Gumatua Tiko ga ena Cakacaka Vakavunau
1 Tekivu mai na 1992, era vakayagataka vakatabakidua na iVakadinadina i Jiova e sivia na dua na bilioni na aua ena Cakacaka vakavunau e vuravura raraba kei na nodra vukei e so mera tisaipeli. Eda marautaka dina nida okati tiko ena cakacaka vakasakiti qo!—Maciu 28:19, 20, VV.
2 Meda vakavinavinaka ga vei Jiova ena nona tokoni keda ena cakacaka vakavunau ena “gauna cacamatua” qo. (2 Tim. 3:1 NW) Na cava ena vinakati vei keda meda gumatua tiko ga kina?
3 Vu ni Gumatua: Nida lomani koya na Kalou mai vu ni lomada, ira na tiko tikivi keda, kei na noda dina ena yalayala vei Jiova ena uqeti keda meda vunautaka na itukutuku vinaka ni Matanitu ni Kalou. (Maciu 22:37-39; 1 Joni 5:3) Na loloma ena uqeti keda meda vakuai keda mai na so na ka, me rawa nida vakaitavi kina ena cakacaka vakavunau.—Luke 9:23.
4 Gumatua Tiko Ga: Ena saga vakaukaua na dauveitusaqati o Setani me vakamalumalumutaka noda gumatua ena cakacaka vakavunau. E dau vakayagataka e so na ka meda yalolailai kina, oya na nodra veitusaqati na tiko ena noda yalava, noda ogaoga ena veika vakavuravura, lomaocaocataki ni bula ena veisiga, kei na rivarivabitaki ni noda bula.
5 Koya gona, meda gumatua tiko ga ena cakacaka vakavunau. E bibi meda bucina na “loloma ka tu vei [keda] eliu.” Okati kina noda wilika vakawasoma kei na noda vakasamataka vakabibi na Vosa ni Kalou, da qai vakayagataka vakavinaka na kakana vakayalo e vakarautaka mai “na dauveiqaravi yalo dina ka vuku.”—Vkta. 2:4; Maciu 24:45, VV; Same 119:97.
6 E vakamatatataka na parofisai ena iVolatabu, ni sa voleka na siga i Jiova mera na vakarusai kina na tamata tawalotu. (2 Pita 2:3; 3:10) Ni matata tiko qori, meda gumatua tiko ga ena cakacaka vakavunau e vakayacori tiko e vuravura raraba, kei na nodra vukei e so mera tisaipeli!