“Vunautaka [“Vakavinaka Sara,” NW] na i Tukutuku Vinaka”
1. Na itukutuku vinaka cava meda wasea yani?
1 Ni dredre na kena rogoci na itukutuku vinaka e vuravura, e noda itavi dokai gona meda “vunautaka [“vakavinaka sara,” NW] na i Tukutuku Vinaka ni loloma soli wale ni Kalou.” (Caka. 20:24,VV) Okati e ke nodra kila ni na sosomitaka na “iotioti ni veisiga” qo na vuravura yalododonu i Jiova, ena gauna “sa takali tani [kina] na ka makawa.” (2 Tim. 3:1-5, NW; Vkta. 21:4) Sa na sega tale na tauvimate. (Aisea 33:24) O ira na wekada lomani era sa mate, era na vakabulai tale ra qai sotavi ira na nodra vuvale vakakina nodra itokani. (Joni 5:28, 29) Na vuravura sa na dua na parataisi totoka. (Aisea. 65:21-23) Qo e so na ivakaraitaki ni tukutuku vinaka meda wasea!
2. Cava e gauna vinaka kina ni cakacaka vakavunau na vula ni iVakananumi?
2 E gauna vinaka meda wasea kina na itukutuku vinaka qo ena vula o Maji, Epereli, kei na Me. Donuya na tolu na vula qo e dau siga balavu e levu na vanua e veiyasa i vuravura, rawa kina ni levu na gauna eda vakayagataka ena cakacaka vakavunau. Qo e gauna bibi tale ga ni na vakayacori kina na iVakananumi e veiyasai vuravura ni sa dromu oti na siga ena Vakarauwai 22 Maji. Meda vakayagataka na gauna qo meda tuvana kina e dua na ituvatuva me levu kina noda gauna ena cakacaka vakavunau.
3. Eda na vakalevutaka vakacava na noda vunau vakavuvale?
3 Painia Veivuke: E rawa beka ni o tuvana e dua na ituvatuva mo painia veivuke kina ena dua, rua se tolu na vula me vaka sa vakamacalataki oti mai? Vakacava mo dou veivosakitaka na tikina qo ena nomudou vuli vakavuvale tarava? Nida veitokoni vinaka, ena rawa nira painia veivuke e dua se rua na lewenivuvale. (Vkai. 15:22) Masulaka na ituvaki qo, ena qai vakalougatataka o Jiova na nomu sasaga. (Vkai. 16:3) Ke sega ni rawa ni painia veivuke e dua na lewenivuvale, e se rawa tiko ga ni dou tekia na isausau mo dou cakacaka vakavunau kei ira na painia.
4. Nida cakacaka saumi eda na tuvana vakacava noda ituvatuva meda painia veivuke kina?
4 Ke da cakacaka saumi, se rawa tiko ga nida painia veivuke ke dua noda ituvatuva vinaka. Rawa nida vunau ena gauna ni vakasigalevu. Rawa tale ga nida kerea e dua na yalava voleka ena noda itikotiko se noda vanua ni cakacaka meda vunau kina ena dua na aua, ni se bera nida tekivu ena mataka, se ni suka na cakacaka. Ena rawa ni levu na gauna eda vakayagataka ke da digia vinaka na ka meda vakaliuca me levu kina noda gauna ni cakacaka vakavunau vakakina ena muanimacawa. So era dau vakayagataka nodra gauna ni gade mera cakava kina qo.
5. Eda na uqeti ira vakacava na itabaqase kei ira na malumalumu mera painia veivuke?
5 Ke o sa dua na itabaqase se malumalumu vakayago e rawa ni o painia veivuke ena nomu solia e dua na gauna lailai e veisiga ena cakacaka vakavunau. Kerea vei Jiova me solia vei iko “na kaukauwa mana levu.” (2 Kor. 4:7) E dua na tacida yalewa a se rawa tiko ga ni painia veivuke ni sa yabaki 106! Na nodra veitokoni na tacina lotu Vakarisito kei na so tale ena loma ni ivavakoso a vunau rawa kina e veivale, veisikovi lesu, caka vuli iVolatabu kei na so tale na basoga ni cakacaka vakavunau. A tekivutaka e tini na vuli iVolatabu. “Niu vakasamataka na veika vinaka au cakava ena gauna au painia veivuke kina,” e kaya, “e tuburi au na loloma kei na noqu vakavinavinaka vei Jiova, na luvena kei na nona isoqosoqo. Au tukuna sara ga ‘Jiova, vinaka vakalevu!’ ”
6. Ena rawa vakacava vei ira na itabagone papitaiso oti mera painia veivuke, kevaka mada ga era se vuli tiko?
6 Ke o dua na itabagone papitaiso oti, ia o se vuli tiko, rawa tale ga ni o painia veivuke. Vakataki ira ga na cakacaka saumi, rawa ni o vakayagataka na muanimacawa mo cakacaka vakavunau kina. Ni suka na vuli, vakacava mo vakayagataka e dua na aua mo vunau kina. Rawa beka ni o vakayagataka na gauna ni sereki mo cakacaka vakavunau kina? Ke o vinakata mo painia veivuke, veivosakitaka kei rau na nomu itubutubu.
