Eda Vosa ena Doudou, ia Eda Uqeta na Veilomani
1 Levu na itaukeinivale era vakabauta tu na ivakavuvuli e veisaqasaqa kei na ka dina ena iVolatabu. Sa noda itavi gona meda vosa vei ira ena doudou, ia ena gauna vata oqori meda ‘lomani ira na tamata kece ga’ ena noda qarauna me kua ni veivakacudrui na ka eda tukuna. (Roma 12:18; Caka. 4:29) Rawa vakacava nida vosa ena doudou da qai uqeta na veilomani nida kacivaka na itukutuku vinaka ni Matanitu ni Kalou?
2 Yavu Eda Duavata Kina: O ira na dau veilomani era sega ni dau vakavu veiba. Oya na vuna meda kua kina ni vakacala na nodra vakabauta na itaukeinivale nira na cata na itukutuku eda kauta tiko yani. Ia kevaka e cala na ka era tukuna, e vinaka meda kauta cake mai e dua na yavu eda duavata kina. Noda vakabibitaka na tikina oqori ena rawa ni tara na lomadra na itaukeinivale, ena kauta laivi tale ga nodra nanuma cala.
3 Kevaka eda sega ni cakava e dua na ka meda vakadodonutaka kina na nodra rai cala na itaukeinivale, eda sa tokona tiko beka na nodra vakabauta? Sega. E sega ni noda itavi na lotu Vakarisito meda vakacala na ka kece era tukuna, ia e noda itavi ga meda kacivaka na itukutuku vinaka ni Matanitu ni Kalou. (Maciu 24:14) Me kua gona ni totolo noda cudruvaka na nodra rai cala na itaukeinivale, ia meda raica ni oqo e dua na sala eda na kila kina na ka e tu e lomadra.—Vkai. 16:23.
4 Veidokai: E tiko na gauna meda doudou kina ni vakacala na ivakavuvuli lasu. Nida vakavulici meda dau veilomani eda na sega ni cavuta na vosa ni veivakalialiai se vosa ni veibeci vei ira na vakabauta tu na ivakavuvuli lasu kei ira na vakavulica. Ke da cavuta na vosa ni veibeci era na sega ni via rogoci keda, ia kevaka eda yalomalumalumu da qai veidokai ena dolava na lomadra na gadreva tu na ivakavuvuli dina. Na noda dokai ira kei na nodra vakabauta, era na dokai keda kina, ena vakarawarawataka tale ga nodra ciqoma na itukutuku vinaka.
5 E ivakaraitaki vinaka na yapositolo o Paula nona doka na nodra vakabauta o ira e vunau vei ira, qai moica na nona ivakamacala me tara na lomadra. (Caka. 17:22-31) A yaco o Paula ‘me ka kece ga vei ira na tamata,’ mera rawata kina na bula. (1 Kor. 9:22) Eda rawa tale ga ni vakatotomuri koya ena noda vunau ena doudou ena yalo e uqeta na veilomani.