Porokaramu Vou ni Soqo ni Tabacakacaka

Eda na vorata vakacava nodra veitusaqati na dau saqata kaukaua na sokalou dina? Rawa vakacava nida vakamalumalumutaka na idre kaukaua i Setani e dau veivakamuai ena vuravura tawavakalou qo? Ena saumi na veitaro bibi qori ena porokaramu ni soqo ni tabacakacaka ni yabaki vakacakacaka ni 2009. Na usutu ni soqo “Mo Rawa ga na Ca e na Vinaka.” (Roma 12:21) Qo e so na ka ena veivosakitaki ena porokaramu.

Na ivakatawa ni tikina ena vosa ena ulutaga “Dei Mo Rawa na Ca ena Vinaka,” “Kua ni Nuidei Vakasivia!,” “Sa Voleka ni Oti na Ca Kece!,” kei na “Vakaukauataka Noda Vakabauta Meda Vakamalumalumutaki Vuravura.” Na ivakatawa ni tabacakacaka ena vosa ena ulutaga “Qo na Gauna Meda Yadra Tiko Kina!,” e yavutaki ena Roma 13:​11-​13, kei na “Kua ni Yalolailai ena Gauna ni Rarawa,” e yavutaki ena Vosa Vakaibalebale 24:10. Eda vakanamata tale ga ena nona vosa na ivakatawa ni tabacakacaka ena “Veika e Gadrevi ena Tabacakacaka.” Dua tale na itavi veiuqeti na “ ‘Vakaitavi ena Cakacaka Vakavunau’ ena Nomu Painia.” Na imatai ni rua na vosa veitaravi e kena iulutaga “Tudei ni Vorata na iLawaki ni Tevoro.” Ena uqeti keda meda kila na ilawaki ni Tevoro da qai drotani mai kina me vaka na iyaya vakalivaliva vovou era sa tu, ka ni veivakamarautaki kei na ka ni veivakalasai, vaka kina na vuli torocake. Na vosa veitaravi “Meda Kaukaua ni Tudei Rawa Kina ena Gauna Ca Qo” ena vakaraitaka vei keda na sala meda bulataka kina vakavinaka na ivakasala ena Efeso 6:​10-​18.

Na vunautaki ni itukutuku ni Matanitu ni Kalou e vakamalumalumutaka na vunica. (Vkta. 12:17) Oya na vuna e sega ni dau cegu kina o Setani nona tusaqati ira tiko na iVakadinadina i Jiova! (Aisea 43:​10, 12) Ia ena seva ga nona inaki na Tevoro baleta nida vakadeitaka meda “rawa tiko ga na ca ena vinaka.” Mo lalawataka sara ga qo mo kua ni calata na soqo ni tabacakacaka qo mo vakila kina na kena yaga.