Tataunaki Vei Keda e Dua na iYau
1 Nona vakamareqeta na yapositolo o Paula na itavi e solia vua na Kalou me vunau, e kaya ni vaka sara ga “nai yau.” (2 Kor. 4:7) E vosota kina na bula dredre kei na veivakacacani. E vunau vei ira kece ga e sotava. Lakova tale ga na vanua dredre e wai, vaka kina e vanua. Ia, e rawa vakacava nida vakatotomuri Paula, da qai vakaraitaka nida vakamareqeta noda cakacaka vakavunau? (Roma 11:13) Cava na vuna e vaka kina na iyau e sega ni vakatauvatani rawa na cakacaka oqo?
2 iYau e Uasivi Sara: Na iyau vakavuravura e rawa ni vakavuna na rarawa, qai lekaleka ga na kena yaga. Ia na cakacaka vakavunau e yaga tawamudu vei keda vaka kina vei ira na rogoci keda. (1 Tim. 4:16) E uqeti ira na tamata yalomalumalumu mera mai kilai Jiova, mera veisautaki ira, mera rawata kina na bula tawamudu. (Roma 10:13-15) Nida vakamareqeta na iyau uasivi oqo ena vakainaki kina na noda bula, eda na lomavakacegu ena itavi eda cakava, eda na nuidei tale ga ena veika e se bera mai.—1 Kor. 15:58.
3 Vakaraitaka ni Talei Vei Iko na iYau Oqo: Noda soli keda meda qarava e dua na itavi, e vakaraitaka na kena talei se bibi vei keda. E ka dokai dina noda solia noda gauna kei na noda kaukaua meda vakacaucautaki Jiova kina! (Efeso 5:16, 17) Me laurai ena ivakarau ni noda vakayagataki gauna ni bibi noda vakaliuca na ka vakayalo mai na iyau vakayago. Ni talei gona na itukutuku eda wasea, eda dau gumatua beka ni tukuna yani? Eda dau tu vakarau beka ena gauna kece ga meda tukuna na itukutuku vinaka.
4 Na iyau talei e sega ni dau vunitaki, e dau vakaraitaki me rawa ni saravi se laurai. Kevaka gona eda vakamareqeta na cakacaka vakavunau me vaka na iyau talei, ena laurai sara ga ni tiki ni noda bula na cakacaka oqo. (Maciu 5:14-16) Noda vakaraitaka gona na yalo ni vakavinavinaka, eda na vakatotomuri koya na yapositolo o Paula ena noda tu vakarau ena gauna kece ga meda vakaraitaka kina nida vakamareqeta na cakacaka vakavunau, da qai raica me vaka e dua na iyau talei.