Kato Ni Taro

◼ E dodonu beka me qaravi e dua na iVakadinadina i Jiova ena valenibula se na vale ni malumalumu e cicivaka na isoqosoqo lotu?

E so na isoqosoqo lotu era cicivaka na valenibula kei na vale ni malumalumu era qaravi kina na tauvimate tu vakabalavu se o ira na malumalumu. E levu na vanua va qo era sega ni vakaduri mera cuqena na veika me baleti Papiloni na Ka Levu. (Vkta. 18:​2, 4) De a vakaduri taumada na vanua va qo me saumi kina na veika vakailavo ni isoqosoqo lotu. Nikua, e so na valenibula e vakayacani wale ga ena lotu, e so tale era veiqaravi kina e so na italatala lotu.

Kevaka e gadreva e dua na iVakadinadina i Jiova me lai qaravi ena valenibula se vale ni malumalumu e cicivaka tiko e dua na isoqosoqo lotu, e nona sara ga na vakatulewa. De na donu ena nona lewaeloma me na cakava qo, ia e rawa ga ni tarovi koya na nona lewaeloma e dua tale. (1 Tim. 1:⁠5) E dau vakatau na nodra vakatulewa e so ena ituvaki e sotavi, o koya gona ena dodonu meda na vakasamataka tale ga na tikina qo.

Me kena ivakaraitaki, na valenibula se vale ni malumalumu e vakayacani ena lotu e voleka ga e vale. De vinaka cake na veiqaravi e vakayacori ena valenibula se vale ni malumalumu e cicivaka tiko e dua na isoqosoqo lotu e voleka ga e vale. De dua na valenibula e cicivaka na isoqosoqo lotu e vanua duadua ga e tiko kina na iyaya e gadrevi me vakayacori kina e dua na mataqali veiqaravi vakavuniwai, se qo duadua ga na valenibula e rawa ni veiqaravi kina na nomu vuniwai. Ena so na gauna era na dau doka tale ga na nomu vakabauta na valenibula e cicivaka na isoqosoqo lotu me baleta na vakayagataki dra, e rairai sega ni cakava oqori na valenibula e cicivaka na matanitu. Qo gona e so na tikina mo na vakasamataka ni se bera ni o vakatulewataka na vanua mo na qaravi kina.

Ke o sa vakatulewataka mo na lai qaravi ena valenibula se vale ni malumalumu e cicivaka na isoqosoqo lotu, me tiko vei iko na rai ni o sauma ga na veiqaravi o gadreva me caka vei iko. De o na raica me vaka ga na cicivaki ni ka vakabisinisi, kei na veika o sauma kina e sega ni lai tokona na lotu lasu. O sauma ga na veika e vakayagataki kei na veiqaravi e caka vei iko.

Ia, nida lotu vaKarisito, e dodonu meda qarauna sara meda kua ni lai vakaitavi ena dua na ka e vauca na sokalou lasu. O na sega tale ga ni lai vakayagataka na ikacivi me vaka na “Father” se “Sister” vei ira na cakacaka tiko kina se o ira na lai veisiko yani. (Maciu 23:⁠9) Mo raica me ka ga vakabisinisi na veiqaravi e caka vei iko me kua tale ni dua na ka.

Ke o sa mani curu, mo tukuna ni o dua na iVakadinadina i Jiova, o na gadreva tale ga mera lai sikovi iko yani na qase ni ivavakoso. Ena sala qo era na vakayaloqaqataki iko kina vakayalo.​​—⁠1 Ces. 5:​14.

E nodra itavi na lewenivuvale era vakabauta, qase ni ivavakoso, kei ira na lewe ni ivavakoso mera vakarautaka na veika vakayalo vei ira na tacida qase era tiko ena vale ni malumalumu, vakabibi na kena e cicivaka na isoqosoqo lotu. Na gumatuataki ni tikina qo ena vakayaloqaqataki ira na sa qase qai taqomaki ira mera kua ni lai okati cala ena soqo vakalotu, se so na soqo e vakayacori ena vanua ni veiqaravi va qo.

Nida nanuma matua e so na tikina qo, o keda yadua meda na dikeva na ituvaki kece e vauci da qai vakatulewataka na valenibula se na vale ni malumalumu meda na qaravi kina.​​—⁠Kala. 6:⁠5.