Era Tu Tani, Ia Era Sega ni Guilecavi

E UQETI ira na tacina lotu Vakarisito na yapositolo o Paula: “Me da caka vinaka vei ira na tamata kecega, ka vakalevu vei ira era veitokani e na vakabauta.” (Kala. 6:​10) Nikua eda se muria tiko ga na veidusimaki uqeti vakalou qo, meda qara na sala meda caka vinaka kina vei ira na tacida vakayalo. E so vei ira na lewe ni ivavakoso vakarisito era dau gadreva noda veivuke vakayalololoma, me vakataki ira na tacida vakayalo itabaqase era sa vakaitikotiko ena vale ni malumalumu.

Ena so na vanua e kena ivakarau mera dau qaravi ga e vale na itubutubu itabaqase. Ia, ena so tale na vanua era dau lai vakaitikotiko ena nodra vale na malumalumu ni ganiti ira sara ga na veiqaravi e vakarautaki kina. Vakacava o ira na itabaqase lotu Vakarisito era vakaitikotiko ena vale ni malumalumu? Na veika dredre cava era dau sotava? Cava mera cakava ke ra sega ni veitokoni na wekadra? Rawa ni veitokoni vakacava na ivavakoso lotu Vakarisito? Ena yaga vakacava vei keda noda dau sikovi ira?

E So na Ka ni Bolebole ena Vale ni Malumalumu

Nira sa lai tiko ena vale ni malumalumu o ira na lotu Vakarisito itabaqase, de dua ena qarava na yavala e tiko kina na vale ya e dua tale na ivavakoso, ra qai sega ni veikilai na itabaqase qori kei ira na mataveitacini e kea. Era na rairai sega ni vakasamataka na mataveitacini ena ivavakoso ya mera dau sikovi ira yani. Era na rairai tiko tale ga ena vale ni malumalumu ya o ira e duidui nodra vakabauta. O koya gona, ena rairai ka ni bolebole toka qo vei ira tacida itabaqase.

Me kena ivakaraitaki, ena so na vanua, e dau tuvanaki me caka na lotu ena vale ni malumalumu. E kaya e dua na nasi e dau qaravi ira na itabaqase: “Era dau vaqiqici ena idabedabe e so na iVakadinadina i Jiova itabaqase e medre vakalevu na gusudra, mera lai rogo vunau ia ra sega mada ni bau tarogi ke ra via lai vakarorogo.” Era dau veisautaka tale ga na ituvatuva ni veiqaravi o ira na cakacaka ena vale ni malumalumu ena gauna e solevutaki kina na siganisucu, Kirisimasi, se na Easter. E dau soli tale ga vei ira e so na iVakadinadina ena vale ni malumalumu na kakana e sega ni vakadonuya nodra lewaeloma mera kania. (Caka. 15:29) Ke da sikovi ira vakawasoma gona na tacida itabaqase va qori, eda na rawa ni vakacegui ira sara ga ena so na ituvaki dredre va oya.

Veitokoni na iVavakoso

Era sega ni lecava na lotu Vakarisito taumada na nodra itavi vei ira na itabaqase, ke sa sega ni dua na wekadra me qaravi ira. (1 Tim. 5:9) Era kauai tale ga na ivakatawa ena gauna qo, ra qai raica mera kua ni guilecavi na itabaqase ena nodra yalava era vakaitikotiko ena vale ni malumalumu.a E kaya o Robert, e dua na qase ni ivavakoso: “Ena veiuqeti qai veivakacegui ke ra lako sara ga na qase ni ivavakoso mera lai raica na ituvaki ni vanua era vakaitikotiko kina na itabaqase, mera masu vata tale ga kei ira. Levu sara na ka era rawa ni veitokoni kina na ivavakoso ena nodra qaravi na itabaqase qori.” Ke da dau tuvanaka na gauna meda sikovi ira kina na itabaqase, eda vakaraitaka nida kila ni bibi vei Jiova nodra karoni o ira na gadreva tu na veivakacegui.​​—Jeme. 1:27.

Ke gadrevi, era tu vakarau na ivakatawa ni ivavakoso mera veivuke vei ira na itabaqase era vakaitikotiko ena vale ni malumalumu ena nodra yalava. E vakamacalataka o Robert e dua na ka ena yaga vakalevu vei ira: “Meda dau uqeti ira na tacida vakayalo itabaqase mera tiko ena soqoni, ke rawa nira lako mai.” Ia era na tuvanaka tale ga na ivakatawa e so tale na ka ena yaga vei ira na sega ni rawa ni lako ina Kingdom Hall. Sa yabaki 80 vakacaca o Jacqueline qai tauvi koya na sasala, sa mani dau vakarogoca tiko ga kina na soqoni ena talevoni. E kaya: “E vakacegui au dina noqu rogoca na ka e veivosakitaki tiko ena soqoni ena gauna sara ga e vakacagau tiko kina. Au sega sara ga ni bau via calata na gauna meu dau vakarorogo kina ena soqoni, ni sega ni dua na ka me na vakatauvatani rawa kei na noqu vakarorogo oqori!”

