Vukei Ira na Vuli iVolatabu Mera Taleitaka na iTovo Qoroi i Jiova
1 Na noda vukei ira na tataleitaki mera mai tisaipeli, e sega ni yala ga ena noda vakavulica na ivakavuvuli vakaivolatabu. E noda itavi tale ga meda vakavulici ira mera kilai Jiova vakavinaka kei na nona itovo qoroi. Nira vulica na yalomalumalumu na ka dina me baleta na Kalou ena tarai ira sara ga, ena uqeti ira mera veisautaka nodra bula mera “cakava rawa kina na i valavala e kilikili kei na Turaga [“Jiova,” NW], ka na vinakata sara ko koya.”—Kolo. 1:9, 10; 3:9, 10, VV.
2 iVola Vou ni Vuli iVolatabu: E dau vakabibitaki ena ivola Kaya na iVolatabu na veitovo qoroi i Jiova. Na imatai mada ga ni kena wase e saumi kina na veitaro oqo: E kauaitaki iko beka na Kalou?, O cei na yaca ni Kalou?, E rawa beka nida veivolekati kei na Kalou? E vakabibitaki tale ga ena wase oqo ni dau dodonu o Jiova (p. 10), e vinakata na ka e dodonu, e dau veinanumi (p. 11), dau loloma (p. 13), kaukaua (p. 16), yalololoma, daulomasoli, vosovoso vakadede, levu nona yalovinaka kei na dina (p. 19). Sa qai umana na tikina oqo na parakaravu 20 ena nona kaya: “Na levu ga ni nomu vulici Jiova na levu tale ga ni nomu taleitaki koya kei na nomu gadreva mo toro voleka vua.”
3 Sala cava eda rawa ni vakayagataka kina na ivola Kaya na iVolatabu meda vukei ira na vuli iVolatabu mera toro voleka vei Jiova? Nida veivosakitaka oti e dua na parakaravu e vakabibitaki kina e dua na itovo qoroi ni Kalou, rawa sara nida tarogi gonevuli, “Na cava o vulica e ke me baleta na itovo i Jiova?” se “O kila vakacava ni o Jiova e dau kauaitaki keda yadua?” Nida taroga na taro vaka oqo vei ira na gonevuli, eda sa vakavulici ira tiko mera dau vakasamataka vakatitobu na ka era vulica, da vukei ira tale ga mera taleitaka na itovo qoroi i Jiova.
4 Vakayagataka na Kato ni Railesuvi: Ni sa cava e dua na wase, kerei gonevuli me vakamacalataka ena nona vosa ga na veitikina yadua e koto ena kato “Na Ka e Kaya na iVolatabu.” Taroga se veisemati vakacava kei na veitikina oya na tikinivolatabu e toka e yasana. Nida saga meda kila na ka e tu loma i gonevuli e rawa nida taroga ena so na gauna, “Na cava nomu rai me baleta na ka e kaya na iVolatabu ena tikina oqo?” Nida cakava oqo eda sa vakabibitaka tiko vei ira na tikina bibi, eda na kila tale ga kina na ka e tu e lomadra. Oqo ena vukei ira sara ga na gonevuli mera toro voleka vei Jiova.