Tukuna na Veicakacaka Uasivi i Jiova
1. Na cava ena uqeti keda meda tukuna yani na veicakacaka uasivi i Jiova?
1 “I Jiova, ko ni sa cecere, sa nomuni ga na kaukauwa, kei na lagilagi, kei na gumatua, kei na ka vakaturaga: ni sa nomuni ga na ka kecega mai lomalagi, kei vuravura.” (1 Vei. 29:11) Ena uqeti keda vakacava na noda marautaka na veika e cakava vei keda o Jiova kei na noda lomani koya? Ena uqeti keda meda ‘tukuna yani na veicakacaka uasivi ni Kalou ni sa kacivi keda tani mai na butobuto ina rarama e veivakurabuitaki.’ (1 Pita 2:9, VV) Eda na via tukuni koya tiko ga yani na Kalou uasivi oqo! E gauna vinaka meda cakava kina oqori na vula o Maji, Epereli, kei na Me.
2. Na cakacaka lavotaki cava e sa vakarautaki tu me baleta na iVakananumi? O cei e rawa ni vakaitavi kina?
2 Cakacaka Lavotaki ni Veisureti ena iVakananumi: Ena vakabibitaki na veicakacaka uasivi i Jiova ena Moniti, 2 Epereli, nida na vakananuma kina na iVakayakavi ni Turaga. Ena tekivu veisoliyaki tiko e vuravura taucoko mai na 17 Maji ina 2 Epereli na ivola ni veisureti ni iVakananumi. Eda uqeti kece meda vakaitavi kina. Oqo e gauna vinaka vei ira na ka vou mera dautukutuku bera ni papitaiso, kevaka era sa rawata na kena ivakatagedegede. Ke tiko e dua nomu vuli iVolatabu se luvemu e sa laurai vua ni toso vakayalo, vakacava mo lai raici iratou na qase.
3. Na cava eda rawa ni kaya nida veisureti ena iVakananumi?
3 Na cakacaka lavotaki oqo e via vaka ga na kena eda cakava ena soqo ni tikina e kena usutu “Voleka Noda Vakabulai!” Ena vakau yani ena ivavakoso kece na ivola ni veisureti, mera na ya50 na dautukutuku, ra qai ya150 na painia. Me lekaleka ga noda ivakamacala, e rawa nida kaya: “Oqo na nomuni ivola ni veisureti ena dua na soqo bibi e dau vakayacori ga vakadua e veiyabaki. Ena marautaki na nomuni tiko. Na kena ivakamacala matailalai e sa volai tiko oqori.” Kevaka e taro o itaukeinivale, sauma vinaka nona vakatataro. Rawa ni o vakayagataka na ivakamacala ni iVakayakavi ni Turaga e tiko ena ikuri ni ivola Kaya na iVolatabu, ena tabana 206. Ena muanimacawa eda na solia vata na ivola ni veisureti kei na ivoladraudrau. Meda vola tiko na yacadra na tataleitaki, meda lesuvi ira.
4. Meda na veisoliyaka vakacava na ivola ni veisureti?
4 E vinaka meda solia sara ga na ivola ni veisureti vei ira na itaukeinivale. Meda vola na vale e lala, da qai lokuca na gauna meda lesu kina. Ia, na ivavakoso e vo tu kina e levu na ivola ni veisureti, mera qai biuta ena vale e lala ena iotioti ni macawa ni vula o Maji, me kua ni biu ena macawa ni bera oya. Meda kua ni guilecavi ira na tataleitaki eda dau lesuvi ira tiko, noda vuli iVolatabu, wekada, o ira eda tiko veivolekati, kei na so eda dau sota vakalevu.
5. Na cava meda sa tekivu vakarautaka kina oqo na noda ituvatuva ni painia veivuke?
5 Painia Veivuke: Rawa beka nida vakalevutaka noda tukuna yani na veicakacaka uasivi i Jiova ena noda bole meda painia veivuke ena vula o Maji, Epereli, kei na Me? Oqo ena gadrevi kina meda veisautaka e so na ituvatuva ni ka eda dau cakava e veisiga. (Efeso 5:15-17) Ke da vakalevutaka noda veiqaravi ena noda cakava na cakacaka e lesi keda kina o Jiova, eda na vakila na marau kei na nona veivakalougatataki. (Vkai. 10:22) Ni sa voleka tiko mai na vula ni iVakananumi, oqo sara ga na gauna meda sa tekivu vakarautaka kina noda ituvatuva.—Vkai. 21:5.
