iTuvatuva me Baleti Ira na iTalatala Lotu vaKarisito
1. Na ituvatuva vou cava a tekivutaki ena 1938? Na cava na kena inaki?
1 A tekivutaka e dua na ituvatuva vou na isoqosoqo i Jiova ena 1938. Qo ena nodra sureti e vica na ivavakoso ina zone assemblies, sa kilai tu nikua me soqo ni tabacakacaka. Na cava na kena inaki? E vakamacalataki qori ena Informant (sa vakatokai nikua me Noda Cakacaka Vakaitalatala) ni Janueri 1939: “Na soqo qo e dua na ituvatuva ni iSoqosoqo i Jiova me baleta na vakayacori ni cakacaka e vauca na nona Matanitu. Na veivakavulici e vakarautaki kina e yaga vei ira na tiko kina mera cakava vinaka na cakacaka e lesi vei ira.” Nida vakasamataka na tubu ni kedra iwiliwili na daukacivaka na Matanitu mai na 58,000 ena 1938 ina sivia na le 7,000,000 ena 2009, e vakaraitaka ni sa yaco na inaki a tuvanaki kina na soqo ni tabacakacaka me vukei ira na italatala mera “cakava vinaka na cakacaka e lesi vei ira”!
2. Na itukutuku cava ena vakamacalataki ena soqo ni tabacakacaka ena yabaki vou vakacakacaka?
2 Usutu ni Soqo ni Tabacakacaka ena Yabaki Vou: Eda vakanamata ena soqo ni tabacakacaka ena tekivu ena Seviteba kei na noda na vakayaloqaqataki kina. Na kena usutu “Dou Sega ni Vakavuravura” e yavutaki ena Joni 15:19. Na cava eso na ivunau ena yaga dina vei keda na italatala lotu vaKarisito? Eda na rogoca ena Vakarauwai na ivunau, “Ena Taqomaki Keda Vakacava na Cakacaka Vakaitalatala Vakatabakidua?” Eda na taleitaka tale ga na rogoca e tolu na ivunau veitaravi, “Meda Kua ni Vakadukadukalitaki vua . . . ” “Na Manumanu Kila,” “Na Saqamua Levu,” kei “Na Dauveivoli.” Ena Sigatabu eda na rogoca kina e dua na vosa veitaravi e kena ulutaga, “Mo Lomani Jiova, Kua ni Lomani Vuravura.” Eso tale na ivunau eda na rogoca, “Meda Tiko ga me Vaka Eda ‘Kaitani qai Tiko Vulagi’ ” kei na “Mo Yaloqaqa! O Rawa ni Vakamalumalumutaki Vuravura.”
3. E yaga vakacava vei keda na noda tiko ena soqo ni tabacakacaka?
3 A tiko ena dua na soqo ni tabacakacaka se qai caka oti ga e dua na tacida yalewa sa sega ni daulako vakalevu ena cakacaka vakaitalatala, e tukuna ni ka e rogoca e vakavuna me vakalewa tale na kena ituvaki qai saga me “lako ena cakacaka vakavunau, me kua ni dau vakaiulubale!” E macala ni na yaga vei keda kece na porokaramu ni soqo ni tabacakacaka ni yabaki vou vakacakacaka meda lomani Jiova, meda kua ni lomani vuravura. (1 Joni 2:15-17) Meda saga meda tiko kina, vakarorogo vinaka me yaga vei keda na ituvatuva totoka qo me baleti keda na italatala lotu vaKarisito!