Ke sega ni rawa vua e dua na itabaqase lotu Vakarisito me rogoca ena talevoni na soqoni, rawa nira tuvanaka na ivakatawa me katoni na porokaramu ni soqoni. E rawa ni lai veivakauqeti tale ga o koya na tacida ena lai solia na katokatoni qori vua na itabaqase e tiko ena vale ni malumalumu. “Ra na vakila na tacida vakayalo itabaqase nira se lewe tiko ga ni vuvale vakayalo nida dau wasea vei ira e so na itukutuku me baleti ira na lewe ni ivavakoso,” e kaya e dua na ivakatawa.

Veivosaki Tiko Ga

Macala nira na lomabibi e levu na itabaqase ra qai veilecayaki nira toki ina vale ni malumalumu. Lai vakavuna mera sega ni via veimaliwai e so. Ia ke da sikovi ira na itabaqase ena gauna sara ga era se qai curu oti kina e kea da qai vakaraitaka nida na tokoni ira tiko ga, era na lomavakacegu qai marau.​​—Vkai. 17:22.

Era dau nanuma e so ni tawayaga nodra sikovi na itabaqase ke sa dau veilecayaki nodra vakasama, ra didivara, se so tale na leqa e vakavuna meda sa sega ni veivosaki kina vakavinaka. Dina ni dredre meda veitalanoa kei ira, na noda sikovi ira e vakaraitaka nida “veiuasiviti e na veivakarokorokotaki” vei ira eda vakabauta vata. (Roma 12:10) Ke sa guiguileca tiko e dua na itabaqase, eda rawa ni uqeti koya me vakananuma na veika a yaco ena nona bula​​—rawa ni tekivu sara ena gauna se gone kina​​—se me talanoataka nona mai vulica na ka dina ena iVolatabu. Na cava eda rawa ni cakava ke medre na gusudra ra qai sega ni cavuta vinaka na vosa? Vakarorogo ga vakavinaka, o rawa ni cavuta e rua se tolu na vosa e rairai via cavuta tiko, se mo tukuna vakalekaleka na ka e saga tiko me kaya, oti qai uqeti koya me tomana nona italanoa. Ke veilecayaki se dredre me vosa qai sega ni kilai rawarawa na ka e cavuta tiko, eda rawa ni vakilakila na ka e tukuna tiko ena noda vakarogoca matua na irogorogo ni domona.

Ke sa sega sara ga ni rawa na veivosaki, de vinaka me caka e so tale na ka. O Laurence, e dua na painia e dau sikova tiko e dua na tacida yalewa yabaki 80, na yacana o Madeleine. Sa sega ni vosa tu na tacida qo. Vakamacalataka o Laurence na ka e dau cakava o Madeleine ni via tukuna e dua na ka: “Au dau taura toka na liga i Madeleine ni keirau masu vata. Ena gauna keirau masu tiko kina, sa qai dau boboka vakamalua na ligaqu, katariva tale ga me vakaraitaka nona vakavinavinakataka na gauna va ya.” Ena vakacegui ira dina na tacida itabaqase noda dau taura na ligadra se noda mokoti ira.

Bibi Nomu Veisiko

Nomuni dau sikovi ira vakawasoma na itabaqase ena rawa ni vakavinakataka na nodra qaravi. E kaya o Danièle, sa rauta qo e 20 na yabaki nona dau sikovi ira tiko na itabaqase iVakadinadina: “Nira raica na dauveiqaravi ena vale ni malumalumu ni dau sikovi vakalevu e dua na itabaqase, era na qaravi koya sara vakavinaka.” O Robert, sa tukuni oti mai, e kaya: “Era na rawa ni vakarorogo na dauveiqaravi vua e dua e dau veisiko yani vakalevu. Kena irairai nira na sega ni kauai vakalevu ena ka e tukuna o koya e dau veisiko yani vakavudua.” Ra tiko tale ga e so na vuvale era dau vosa kudrukudru, ya na vuna era taleitaka cake kina na dauveiqaravi ena vale ni malumalumu na nodra vosa ni vakavinavinaka na vulagi. Ke da veimaliwai vinaka tale ga kei ira na dauveiqaravi, era na doka na nona ivalavala kei na nona vakabauta na itabaqase iVakadinadina era qarava tiko.

Eda rawa ni veimaliwai vinaka tale ga kei ira na dauveiqaravi nida dodoliga meda veivuke ena so na ka lalai. Ena so na vanua, era sega soti ni qaravi vinaka na itabaqase baleta nira le lailai ga era kenadau ena veiqaravi vei ira. Kaya o Rébecca, e dua na nasi: “Dau gauna osooso na gauna ni kana. Ena rairai gauna vinaka ni veisiko qori, nida na vukei ira kina noda itokani itabaqase mera kana.” Meda kua ni tu suka na tarogi ira na dauveiqaravi me baleta na sala eda rawa ni veivuke kina.

