Toro Voleka Vua na Kalou
O na Kunea “na Kalou mo Kilai Koya”
E VINAKATA o Jiova meda kunea e dua na iyau talei, e sa vakarawarawataka tale ga na noda vaqara na iyau qori. Eda na sega ni vutuniyau kina vakayago, ia eda na rawata kina na ka e sega ni rawa ni voli ena ilavo—na lomavakacegu kei na bula marau. Na iyau cava oya? E vakamacalataki qori ena Vosa Vakaibalebale 2:1-6 a vola na tui vuku o Solomoni.
E tukuna o Solomoni na iyau qori na ‘nomu kila na Kalou’—na ka dina me baleti koya kei na nona inaki e volai ena iVolatabu. (Tikina e 5) E vica na ka e okati ena iyau qori.
iVakavuvuli dina. E saumi ena iVolatabu na taro va qo: O cei na yaca ni Kalou? (Same 83:18) Na cava e yaco nida mate? (Same 146:3, 4) Na cava eda bula tu kina e vuravura? (Vakatekivu 1:26-28; Same 115:16) O nanuma ni yaga na nomu kila na isau ni taro bibi qori?
iVakasala vuku. E dusimaki keda na iVolatabu ena ivakarau ni bula vinaka duadua meda muria. Na cava mo cakava me dei kina na nomu vakawati? (Efeso 5:28, 29, 33) O rawa ni susugi ira vakacava na luvemu me rawa nira nuitaki? (Vakarua 6:5-7; Efeso 6:4) Na cava mo cakava mo marautaka kina na bula? (Maciu 5:3; Luke 11:28) O nanuma ni yaga na ivakasala nuitaki ena vica na vakasama oya?
Kila na itovo ni Kalou. Na iVolatabu e ivurevure nuitaki duadua ni itukutuku me baleta na Kalou. E Kalou vakacava? (Joni 1:18; 4:24) E kauaitaki keda? (1 Pita 5:6, 7) Na cava eso na itovo e kilai kina? (Lako Yani 34:6, 7; 1 Joni 4:8) O nanuma ni yaga na noda kila na itukutuku dina me baleta na Dauveibuli?
E talei na ‘noda kila na Kalou’ ni na vakavolekati keda vua. O na kila vakacava na Kalou? Raica mada na Vosa Vakaibalebale wase 2 tikina e 4, e vakatauvatana kina o Solomoni na kila qori ina “[i]yau vuni.” Vakasamataka mada qo: Ena sega ni vakatakilai koya na iyau vuni se da dabe toka ga era na basika. E gadrevi na sasaga meda qai kunea. Na noda kila tale ga na Kalou e va qori. Me vaka ga na kena vinakati meda vaqara na iyau vuni, e bibi tale ga meda vaqaqara ena iVolatabu meda kila na Kalou. Qori ena gadrevi kina na sasaga.
E tukuna o Solomoni na ka meda cakava meda ‘kila kina na Kalou.’ Na malanivosa “vakabauta na noqu vosa” kei na “vagolea sara na lomamu” e vakaraitaka ni bibi meda yalomalumalumu. (Tikina e 1, 2) Na malanivosa “tabalaka na domomu,” “qara [tiko ga]” kei na “vakasaqara [tiko ga]” e vakaraitaka ni gadrevi na sasaga, meda vaqaqara tale ga vagumatua. (Tikina e 3, 4) E bibi gona me vu mai lomada na noda vulica vagumatua na iVolatabu meda kila kina na Kalou.—Luke 8:15.
Ena vukei keda o Jiova ke da sasaga meda kilai koya. E tukuna na tikina e 6: “Sa solia na vuku ko Jiova.” Eda rawa ga ni kila vinaka na ka dina ena iVolatabu ena veivuke ni Kalou. (Joni 6:44; Cakacaka 16:14) Qo na ka mo nuidei kina: Ke o gumatua ni vaqaqara ena Vosa ni Kalou, o na kunea “na Kalou mo kilai koya.” E tawavakatauvatani rawa na marau o na vakila ni o kunea na iyau qori.—Vosa Vakaibalebale 2:10-21.a
Wili iVolatabu e Vakatututaki ena Okotova:
[iVakamacala e ra]
a Ke o via kila na iVolatabu, o rawa ni vulica wale kei ira na iVakadinadina i Jiova. Volavola ina Jehovah’s Witnesses, PO Box 23, Suva, se na itikotiko veiganiti ena tabana e 4.