Vosa Vakadodonu, Ia me Tau ena Yalovinaka

ENA rawarawa noda veivosaki nida vosa vakayalovinaka. E okati e ke na noda kila na itukutukuni ni ka eda via tukuna kei na gauna me tukuni kina. Sega ni kena ibalebale oqo meda vunitaka na ka dina se vakawaicalataka. Me kua tale ga ni nanumi cala ni vosa vakayalovinaka e nodra cakacaka na tamata rerere.—Vkai. 29:25.

Eda na vosa ena yalovinaka ke tiko vei keda na vua ni yalo tabu ni Kalou. Kena ivakaraitaki, o koya e dauloloma ena sega ni via veivakacudrui, ena vinakata ga me veivukei. O koya e yalomalua ena dau qarauna vinaka na ka e cakava. O koya e dau veivakacegui ena vinakata me veiyaloni tiko ga kei ira na tani. Nira cudru mada ga na tani, o koya e dau vosota vakadede ena tauri koya vinaka tu ga.—Kala. 5:22, 23.

Ia, se mani vakacava noda maqosataka noda itukutuku, e so era na cata ga. Ena ca ni lomadra e levu na Jiu ena imatai ni senitiuri, era kaya kina ni o Jisu Karisito “na vatu era sa tarabe kina, kei na vatu era sa bale kina.” (1 Pita 2:7, 8) E kaya kina o Jisu ni nona itavi me kacivaka na itukutuku vinaka ni Matanitu ni Kalou e vaka “na buka waqa ki vuravura.” (Luke 12:49) Io, me yacova mai nikua, se vaka tiko ga na bukawaqa na katakata ni kena veiletitaki na itukutuku ni Matanitu i Jiova, na itukutuku e vakabibitaki tale ga kina na noda dokai koya na Dauveibuli cecere. Levu nikua era cata na noda itukutuku, era sega ni vakabauta ni Matanitu ni Kalou ena mai tinia na veiliutaki e cici tu nikua. Ia, eda vunau tiko ga nida talairawarawa vua na Kalou. Ia, ena gauna vata oqo, eda nanuma tiko na ivakasala ni iVolatabu e kaya: “Ni cakava na ka kece ga ko ni rawata mo ni veilomani tiko ga kina kei ira na tamata kece ga.”—Roma 12:18, VV.

Vosa Vakayalovinaka ni O Vakamacala. Levu na gauna e rawa nida vakamacalataka kina noda vakabauta. E macala nida dau cakava oqo ena cakacaka vakavunau, ia eda dau qara tale ga na sala e rawa nida vakamacala kina vei ira na wekada, ira eda cakacaka vata, kei ira mai koronivuli. E bibi meda vosa vakayalovinaka ena vanua kece oqo.

Ke da vunautaka yani na itukutuku ni Matanitu ni Kalou qai vaka e veivunauci noda ivosavosa, e rawa ni sega ni taleitaki noda ivakamacala—vakauasivi ke sega ni kerei na noda ivakasala, sega tale ga ni vinakati noda veivuke. Na cava meda cakava me kua kina ni tauri vakatani na ka eda tukuna? Dua na noda vulica na veivosaki.

Tovolea me tekivu na veivosaki ena nomu kauta cake mai e dua na ka ena taleitaka o koya o vosa vua. Ke wekamu o koya, drau cakacaka vata, se vuli vata, o sa na rawa ni kila tiko na ka e dau taleitaka. Ke o se sega mada ga ni sotavi koya vakadua, o rawa ni kauta cake mai e dua na ka o rogoca ena walesi, sarava ena retioyaloyalo, se wilika ena niusiveva. Baleta ni itukutuku vaka oqo era dau kauaitaka tu na lewenivanua. Ni o vunau voli e veivale, dau kauaitaka na ka o raica. O na rawa ni kila na ka e dau taleitaka o itaukeinivale ni o raica na iukuuku ni nona vale, iyaya ni vakatatalo era tu e tuba, kei na ivakatakilakila vakalotu e so. Ni qai lako mai katuba o itaukeinivale, vakarogoci koya sara vakavinaka. Na veika e tukuna vei iko ena vakadeitaka se donu se cala na ka o nanuma me baleti koya, o na kila tale ga kina na ka mo na vakasamataka ni bera ni o vakamacala vua.

