Na Cakacaka Vakavunau Levu Duadua e Bau Yaco!
Sa sivia qo e 100 na yabaki, na nodra tuvanaka tiko na iVakadinadina i Jiova na kena wasei na itukutuku vinaka. (1 Kor. 9:23) Yaco kina me cakacaka vakavunau levu duadua e bau yaco, eda wasea na itukutuku vinaka qo ena vica na drau na vosa. Vakasavui ena sivia na 230 na vanua. (Maciu 24:14) Ia na cava e bibi kina na cakacaka qo? E lai robota vakacava na vuravura?
Na DVD Jehovah’s Witnesses—Organized to Share the Good News ena sauma na taro qori. E vakaraitaka vakamatailalai na veimataqali cakacaka e dau vakayacori e vuravura raraba. Ni o sarava na DVD tovolea mo sauma na taro qo: (1) E tuvanaki qai dusimaki vakacava noda cakacaka? (2) Era veitokoni vakacava ena kena wasei na itukutuku vinaka na Tabana ni Volavola, Tabana e qarava na Vakadewa e vuravura, Tabana ni Droini, kei na Tabana ni Katokatoni/Caka iYaloyalo? (3) Na cava na inaki ni kena dau tabaki vakalevu na ivola qai veikauyaki? (Joni 17:3) (4) E vica na ivola era tabaki ena dua na yabaki? (5) Cava sa rawati ena kena tabaki na ivola vakaivolatabu qo? (Iper. 4:12) (6) Na cava sa vakayacori mera vukei kina vakayalo na mataboko kei na didivara? (7) E vakailavotaki vakacava na noda cakacaka? (8) E yaga vakacava na nodra cakacaka na Tabana ni iTukutuku ni Valenibula, Tabana e Qarava na Cakacaka, kei na Tabana e Qarava na Soqo ni Tikina? (9) Ni o dua na iVakadinadina i Jiova, e uqeti iko vakacava na DVD qo mo vakavinavinakataka na (a) sasaga e cakava tiko na isoqosoqo i Jiova ena kena vunautaki na itukutuku vinaka? (b) sivia na 100 na vuvale e Peceli i vuravura raraba? (c) vuli vakarautaki vei ira na ivakatawa dauveilakoyaki kei ira na daukaulotu? (d) bibi ni kena tekivutaki ena veimataka na dikevi ni tikinivolatabu ni veisiga kei na vakavakarau ena soqoni ena veimacawa? (e) bibi ni noda tiko ena soqoni vakarisito? (f) ibalebale dina ni Parataisi ena vuravura? (Aisea 11:9) (g) noda vakaitavi tiko ena cakacaka ni tatamusuki qo?—Joni 4:35.
Era kauai vakacava o ira na wekamu, nomu itokani, vuli iVolatabu, kei ira na nomu veisikovi lesu, nira sarava oti na DVD? Vakacava mo vakaraitaka na DVD qo vei ira na so tale kei na nomu tukuna vei ira na itukutuku vinaka?—Maciu 28:19, 20.