raica na ka lasu.”​—Same 119:37.

Lakolako e sa na matau ga mai vei iko na cata na iyaloyalo vakasisila era sa vakamacalataki oti. Ia, e so na iyaloyalo e dau vakarautaki vaqaseqase. Ena rairai basika beka ga vakalekaleka e so na tikina e laurai kina na luvawale. Era maqosataka na vakarautaka na qaqanisere kei na ka e raici mera usuraka kina e so na ivalavala tawavakalou, ia e vaka me sega sara ni vakamatailalaitaki. O koya gona kevaka o sarava e dua na iyaloyalo o vakila vakalailai ni na vakaleqai iko, sa kena ibalebale ga ni sega ni vinaka qai sega tale ga ni vakarisito. O na vakatulewataka gona vakacava na ka mo na sarava kei na ka mo kua ni sarava ke sega ni matata vei iko e so na ivakavuvuli?

Na nomu sarava na vidio ni ivakatagi e nomu ga kina na vakatulewa, kei rau na nomu itubutubu, ni nodrau itavi tale ga me rau lewa na ka mo sarava. (Efeso 6:1, 2) Kevaka erau vakatarai iko mo sarava na vidio ni ivakatagi, e dodonu mo qaqarauni, me kua ni lewai iko na ka e rairai donu tu e matamu. E uqeti keda kina na Iperiu 5:14 (VV) meda ‘vakavulica na lomada me rawa nida vakaduiduitaka na vinaka mai na ca.’ E vakavulici na lomada ena ivakavuvuli ni iVolatabu, e vakadeitaka vei keda na rai i Jiova me baleta na ka vinaka kei na ka ca. Ni o vakasamataka vakatitobu na ivakavuvuli vakaivolatabu, o na rawa ni kila kina na ka ena vakacaraka nomu bula vakayalo, kevaka mada ga e sega ni dua na kena lawa vakaivolatabu me dusimaki iko.

O koya gona na ivakavuvuli vakaivolatabu cava e rawa ni vukei iko ena veika e vauca na saravi ni vidio ni ivakatagi? Ena veivosakitaki oqo ena ulutaga ena tabana e 19.

[Tikina bibi ena tabana e 20]

“O koya e dokadoka ni tukuna ni sega ni na cakayaco vua na nona rogo ivakatagi, e vagonegonea se lecaika”

[iYaloyalo ena tabana e 17]

O rawa beka ni sarava e dua na iyaloyalo ca me qai sega ni cakayaco vei iko?