Ni drau sa veivosakitaka rawa e dua na ulutaga, vakayagataka sara na iVolatabu kei na ivoladusidusi vakaivolatabu e vakamatatataka na ulutaga oqori. Ia, kua ni vosa tiko ga o iko. (Dauv. 3:7) Laiva me vosa tale ga mai o itaukeinivale ke vinakata. Rogoca nona nanuma, nona vakasama. Oqo ena vukei iko ena nomu saga mo vosa vakayalovinaka.

Ni bera ni o vosa, vakasamataka mada na ka o via tukuna, ‘ena taleitaki beka?’ Na Vosa Vakaibalebale 12:8 e vakacaucautaka na tamata e tau mai gusuna na “vosa vuku.” Na vosa vakaiperiu e vakadewataki me “vosa vuku” e tiko kina na vakasama ni yalomatua kei na lewa maqosa. O koya e vuku ena qarauna na vosa e cavuta, ena vakasama mada vakavinaka ni bera ni dolava na gusuna. Na wase tiko ga ni Vosa Vakaibalebale oqo ena tikina e 18 e tukuna meda qarauna na “vosa me vaka sa suaka e nai seleiwau.” E rawa nida vakamacalataka vakadodonu na ka dina mai na iVolatabu, ena gauna vata oya me taleitaki na noda ivakamacala.

E bibi meda qarauna na vosa eda cavuta, ke sega e rawa nida vakavuna ga noda cati. Ke ra na sega ni taleitaka na rogoci keda noda cavuta na “iVolatabu,” de na vinaka cake meda cavuta na “Vosa ni Kalou,” se “na ivola e taba ena 2,000 vakacaca na vosa.” Ke o cavuta e dua na tikinivolatabu, e rawa ni o tarogi itaukeinivale ena nona nanuma me baleta na tikinivolatabu oqori, qai yavutaka mai keri na nomudrau veivosaki.

O koya e vosa ena yalovinaka ena kauaitaka tale ga na gauna me tukuna kina e dua na ka. (Vkai. 25:11) O na sega beka ni duavata kei na ka kece e tukuna na itaukeinivale drau veivosaki, ia ena sega na betena mo coqa kece ga. Kua ni via vakamacalataka vakamatailalai ena dua ga na gauna na veika kece e vauci ena ulutaga drau veivosakitaka. E kaya o Jisu vei ira nona tisaipeli: “Sa vuqa na ka sa vo me’u tukuna vei kemudou, ia dou sa sega ni rawata edaidai.”—Joni 16:12.

Ke rawa, vakacaucautaki koya drau veivosaki. Ke veileti sara mada ga, e rawa ga ni o vakacaucautaki koya ena nona dei toka ga ena nona ile. A cakava oqo na yapositolo o Paula ni vosa vei ira na vuku ena vanua cecere nei Arisi, mai Aceni. Era veiba kei Paula na ilala oqo. Ena vakacala vakacava na nodra nanuma, me qai sega ni vakacudrui ira? A sa raica oti tiko na levu ni icabocabonisoro era dui bulia me ka ni nodra qaravi kalou. Ia, a sega ni vakalewa o Paula na nodra qaravi matakau, a vakaraitaka ga vakavinaka nona dokai ira ena kaukaua ni nodra vakabauta vakalotu. E kaya: “Au sa raica rawa ni ko ni sa vanua dau qaravi kalou.” Na nona vosa vakayalovinaka oqo e vakarawarawataka sara ga nodra rogoca nona ivakamacala me baleti koya na Kalou dina. Yaco sara mera vakabauta e so.—Caka. 17:18, 22, 34, VV.

Tauri iko vakamalua ke saqati nomu ivakamacala. Kua ni cudru. Vakayagataka na gauna oqori mo saga mo kila vinaka kina na ka e tu e loma i koya drau veivosaki. De vinaka mo na vakavinavinakataki koya ni talaucaka mai na lomana. Ia, vakacava ke tukuna mai vakaukaua: “Au sa lotu”? De rawa mo tarogi koya vakayalovinaka: “Oni a susu beka ga mai ena lotu qori?” Ni sauma nomu taro, o rawa ni qai tomana: “Cava oni nanuma, rawa beka ni dua na gauna me sa dua ga na lotu eda lewena na tamata kece?” Oqo e rawa ni itekitekivu sara ga ni dua na veivosaki vinaka.

