Vukei Ira e So Tale Mera iTokani ni Kalou
1 Nikua, era sa vakavulici tiko ena sala i Jiova na tamata mai na veivanua kece ga. (Aisea 2:2, 3) Ia, me rawa vei ira oqo mera “vuataka . . . na vuadra e na nodra dau vosota,” e dodonu mera vulica taumada mera lomani Jiova. (Luke 8:15, VV; Mari. 12:30) Kevaka e sega na loloma oqo, era na sega ni valuta rawa na idre cala, era na rere tale ga ni cakava na ka e dodonu. Dua na sala mera bucina kina na veiwekani vinaka kei Jiova, oya na noda vukei ira mera tara cake nodra taleitaka na veitovo qoroi i Jiova. Meda uqeti ira gona mera dau vakasamataka vakatitobu na ivakamacala e koto ena ivola Toro Voleka Vei Jiova.
2 Noda iVakaraitaki: Na noda ivakaraitaki e rawa sara ga ni tara na lomadra na vuli iVolatabu. Kevaka era raica nida vakamareqeta na noda veiwekani kei Jiova, ra qai raica na sala e cakayaco kina ena ivakarau ni noda bula, ena rawa ni uqeti ira mera bucina tale ga na veiwekani oqori. (Luke 6:40) Io, e uqeti ira vakalevu cake na noda ivakaraitaki, sega ni ka eda kaya.
3 Na nodra ivakaraitaki tale ga na itubutubu e sala bibi ni nodra vakavulici na gone mera lomani Jiova. (Vkru. 6:4-9) E dua na veiwatini erau vinakata me rau tuberi vinaka na luvedrau ena dina. Rau mani taro ivakasala vei ira na itubutubu era ivakaraitaki vinaka ena nodra susugi ira na luvedra mera yaco mera qaravi Jiova. Kaya o tagane: “E dua ga na uto ni vakasama era tukuna kece na itubutubu keirau vakatarogi ira, oya na bibi ni ivakaraitaki.” Io, na nodra ivakaraitaki sara ga na itubutubu era na vulica kina na gone na ka e namaki vei ira ena nodra yaco mera “i tokani ni Kalou.”—Jeme. 2:23, VV.
4 Masu e Vu Mai Lomada: E rawa tale ga nida vukei ira e so tale mera itokani i Jiova ena noda vakavulici ira mera masu mai vu ni lomadra. Rawa nida dusimaki ira ina Masu ni Turaga a vakaraitaka o Jisu, kei na so tale na masu era cabori vagumatua era volai tu ena iVolatabu. (Maciu 6:9, 10) Na noda qaqanimasu e rawa tale ga nira vulica kina na masu na vuli iVolatabu, vaka kina o ira na gone. Nira rogoca ni vu mai lomada na noda masu, era na vakila sara ga na noda veivolekati kei Jiova. Meda uqeti ira mera ‘masu tiko ga’ nira sotava na veika dredre. (Roma 12:12) Nira vakila na veivuke i Jiova ena gauna sara ga era gadreva kina, era na yaco mera nuitaki koya, ra qai lomani koya me vaka ga e dua na nodra itokani dina.—Same 34:8; Fpai. 4:6, 7.