‘Kua ni Rere Mo Tukuna na Vosa ni Kalou’
1 O dau tu vakasuka beka mo vakamacalataka nomu vakabauta e koronivuli se valenicakacaka? E ka ni bolebole beka vei iko mo vakamacala vei ira na wekamu, o ira na tiko tikivi iko, se o ira o sega ni kila? Na cava ena vukei keda kece meda vakayagataka vinaka na gauna meda ‘kua kina ni rere ni tukuna yani na Vosa ni Kalou’?—Fpai. 1:14.
2 Kua ni Tu Vakasuka: O na tu vakasuka beka mo totaki nomu itokani voleka se wekamu a beitaki vakailasu? Ena veisenitiuri sa sivi, dua na ka na kena vosa vakacacataki na yaca ni noda iTokani voleka duadua o Jiova. E noda itavi dokai gona meda tukuni koya na Kalou vei ira na tamata! (Aisea 43:10-12) Na noda lomani Jiova dina ena kauta laivi na mamadua se rere, eda na vosa kina ena doudou, eda na sega tale ga ni tu vakasuka ni tukuna na ka dina.—Caka. 4:26, 29, 31.
3 Meda nanuma nida kacivaka tiko na itukutuku vinaka. Ena yaga tawamudu na itukutuku oqo vei ira na rogoca, ra qai bulataka. Ena uqeti keda meda vunau ena doudou na noda raica na bibi ni cakacaka oqo mai na noda kauaitaki keda tiko ga se o ira na dauveivakasewasewani.
4 Nodra iVakaraitaki e So: Rawa tale ga ni vakaukauataki keda noda raica na nodra ivakaraitaki ni yalodina e so era dau tukuna ena doudou na Vosa ni Kalou. Kena ivakaraitaki, a tukuna ena doudou o Inoki na veicudruvi i Jiova vei ira na vakayacora tiko na ivakarau ca. (Juta 14, 15) A yalodina o Noa ni vunau vei ira era sega ni dau veikauaitaki. (Maciu 24:37-39) O ira na lotu Vakarisito ena imatai ni senitiuri era “sega so ni vuku, se tamata vuli” ia era vunau tiko ga dina nira vakacacani. (Caka. 4:13, 18-20) Na Vale ni Vakatawa tale ga kei na Yadra! e dau tabaki kina na nodra italanoa o ira na bula ena gauna oqo era qaravi Jiova ena yalodina, era valuta rawa nodra dau rerevaki ira na tamata, ra qai yalodina ni vunau.
5 Ena vakaukauataki keda gona noda dikeva nodra ivakaraitaki ni yalodina o ira na tamata ni Kalou ena gauna vakaivolatabu era sotava e levu na ka dredre. (1 Tui 19:2, 3; Mari. 14:66-71) Era ‘doudou ni vunau ena vuku ni nodra Kalou.’ E rawa tale ga nida vakatotomuri ira!—1 Ces. 2:2.