‘Muri Au Tiko Ga’
1 E levu era nanumi ira ga ena nodra vakasaqara na marau. Ia e vakaraitaka o Jisu ni marau dina e vu mai na noda sega ni nanumi keda ga. (Caka. 20:35) E kaya: “O koya yadua sa via muri au, me kakua ni muria na lomana, me . . . muri au [“tiko ga,” NW].” (Mari. 8:34) Oqo e sega wale ga ni okati kina na noda vakuai keda ena so na gauna mai na so na ka eda taleitaka. E okati sara ga kina na noda cakava e veisiga na veika e salavata kei na loma i Jiova, sega ni lomada.—Roma 14:8; 15:3.
2 Meda dikeva mada na ivakaraitaki i Paula. A vakanadakuya o koya na veika e dau taleitaka e liu, qai vakaliuca na kena vakatetei na Matanitu ni Kalou. A vakayacora oqo baleta ni sa “talei na kilai Karisito Jisu.” (Fpai. 3:7, 8, VV) E kuria, “au taleitaka me’u vakayagataka na veika e tu vei au, ka vakayagataki au tale ga” ena nodra qaravi e so tale. (2 Kor. 12:15, VV) E dodonu gona meda dui tarogi keda: ‘Au sa vakayagataka tiko beka vakacava na noqu gauna, kaukaua, taledi, kei na veika au taukena? Au dau vakaliuca beka na veika ga e baleti au, se na veika e baleti Jiova?’
3 Meda Soli Keda: Era vakayagataka e veiyabaki na tamata ni Kalou e sivia e dua na bilioni na aua mera cakava kina na cakacaka ni veivakabulai, oya na kena kacivaki na Matanitu ni Kalou. Era qarava tale ga na itavi e dau yaga vei ira kece na lewe ni ivavakoso o ira na itabagone vaka kina o ira na qase. Sa qai tu na cakacaka levu ni kena qaravi na soqo ni tabacakacaka, soqo ni tikina, na tara kei na vakavinakataki ni noda valenisoqoni, valenitabana kei na so tale. Ra qai veivuke tale ga vakalevu na tacida yalololoma era lewena na Komiti Veitaratara kei na Valenibula kei na iLawalawa Dauveisiko e Valenibula. Ena vakilai raraba na yaga ni noda vakaraitaka kece na yalo ni via veiqaravi vaka oqo!—Same 110:3.
4 E so na gauna ena gadrevi meda veivuke ena gauna e yaco kina na leqa tubukoso. Ia, na ka ga e gadrevi vakalevu na noda vakayaloqaqataki ira na tacida ena ivavakoso nira yalolailai se nira vakila na dredre ni bula e veisiga. (Vkai. 17:17) Nida soli keda vakarawarawa meda vukei ira na tacida, da qai tokona na vakatetei ni itukutuku vinaka, eda sa muria sara tiko ga na ivakaraitaki uasivi i Jisu. (Fpai. 2:5-8) Meda saga meda cakava tiko ga oqo.