Eda na dau vosa ena yalovinaka ke da tamata yalomalumalumu. Eda sega ni vakabekataka na dodonu ni sala i Jiova kei na dina ni nona Vosa. Eda dau nuidei nida vakamacalataka na veika oqo. Ia, e sega ni dodonu meda yalododonu tale vakasivia. (Dauv. 7:15, 16) Eda marau nida kila na ka dina, ni vakalougatataki keda tale ga o Jiova, ia eda kila ni nona vakadonui keda e sega ni vakatau ena noda yalododonu, e vakatau ga ena nona yalololoma, kei na noda vakabauti Karisito. (Efeso 2:8, 9) Dodonu meda kila ni bibi meda dau ‘dikevi keda tiko ga se da tu ena vakabauta se segai.’ (2 Kor. 13:5) Nida vakasalataki ira gona e so mera muria na ivakatagedegede ni Kalou, eda yalomalumalumu tale ga meda muria na ivakasala vakaivolatabu oqori. E sega ni noda itavi meda tauca na lewa. O Jiova e sa “lesia na Luvena me ia na lewa kecega,” o koya gona, o keda kece eda na qai saumitaro vua.—Joni 5:22; 2 Kor. 5:10.

Ena Loma ni Vuvale kei na Loma ni iVavakoso. Na noda vosa vakayalovinaka e sega ni dodonu me vakaraitaki wale ga ena cakacaka vakavunau. E rawa nida kaya ni vosa vakayalovinaka e tiki tale ga ni vua ni yalo tabu ni Kalou, o koya gona, e dodonu meda dau vosa ena yalovinaka vei ira na lewe ni noda vuvale. Eda na kauaitaka na nodra nanuma na tani ke tu vei keda na loloma. E sega ni qaravi Jiova o wati Ranadi Esiteri, ia e dokai koya dina o Esiteri, e laurai tale ga vua na yalomatua ni lai vakaraitaka vua e so na ka e vauci ira na tamata i Jiova. (Esit. wase 3-8) Ena so na gauna, na noda yalovinaka vei ira na wekada era sega ni iVakadinadina i Jiova e okati kina na noda sega ni vakamacalataka vei ira na ka dina, ia eda laiva me vosa ga na noda ivalavala.—1 Pita 3:1, 2.

E sega tale ga ni dodonu me sabalia noda itautau ni vosa se doudoutaki ira vakasivia e so na lewe ni ivavakoso baleta nida veikilai vinaka. Meda kua ni nanuma ni na sega ni dua na ka vei ira na ka eda cakava baleta nira sa matua. Meda kua tale ga ni vakaulubaletaka ena noda kaya: “Sa na sega ni rawa niu veisau ni sa matau vei au.” Ke da vakila ni dau vakatubu rarawa se cudru na noda vosa, meda saga sara meda veisautaki keda. Na noda ‘veilomani vakataki keda’ e dodonu me uqeti keda meda “caka vinaka . . . vei ira era veitokani e na vakabauta.”—1 Pita 4:8, 15; Kala. 6:10.

Nida Vosa Vei Ira ena iVavakoso. E dodonu mera dau vosa vakayalovinaka o ira era vosa mai na buturara. Era duidui na rogoci keda, duidui na vanua era cavutu mai kina, duidui tale ga na nodra ituvaki ni bula. E duidui na nodra ivakatagedegede ni bula vakayalo. E so era se qai curuma beka vakadua na Kingdom Hall. E so tale beka era sotava tu e so na leqa e sega ni kila o koya e vosa mai na buturara. Na cava me cakava o koya e vosa mai na buturara me kua kina ni vakavuna ga na nodra sega ni galeleti koya na vakarorogo?

Me nomu isausau mada ga mo ‘kakua ni vosavakacacataka e dua, ia mo yalomalua, mo yalolokomi vei ira na tamata kece ga,’ me vaka a vakarota o Paula vei Taito. (Taito 3:2) Kua ni vakatotomuri vuravura ena vakayagataki ni vosa ni veivakalolovirataki e sa takalevu tu nikua, e dau vakayagataki mera beci kina na kai tani, se o ira era vosataka e duatani na vosa. (Vkta. 7:9, 10) Vakamacalataka vakadodonu na ka e vinakata o Jiova, vakaraitaka tale ga na yaga ni kena muri na nona ivakasala; ia, kua ni vosabeci ira era sega ni muria taucoko tiko na sala i Jiova. Tovolea ga mo vakayaloqaqataki ira kece na vakarorogo mera raica na ka e vinakata na Kalou, ra qai cakava sara. Me ivakamalumu ni nomu ivakasala na nomu veivakacaucautaki kei na veivakayaloqaqataki. E dodonu meda dau veilomani vakaveitacini, o koya gona, vakaraitaka oqo ena nomu ivosavosa, kei na irogorogo ni domomu.—1 Ces. 4:1-12; 1 Pita 3:8.