Rawa Beka Nida Curu ena ‘Katuba Levu ni Cakacaka’ Vakapainia?
1. Na ‘katuba ni cakacaka’ cava sa dola tu vei keda?
1 Dina ga ni levu na veitusaqati ena gauna sa ‘dola’ kina vua na yapositolo o Paula na “katuba levu ni cakacaka,” e gu ga na yalona me kacivaka na itukutuku vinaka. (1 Kor. 16:9, VV) Ia nikua, sa dola tale tu ga vei keda na katuba levu ni cakacaka oqo, era sa curu kina e rauta nira lewe 642,000 na dautukutuku e vuravura raraba mera painia tudei.
2. Na cava e vinaka kina meda dau vakalewa vinaka na keda ituvaki ena so na gauna?
2 Veisau na iTuvaki: Ke dau vakaiyalayala ga na noda kacivaka na itukutuku vinaka ena vuku ni keda ituvaki, meda nanuma tiko ni rawa ni veisau na ituvaki oqori. Oya na vuna e bibi kina meda vakalewa vinaka na keda ituvaki ena so na gauna, meda kua ni waraka ke veisau. (Dauv. 11:4) O iko beka e dua na itabagone sa vakarau cava nomu vuli ena sekeneri? O iko beka e dua na itubutubu sa vakarau vuli na luvemu? O iko beka e dua o sa vakarau vakacegu mai na nomu cakacaka saumi? Na veiveisau vaka oqo e rawa sara ga ni painia veivuke kina e dua. E dau tautauvimate e dua na tacida yalewa e sa yabaki 89, a nanuma me sa painia mada. Baleta na cava? Ni sa sivia e dua na yabaki na nona sa sega ni curu e valenibula, mani raica kina ni rawa ni painia.
3. Na veisau cava era cakava e so mera painia tudei kina?
3 Na inaki taumada ni nona lako i Korinica o Paula me lai sikovi ira na tacina vakayalo. Ia a veisautaka na ituvatuva oqori ena vuku ni itukutuku vinaka. E levu tale ga na painia tudei nikua era veisautaka na nodra ituvatuva mera painia kina. So era veisautaka nodra bula me rawarawa ga, ra qara kina e dua na cakacaka vagauna me vukea toka nodra cakacaka vakapainia kei na veika mera bula kina. Ia era sa marautaka tiko na cakacaka oqo. (1 Tim. 6:6-8) E so na veiwatini era veisautaka nodra ituvatuva me sa cakacaka ga o tagane, me painia o yalewa.
4. Na cava meda cakava ke da lomalomaruataka na noda rawata na aua e lavaki?
4 Me kua ni tiko vei keda na nanuma cala ni dredre na painia baleta na aua e lavaki. Ke sivia mada ga na rua na aua eda cakacaka kina e veisiga, sa da na rawata na aua e lavaki. Ia kevaka eda lomalomarua, vakacava meda painia veivuke mada ga ena dua se rua na vula, me noda isausau meda rawata e 70 na aua. Nida cakava oqo eda sa na vakila tiko kina na marautaki ni cakacaka vakapainia. (Same 34:8) Ke tiko na ka e vakadredretaka vei iko mo cakava na cakacaka oqo, vakacava mo vosa vei ira na painia? De dua, era sa sotava tale ga na ituvaki oqori. (Vkai. 15:22) Meda kua ni guilecava ni kerea na veivakalougatataki i Jiova ena noda saga meda vakarabailevutaka noda cakacaka.—1 Joni 5:14.
5. Na cava e cakacaka yaga kina na painia tudei?
5 Na Cakacaka Yaga: Na painia tudei e dua na cakacaka e vakilai kina vakalevu na veivakalougatataki i Jiova. Eda na marau nida soli keda vakalevu ena cakacaka oqo. (Caka. 20:35) Ena vagatari keda meda wasea vakadodonu na ivakavuvuli dina mai na Vosa ni Kalou. (2 Tim. 2:15) Eda na vakila kina na veitokoni i Jiova. (Caka. 11:21; Fpai. 4:11-13) Eda na toro voleka tale ga vua ke da bucina na itovo vakalou me vaka na vosota nida cakava na cakacaka oqo. (Jeme. 4:8) Vakacava, e rawa beka nida curu ena katuba levu ni cakacaka oqo meda painia tudei?