7. Na cava mera cakava na qase me vakabulabulataki kina na cakacaka vakavunau ena vula ni iVakananumi?
7 Meda Veiuqeti: O ira na qase era rawa nira vakabulabulataka na ivavakoso ena nodra ivakaraitaki. (1 Pita 5:2, 3) Rawa nira tuvanaka e so tale na yalava ni vunau vei ira na via cakacaka vakavunau ena mataka lailai, ni suka na vuli se ni suka na cakacaka. Na ivakatawa ni cakacaka e dodonu me lesia na itavi qo vua e dua na dautukutuku matua, me veirauti tale ga na yalava ni cakacaka kei na ivola ena veisoliyaki tiko ena vula tolu lavotaki qo.
8. Na cava eda vulica ena vakasavuirogorogo ni dua na ivavakoso?
8 Ena dua na ivavakoso, era dau veiuqeti na qase ni ivavakoso ena cakacaka vakapainia veivuke ni se vo tu e vica na vula. E dau kacivaki e veimacawa ena ivavakoso na iwiliwili ni dautukutuku era vakadonui mera painia veivuke. Qo e vakadeitaka vei ira na nanuma mera vakalevutaka nodra cakacaka, ni levu tale era na veitokoni ena cakacaka vakavunau. Dau tuvanaki e so tale na yalava ni cakacaka vakavunau ena matakalailai kei na yakavi. Yaco kina me 53 na dautukutuku era painia veivuke ena vula o Epereli, voleka ni veimama na dautukutuku!
9. Cava e gauna vinaka kina vei ira na dautukutuku vou mera cakacaka vakavunau ena vula ni iVakananumi?
9 Uqeta e So Tale Mera Vunau: Nira veitomani na dautukutuku vou kei ira na itabagone ena cakacaka vakavunau, rawa nira na cakacaka vata kei na dua na dautukutuku matua. Ena gauna vinaka me vakayacori kina qo ena vula ni iVakananumi, ni levu na dautukutuku era na vakalevutaka nodra gauna ena cakacaka vakavunau. E tiko beka e dua nomu vuli iVolatabu e sa veisautaka nona itovo me muria na ivakatagedegede i Jiova? Era itovo vinaka beka na luvemu ra qai toso vinaka tiko, dina nira se bera ni dautukutuku? Ke ra sa vinakata mera dautukutuku bera ni papitaiso ra qai rawata na kena ivakatagedegede, tukuna vua e dua na qase ni ivavakoso. Na ivakatawa daulewa ena lesia e rua na qase me rau sota vata kei iko kei na nomu vuli iVolatabu se luvemu drau vuli vata tiko.
10. Cava era rawa ni cakava na qase mera uqeti ira kina na mate tu vakayalo?
10 E vula vinaka tale ga vei ira na sa mate tu vakayalo mera cakacaka vata tale kei ira na ivavakoso. Na ivakatawa ni Vulivola ni iVavakoso kei ira na vo ni qase e dodonu mera sikovi ira na sa mate tu vakayalo, qai sureti ira mera cakacaka vakavunau vata. Ke ra mate tu vakayalo ena dua na gauna balavu, ena vinaka me rau raici koya mada e rua na qase me laurai kina se sa ganiti koya tiko ga me dua na dautukutuku.—km-FN 11/00 t. 3.
11. Eda na vakaraitaka vakacava na “loloma soli wale ni Kalou?”
11 Vakavakarau ena iVakananumi: Na isoro ni veivoli oya na kena vakatakilai “na i Tukutuku Vinaka ni loloma soli wale ni Kalou.” (Caka. 20:24, VV) Ena siga Vakarauwai 22 Maji, era na kumuni vata mai e milioni na lewe i vuravura, mera vakananuma kina na mate i Karisito, ni sa dromu oti na siga. Eda vinakata meda sureti ira na yalomalumalumu da qai uqeti ira mera tiko ena soqo bibi qo, na kena vakadinadinataki nona yalololoma o Jiova vei keda na kawatamata.
12. O cei meda sureta ena iVakananumi?
12 Meda vola na yacadra eda via sureta. Okati kina o ira na wekada, tiko veitikivi, eda cakacaka vata se i koronivuli, noda vuli iVolatabu, kei na so tale eda dau sikova ena so na gauna. Ke so eda sureta era vakataroga na veika me baleta na iVakananumi, raica na ikuri ni vakamacala ena ivola Kaya Na iVolatabu ena ulutaga na iVakayakavi ni Turaga, tabana e 206-8. Qo e gauna vinaka meda vakamacalataka kina na ivola e dau vakayagataki ena vuli iVolatabu, dolava tale ga na sala me tekivutaki kina na vuli iVolatabu.
