O na Vakatotomuria na Yalogu i Jiova kei Jisu ena Gauna ni iVakananumi?
1. Na cava era cakava na dautukutuku ena gauna ni iVakananumi?
1 E guta o Jiova me vakayacora na nona inaki. Ni vakamacalataki na veivakalougatataki ni Matanitu ni Kalou, e kaya na Aisea 9:7: “A lomakatakata i Jiova ni lewe vuqa ena vakayacora na ka oqo.” E vakaraitaka tale ga na Luve ni Kalou ena nona cakacaka vakaitalatala e vuravura, ni guta na sokalou dina. (Joni 2:13-17; 4:34) E veiyabaki ena gauna ni iVakananumi, e milioni vakacaca na dautukutuku era saga mera vakatotomuria na yalogu i Jiova kei Jisu nira vakalevutaka nodra cakacaka vakavunau. O na tomani ira?
2. Me tekivu ena ika7 ni Maji, ena uqeti keda vakacava na noda yalogu?
2 Veisureti ina iVakananumi: Ena yabaki qo ena tekivu tiko na veisureti ina iVakananumi ena Vakarauwai, ika7 ni Maji. Lalawataka rawa qo mo vakalevutaka na nomu cakacaka vakavunau. Era na maqusa na lewe ni ivavakoso nira saga mera vakaotia na nodra yalava. Meda saga meda sureti ira noda vuli iVolatabu, noda veisikovi lesu, ira eda cakacaka vata, na wekada, kei ira eda vuli vata nida solia na ivola ni veisureti se vakayagataka na jw.org.
3. O na vakalevutaka vakacava nomu cakacaka vakaitalatala ena Maji kei na Epereli?
3 Painia Veivuke: Ena uqeti keda na noda yalogu meda vakalevutaka noda cakacaka vakaitalatala. Macala ga ni levu era na via painia veivuke ena vula o Maji kei na Epereli, eda rawa ni cakacakataka ga e 30 na aua. Ena nomudou sokalou vakavuvale tarava se nomu vuli vakataki iko, rawa ni o masulaka na sala mo cakava kina qo. (Vkai. 15:22) Rawa ni uqeti ira tale eso na nomu yalogu mera vakalevutaka nodra cakacaka vakavunau. Ke o cakava eso na veisau mo vakalevutaka nomu cakacaka, o sa vakatotomuria tiko na nona yalogu o Jisu.—Mari. 6:31-34.
4. Na veivakalougatataki cava eda na vakila nida vakatotomuria na yalogu i Jiova kei Jisu?
4 Eda na kalougata vakalevu nida vakatotomuria na yalogu i Jiova kei Jisu ena gauna ni iVakananumi qo. Levu ena noda yalava era na rogoca na itukutuku vinaka. Eda na marau da qai lomavakacegu ena vuku ni noda qaravi Jiova kei na noda solika. (Caka. 20:35) Vakabibi nida vakamarautaka na Kalou kei na Luvena, erau dau gugumatua.