Mareqeta Noda Cakacaka Vakavunau
1. Na cava na nodra rai e levu me baleta na noda cakacaka vakavunau?
1 E levu nikua era nanuma ni ka “sesewa” na noda cakacaka vakavunau. (1 Kor. 1:18-21) Ke da sega ni qaqarauni ena rawa ni vakayalolailaitaki keda qai vakavuna meda soro koso. (Vkai. 24:10; Aisea 5:20) Nida iVakadinadina i Jiova, na cava meda vakamareqeta kina na noda ilesilesi?—Aisea 43:10.
2. Na cava e tukuni kina ni “bibi” na cakacaka vakaitalatala?
2 “Cakacaka Bibi”: E tukuna na yapositolo o Paula ni “bibi” na cakacaka vakaitalatala. (Roma 15:15, 16) Ena sala cava? Nida vakaitavi kina eda sa “tamata cakacaka” ni “Kalou Savasava” o Jiova, eda vakalagilagia tale ga na yacana. (1 Kor. 3:9; 1 Pita 1:15) O Jiova e okata na noda cakacaka me “isoro ni veivakacaucautaki,” e bibi gona ena noda sokalou na cakacaka vakaitalatala.—Iper. 13:15.
3. Na cava e ka dokai kina na vunautaki ni itukutuku vinaka?
3 E ka dokai na vunautaki ni itukutuku vinaka, ia e vica ga era marautaka na itavi bibi qo. O ira na agilosi era na marau mera vakayacora qori, sega ni vakabekataki ni na vinaka cake sara na ka era cakava. (1 Pita 1:12) Ia o Jiova e digitaki keda na tamata ivalavala ca, eda vaka na “saqa qele” meda vakayacora na ilesilesi dokai qo!—2 Kor. 4:7.
4. Eda na vakaraitaka vakacava nida vakamareqeta na cakacaka vakaitalatala?
4 Me Vakaliuci: Nida vakamareqeta na cakacaka vakaitalatala eda na okata me “bibi sara” ena noda bula. (Fpai. 1:10) Eda na tuvanaka e veimacawa meda vakaitavi kina. Na daunivakatagi e mareqeta na nona lewena e dua na mataivakatagi kilai levu ena vakatovotovo vinaka ni bera ni vakaitavi qai saga sara me kenadau kina. O keda tale ga eda na vakavakarau vinaka ni bera nida gole ena cakacaka vakaitalatala me rawa nida “wasea vakadodonu na ivakavuvuli dina” da qai saga tiko ga meda ‘maqosa ena veivakavulici.’—2 Tim. 2:15; 4:2.
5. O cei e taleitaka na noda cakacaka?
5 Me kua ni vakayalolailaitaki keda na nodra sega ni vakarorogo eso. Nanuma tiko ni levu era se taleitaka tiko ga noda veisiko yani ena nodra itikotiko. Ia e sega ni bibi mera vakadonuya na tamata na noda cakacaka, e bibi sara na veivakadonui i Jiova, ni vakamareqeta o koya na noda sasaga.—Aisea 52:7.