13. E vakalougatataka vakacava o Jiova nodrau sasaga e rua na dautukutuku ena nodrau sureta e so ena iVakananumi?
13 Dua na tacida yalewa a vola e 48 na yaca ni vuvale me sureta. Ni solia na ivola ni veisureti, a toqa laivi sara na yacadra, qai vola na tikinisiga a sureti ira kina. Dua na ka na levu ni nona marau ni raica nodra lako mai e lewe 26 ena iVakananumi! E dua tale ga na tacida tagane e vakasitoa, a sureta e dua nona tamata cakacaka a talatala tu ena dua na gauna. A tiko ena soqo o koya na turaga qo mani kaya, “levu na ka au vulica mai na iVolatabu ena loma ni dua ga na aua mai na 30 na yabaki noqu tu ena lotu Katolika.” Ni oti na soqo ni iVakananumi, vakadonuya sara me vuli iVolatabu ena ivola Kaya Na iVolatabu.
14. Na veisureti cava ena vakayacori tiko e vuravura raraba ena 1 Maji?
14 Veisureti: Tekivu ena siga Vakarauwai 1 Maji ina 22 Maji, ena veisoliyaki tiko kina na ivola ni veisureti e vuravura raraba. Eda na vakaitavi kece ena cakacaka bibi qo. E vinaka meda solia sara ga na ivola ni veisureti vei itaukeinivale mai noda biuta tu ga ena matanikatuba. Ia, ke levu na yalava, mera qai vakatulewataka na qase na kena biu vakamatau na ivola ni veisureti ena vale e lala. Ena veisoliyaki tale ga ena muanimacawa Na Vale ni Vakatawa.
15. Eda na solia vakacava na ivola ni veisureti ena iVakananumi?
15 Ni yalani ga na gauna eda na veisoliyaka kina na ivola ni veisureti, e vinaka me lekaleka ga noda ivakamacala. Me bulabula qai veidokai. Rawa nida tukuna qo: “Keimami sureta tiko na nomuni vuvale, kei ira na nomuni itokani ena dua na soqo bibi ena vakayacori ena 22 Maji, nomuni ivola ni veisureti qo e tiko imuri na kena ivakamacala.” Ena via taro beka na itaukeinivale. Se ena vakadonuya na veisureti qai tukuna ni na tiko ena soqo. Ke tataleitaki saga mo sikovi koya lesu.
16. Na vakasavuirogorogo cava e vakaraitaka na bibi ni nodra sureti ena iVakananumi na tiko ena noda yalava?
16 Ena yabaki sa oti a kunea e dua na sotia na ivola ni veisureti ena nona matanikatuba. A nanuma me tiko kina ia ena kerea na veivakadonui nei koya na satini. Ni vakaraitaka na ivola ni veisureti vei koya na satini, a galu vakasauri na satini qai mani tukuna ni rau iVakadinadina nona itubutubu, e dau tomani rau tale ga ena soqoni. Sega wale ga ni vakadonuya nona lako na sotia qo, ia a tomani koya sara ga ena soqo ni iVakananumi!
17. Eda na vakavotuya vakacava nida sega ni vakatawayagataka na loloma ni Kalou?
17 Vakaraitaka Nomu Vakavinavinaka: Ni sa roro tiko mai na vula ni iVakananumi ni 2008, meda vakaraitaka mada ga na nona yalololoma o Jiova vei keda. A vola na yapositolo o Paula: “Keitou sa cikevi kemudou mo dou kakua ni vakatawayagataka na loloma ni Kalou.” (2 Kor. 6:1) Eda na vakavotuya vakacava nida sega ni vakatawayagataka na loloma ni Kalou? Vola o Paula: “Ia e na ka kecega keitou sa vakadinadina ni keitou sai talatala ni Kalou.” (2 Kor. 6:4) Koya gona, eda na vakavotuya noda vakavinavinakataka na loloma i Jiova ena noda itovo vinaka kei na noda gumatua ni vunautaka na itukutuku vinaka. Na vula ni iVakananumi qo e gauna vinaka meda vakalevutaka kina noda cakacaka vakavunau, nida gumatua ni kacivaka na itukutuku vinaka.
[Kato ena tabana e 3]
Cei So ena Rawa ni Painia Veivuke?
◼ Vuvale
◼ O ira na cakacaka saumi
◼ Na itabaqase kei ira na malumalumu
◼ Gonevuli
[Kato ena tabana e 4]
Ni O Veisoliyaka na iVola ni Veisureti:
◼ Me lekaleka nomu
◼ivakamacala, qai bulabula
◼ Kauaitaki ira na tataleitaki qai sikovi ira lesu
◼ Solia Na Vale ni Vakatawa ena muanimacawa