‘Dau Solia o Koya na Kaukaua Vei Ira Sa Oca’

¹ Eda dau vakila kece na oca ena so na gauna. E vu oqo ena so na ka eda cakava se so na ka dredre eda dau sotava ena “gauna caca matua, lewalewai dredre” oqo. (2 Tim. 3:​1, NW) Nida dauveiqaravi i Jiova, eda na rawata vakacava na kaukaua vakayalo meda kua ni oca ena noda cakava tiko na nona cakacaka? Oya ena noda vakararavi vei Jiova ni “sa levu na nona kaukauwa.” (Aisea 40:26) E kila vinaka o koya na ka eda vinakata, e dau nanumi keda tale ga.​​—⁠1 Pita 5:⁠7.

² iSolisoli i Jiova: Dua na sala e vakaukauataki keda kina o Jiova oya na yalona tabu, oqo ga na yalo a vakayagataka me bulia kina na lomalagi kei na vuravura. Na yalo oqo ena “vakaukauwataki” keda nida dau oca. (Aisea 40:31) Tarogi iko mada, ‘Gauna cava sara au a kerea kina na yalo tabu me vakaukauataki au meu vakayacora rawa kina na noqu itavi niu lotu Vakarisito?’​​—⁠Luke 11:​11-​13.

³ Na noda wilika e veisiga na iVolatabu da qai vakasamataka vakatitobu, kei na noda vulica na ivola vakaivolatabu era tu ena vakaukauataki keda vakayalo, me vaka na “kau sa tei e na bati ni uciwai, sa vuataka na vuana e na kena gauna, a drauna talega ena sega ni malai.”​​—⁠Same 1:​2, 3.

⁴ O Jiova e vakayagataki ira tale ga na tacida vakayalo, mera “dau veivakacegui.” (Kolo. 4:​10, 11, VV) E vakaukauataki keda na nodra vosa ni veivakauqeti, nodra ivakamacala, kei na nodra itavi ena soqoni. (Caka. 15:32) O ira sara tale ga na qase ni ivavakoso era dau vakacegui keda vakayalo, ra dau veivakauqeti ena nodra vosa.​​—⁠Aisea 32:​1, 2.

⁵ Ena Cakacaka Vakavunau: Ke da mani oca vakacava, meda vunau tiko ga! Na cakacaka oqo e vakabulabulataki keda, e sega ni vaka na cakacaka tale e so eda dau cakava. (Maciu 11:​28-​30) Noda kacivaka na itukutuku vinaka ena makaresese tiko ga kina vei keda na Matanitu ni Kalou, vaka kina na inuinui ni bula tawamudu.

⁶ Ena levu sara na ka me caka ni bera ni vakarusai na vuravura ca oqo. Sa dodonu gona meda yalodina tiko ga ni qaravi koya na Kalou ena noda vakararavi ina “kaukauwa sa solia.” (1 Pita 4:​11) Ena veivuke ga i Jiova eda na vakaotia kina na nona cakacaka baleta ni “dausolia na kaukauwa vei ira era sa malumalumu [“oca,” NW].”​​—⁠Aisea 40:29.