Nida dau veisiko wasoma ena vale ni malumalumu, eda na kila kina na ka era gadreva tu na tacida itabaqase, da qai vukei ira kina ena nodra veivakadonui na dauveiqaravi. Me kena ivakaraitaki, eda rawa ni vakaliliga ena nodra rumu e so na itaba ni wekadra voleka se na nodra droini na gone. Nida kauaitaka na veika baleti ira, eda rawa ni kauta mai e so nodra isulu ni moce se nodra iyaya ni sisili, na ilumu, pauta kei na so tale. Ke tiko na lomanibai ena vale ni malumalumu, eda rawa ni gade vata kei ira e tautuba mera bau ceguva na cagi bulabula. O Laurence, sa tukuni oti mai, e kaya: “Dau vakanamata o Madeleine ina noqu veisiko ena veimacawa. E dau laurai levu sara ga na marau e matana keu kauta tiko yani e so na gone!” Dau tarai ira sara ga vakalevu na itabaqase era vakaitikotiko ena vale ni malumalumu e so na ka va qo.​​—Vkai. 3:​27.

Kena Yaga

Noda sikovi ira wasoma na tacida itabaqase sa vakatovolei sara tiko ga kina na ‘dina ni noda loloma.’ (2 Kor. 8:8) Ena sala cava? Ena rairai mositi keda nona sa malumalumu tiko ga e dua na noda itokani itabaqase. E kaya o Laurence: “Taumada, dau mositi au dina niu raica na ituvaki ni bula nei Madeleine, ni sa malumalumu tiko ga. Gauna kece e oti kina na veisiko au dau sorova na tagi. Ia au sa vakadinadinataka na yaga ni noqu dau masu mai vu ni lomaqu ena gauna va qori, ni seavu kina na lomabibi, vakauqeti au tale ga meu dau veivakayaloqaqataki.” Sa vakayabaki nona dau veisiko tiko o Robert vua e dua na tacina tagane itabaqase e lotu Vakarisito. Na yacana o Larry, e tauvi Parkinson tiko. E kaya o Robert: “Sa qai torosobu tiko ga na bula i Larry. Sa sega niu kila rawa na ka e dau tukuna. Ia ni keirau masu, au vakila sara ga na dei ni nona vakabauta.”

Na gauna eda lai sikovi ira kina na tacida itabaqase, eda sega wale ga ni lai vukei ira, ia eda vakayaloqaqataki tale ga kina. Dina nira tiko vata kei ira e duidui sara nodra vakabauta, nodra yalodei mera kabiti Jiova ena vaqaqacotaka noda vakabauta qai uqeti keda meda yalodoudou. Nodra gumatua ni kania tiko ga na kakana vakayalo, dina nira sa sega tu ni rai vinaka ra qai didivara, e vakaraitaka ni “sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4) Eda vulica meda lomavakacegu ena ka sa tu rawa vei keda nida raica nodra marautaka na veika lalai mada ga, me vaka nodra matadredredre na gone se nida mai kanavata toka. Nodra lomana na veika vakayalo ena uqeti keda meda vakaliuca na veika e bibi.

Ena yaga ina ivavakoso taucoko na noda dau tokoni ira na itabaqase. Ena sala cava? Nira vakararavi vakalevu o ira na malumalumu vakayago ena nodra loloma na mataveitacini, era uqeti gona na lewe ni ivavakoso mera vakaraitaka vakalevu na itovo qori na yalololoma. Meda okata gona me itavi dokai na noda veiqaravi vei ira na itabaqase, se mani vakacava na kena dede. (1 Pita 4:​10, 11) Ke ra vakaliuliu na ivakatawa ena ivavakoso, era na raica na lewe ni ivavakoso ni sega ni dodonu me vakawaleni na veiqaravi vakarisito qo. (Isik. 34:​15, 16) Nida tu vakarau meda veitokoni da qai karoni ira vakayalololoma na tacida itabaqase lotu Vakarisito, eda sa vakadeitaka tiko vei ira nira sega ni guilecavi!

[iVakamacala e ra]

[Tikina bibi ena tabana e 28]

“Nira raica na dauveiqaravi ena vale ni malumalumu ni dau sikovi vakalevu e dua na itabaqase, era na qaravi koya sara vakavinaka”

[iYaloyalo ena tabana e 26]

Noda masu mai vu ni lomada ena uqeti koya na tacida itabaqase me lomavakacegu

[iYaloyalo ena tabana e 26]

Noda veikauaitaki vakayalololoma ena vakayaloqaqataki ira na tacida itabaqase