Kato ni Taro

◼ Na cava e rerevaki kina noda vakayagataka na Internet meda veitaratara kei na dua eda sega sara ga ni kila?

Sa levu sara tu na iwalewale e rawa nira veikilai ra qai veitaratara kina e levu ena Internet, vaka kina na kena vakau qai ciqomi tale ga kina na itukutuku. E so era dau biuta ena Internet na itukutuku me baleti ira, kei na kedra itaba. O ira na raica mai ena yasana kadua na itukutuku oqori, e rawa nira veitaratara sara kei ira. Era kila vinaka na itabagone na Web site vaka oqo. E so na itabagone ena ivavakoso era sa vakayagataka tiko mera veitaratara kina kei ira era kaya nira iVakadinadina i Jiova.

E levu vei ira eda veitaratara ena Internet era veisautaka na kedra itukutuku, ra lasutaka na nodra veika vakayalo, se veivakacalai na nodra inaki. (Same 26:⁠4) Rawa ni dua e sega ni iVakadinadina, e vakasivoi, se vukitani ena lasutaka ni iVakadinadina i Jiova. (Kala. 2:⁠4) E sa laurai tale ga ni levu vei ira na dauvakacacani ira na gone, era dau vakayagataka vakalevu na Internet mera veibacani kina.

Ia, kevaka eda sa vakadeitaka ni o ira eda veitaratara tiko ena Internet era toso vinaka vakayalo, meda qarauna ga ni rawa ni tini ca na veivosaki. Na vuna nida dau sega soti sara ni kauaitaka na ka eda kaya vua e dua eda se bera ni sota. Eda na nanuma tale ga ni sega ni dua ena raica na ka eda tukuna tiko, me vakataki ira na itubutubu se o ira na qase ni ivavakoso. Ia e rarawataki dina ni so na itabagone lotu Vakarisito era sa coriti ena ka oqo ena nodra vakayagataka e so na vosa vakasisila. (Efeso 5:​3, 4; Kolo. 3:⁠8) E so tale era biuta kina na kedra itaba veivagarogaroi, yaca vakasisila, se ra katona ena nodra kompiuta na iyaloyalo vakasisila ni lagasere.

Ni sa yaco tiko na veika oqo, e bibi kina vei ira na itubutubu mera qarauna matua na nodra vakayagataka na luvedra na kompiuta. (Vkai. 29:15) Ena ririkotaki dina ke o sureta e vale e dua dou sega sara ga ni kila, me rau tiko taurua kei luvemu. E vaka tale ga oqori na kena ririkotaki na nodra veitokani tiko na luveda kei ira na so era kaya nira iVakadinadina i Jiova ena Internet.​​—⁠Vkai. 22:⁠3.