“Veiyaloni kei Ira na Tamata Kece”

1. Na ivakasala vakaivolatabu cava meda muria ke ra cudru na taukeinivale?

¹ Eda dau guta na veiyaloni na tamata i Jiova, eda vunautaka tale tiko ga qori ena noda cakacaka vakaitalatala. (Aisea 52:7) Ia ena so na gauna, era na cudru eso nida sikovi ira yani ena nodra vale. Eda na rawa vakacava ni veiyaloni tiko ga kei ira va qori?​—Roma 12:18.

2. Na cava e bibi kina meda kauaitaka na kedra ituvaki na taukeinivale?

² Kauaitaka na iTuvaki: Eso era na cudru nira sega ni taleitaka na ka dina, ia eso tale era na rairai cudruvaka eso na ka e sega sara ga ni vauca na itukutuku eda vunautaka. De dua e sega ni veiganiti na gauna eda sikovi ira kina. Ena rairai vakavuna na nona cudru o taukeinivale eso na leqa e sotava tiko. Ke cudruvaka mada ga na itukutuku vinaka, meda nanuma tiko ni rairai vakavuna qori na nona vakacalai. (2 Kor. 4:4) Nida kauaitaka na kedra ituvaki na taukeinivale, eda na lewai keda vinaka da qai sega ni kauaitaka vakasivia na ka e caka vei keda.​—Vkai. 19:11.

3. Eda na vakaraitaka vakacava nida dokai taukeinivale?

³ Dauveidokai: E levu ena yalava sa vakawakana tu e lomadra na ka era vakabauta. (2 Kor. 10:⁠4) E vakatau sara ga vei ira mera vakarorogo se kua. Eda na sega ni via beca na ka e vakabauta o taukeinivale se vakaraitaka nida uasivi vua baleta nida kila e levu na ka. Ke da kerei meda biubiu, e dodonu meda doka na ka e tukuna o taukeinivale, meda biubiu sara.

4. Na cava e okati ena noda vosa vakayalovinaka?

⁴ Vosa Vakayalovinaka: Ke tau mada ga vei keda na vosa mosimosi, meda sauma ena yalomalua kei na yalovinaka. (Kolo. 4:6; 1 Pita 2:23) Meda kua ni vaqara veiba, meda vaqara ga e dua na ka eda duavata kina. De dua meda tarogi taukeinivale ga vakavinaka se cava e sega ni taleitaki keda kina. Ia eso na gauna e vinaka meda kua ni tomana na veivosaki ni na rairai vakacudrui koya tale vakalevu.​—Vkai. 9:7; 17:14.

5. E yaga vakacava na noda dau veiyaloni ena cakacaka vakaitalatala?

⁵ Ke da dau veiyaloni, ena rairai sega ni guilecava o taukeinivale na ka eda cakava qai vakarorogo ni lai vunau yani e dua tale. (Roma 12:20, 21) Ke sega mada ga ni cegu na nona veitusaqati, ena rairai yaco me tacida vakayalo ena dua na gauna. (Kala. 1:13, 14) Se mani taleitaka o taukeinivale na ka dina se sega, ena lagiti o Jiova qai vakacaucautaki noda ivakavuvuli ke da dau lewai keda vinaka da qai veiyaloni tale ga.​—2 Kor. 6:3.