6. Na cava eda vulica vua na tacida yabaki 90 a painia veivuke ena yabaki sa oti?
6 A bau marautaka tu e dua na tacida yalewa e sa yabaki 90 nona painia veivuke ena yabaki sa oti. E kaya: “Au dau taleitaka na teitei, au vinakata sara ga meu tekivu teitei, ia au liaca rawa ni dodonu meu vakaliuca na ka e bibi cake. Niu gadreva meu vakaliuca na Matanitu ni Kalou, au nakita kina meu painia veivuke ena vula o Maji.” A raica beka na yaga ni nona sasaga? E kaya, “Au vakila noqu volekata na ivavakoso, e vakavolekati au tale ga vei Jiova.” Rawa beka nida dikeva tale ga na veika eda dau vakaliuca da qai veisautaka ke gadrevi?
7. E dredre beka meda painia veivuke?
7 Noda rawata na 50 na aua e gadrevi vei ira na painia veivuke e sega ni dredre me vaka eda dau nanuma tu. Meda vakalewa qai masulaka na ka eda dau cakava e veisiga, da vakarautaka qai vola sara e dua noda ituvatuva ni cakacaka. Eda dui kila vinaka ga na keda ituvaki. Kevaka gona eda dau tautauvimate se malumalumu, rawa nida cakacaka vakavunau ena vica ga na aua ena veisiga. Kevaka eda cakacaka se vuli, rawa nida painia veivuke ke da cakacaka vakavunau ena yakavi se na muanimacawa.
8. Rau painia veivuke vakacava e dua na veiwatini?
8 Levu era dau painia veivuke vakavuvale. Ena vica na yabaki sa oti, rau a lomalomarua e dua na veiwatini me rau painia veivuke ena vuku ni kedrau ituvaki, rau nanuma ni rau na sega ni rawata. Na cava rau qai cakava? “Keirau kerea vei Jiova ena masu me vukei keirau me keirau rawata na ka keirau dau vinakata dede tu mai me keirau cakava vata.” Rau mani rawata nodrau isausau ena nodrau lalawa vinaka. Rau kaya: “E sa cakacaka marautaki dina. Dua na ka na veivakalougatataki keirau sotava. Ni tovolea mada. Kevaka keirau sa cakava rawa, e rawa tale ga ni oni cakava.”
9. Na cava e rawa ni caka ena vuli vakavuvale e tarava mera vakarautaki ira kina na lewenivuvale ena tolu na vula lavotaki mai oqo?
9 O kemuni na vakavuvale, vakacava mo ni biuta vakatikitiki e dua na gauna ni oti na vuli vakavuvale mo ni veivosakitaka na sala mo ni vakalevutaka kina na nomuni cakacaka ena vula lavotaki sa voleka. Kevaka e sega ni rawa ni painia veivuke kece na lewenivuvale, ena vinaka sara ke dua e bole ra qai veivuke kina na vo ni vuvale. Ia ke sega, rawa ni dua na isausau oya mera vakalevutaka kece na lewenivuvale nodra cakacaka ena tolu na vula lavotaki mai oqo.
10. Na cava meda veivosakitaka kina noda via painia veivuke ena vula ni iVakananumi oqo?
10 Meda Veivukei: E dau veitakavi na lomakatakatataki ni dua na ka. Oqo e vinaka nida veivosakitaka noda via painia veivuke. E rawa sara ga ni uqeti ira e so mera painia tale ga. O ira tale ga na sa dau painia veivuke era na rawa ni vukea noda tuvana noda ituvatuva meda rawata vinaka kina na ka eda sa lalawataka. (Vkai. 15:22) Kevaka eda sa na painia veivuke, vakacava meda sureta tale e dua e via tautauvata na keda ituvaki meda cakava vata na cakacaka marautaki oqo?
11. Rawa vakacava nira veiuqeti na qase vei ira na via painia veivuke ena vica na vula sa tu oqo e liu?
11 E levu na qase era veiveisautaka nodra ituvatuva mera painia veivuke tale ga. (Iper. 13:7) Dau veivakauqeti sara ga oqo ena ivavakoso! Era dau uqeta tale ga na yalo ni painia ena nodra veitalanoa. Na nodra vosa ni veivakayaloqaqataki kei na so na ka era vakatura e rawa ni uqeti ira na via painia tiko mera painia veivuke. Me na tuvanaka na ivakatawa ni cakacaka e so tale na yalava ni sota me caka kina na cakacaka vakavunau me rawa nira vakaitavi kece na lewe ni ivavakoso ni suka na cakacaka se vuli. Me qai dau kacivaki na vanua ena caka tiko kina na sota. Me raica tale ga na ivakatawa ni cakacaka me veirauti na yalava kei na ivola se ivoladraudrau ni ivavakoso.
12. Na cava eda rawa ni cakava kevaka eda sega ni rawa ni painia veivuke?
12 Kevaka eda sega ni rawa ni painia veivuke ena vuku ni keda ituvaki, meda uqeti ira na sa painia tiko, meda masulaki ira tale ga. (Vkai. 25:11; Kolo. 4:12) Rawa sara ga nida veibuku meda cakacaka vata kei ira ena siga e sega ni caka kina na cakacaka vakavunau ni ivavakoso, se vica vata na aua mai na dua se rua ga na aua.
13. Na isausau cava meda saga me rawata na tabana e Viti? Ena tokona vakacava na ivavakoso kece na kena rawati na isausau oqori?
13 iSausau me 350 na Painia Veivuke ena Epereli: Na iwiliwili levu duadua ni painia veivuke e rawati ena vula o Maji 1997 ena tabana e qarava na valenivolavola e Viti, e 343. O koya gona na isausau eda rawa ni saga meda yacova ena Epereli, oya me 350 na painia veivuke. Eda rawa ni yacova na isausau oqo kevaka me kena ivakatautauvata me ya1 mai na veiya5 na dautukutuku ena ivavakoso kece mera painia veivuke. Na ivavakoso e levu na kena dautukutuku e rawa ni levu cake sara nodra painia veivuke. Levu na ivavakoso e rawarawa sara nodra sauva na isausau oqo. Vakasamataka mada na yalo ena curuma na ivavakoso kei na kena yaga ena yalava e tarai!
14. Na cava e vula vinaka kina ni painia na vula o Epereli?
14 Na cava e vula vinaka kina ni painia veivuke na vula o Epereli? E gauna vinaka baleta ni caka sara ga na iVakananumi ena itekivu ni vula, ni oti oya da sikovi ira sara na tataleitaki era gole mai ena soqo bibi oqo. Eda na veisoliyaka tiko ena vula oqori na ivoladraudrau, ia eda na saga tale ga meda solia vei ira na tataleitaki na ivola Kaya na iVolatabu, ena kena sagai me tauyavu kina na vuli. Noda painia veivuke ena Epereli e gauna vinaka meda tauyavutaka kina na vuli iVolatabu. Na vula tale ga o Epereli e lima na kena Sigatabu qai va na siga ni olodei, oqo ena rawa kina vei ira na cakacaka kei ira na vuli mera painia veivuke tale ga.
15. Na cava meda yadrayadravaki sara kina ena vula ni iVakananumi eda sa volekata yani oqo?
15 Ni caka oti na iVakananumi, sa kena ibalebale ni sa vakalailaitaki tale ena dua na yabaki na dede ni noda waraka na icavacava ni ituvaki kei vuravura. Sa vakalekalekataki sara na gauna meda tukuna kina na veika me baleti koya na Kalou cecere. (1 Kor. 7:29) Kena ibalebale, oqo e gauna vinaka meda vakacerecerei koya kina na Tamada vakalomalagi, meda kua gona ni vakawalena na gauna bibi oqo. Meda vakavakarau vinaka sara me rawa nida solia noda vinaka kece meda tukuna yani na veicakacaka uasivi i Jiova ena vula o Maji, Epereli, kei na Me!
[Kato ena tabana e 4]
Rawa beka ni 350 na Painia Veivuke ena Epereli?
◼ Dikeva na ka o dau vakaliuca
◼ Veivosakitaka vakavuvale nomudou isausau
◼ Veivosakitaka na ituvatuva o sa vakarautaka tu