O sa Vakayagataka Vinaka Tiko?
1 “Au sega tale ni qai via wawa meu lai solia ena cakacaka vakavunau!” Qori na ka a vola e dua na tacida yalewa ni oti ga na nona wilika na ilavelave ni Watchtower ni 1 Janueri, 2008. O sa bau dikeva e so na ulutaga e sa tabaki tiko mai, qai vakasamataka na iwalewale mo lai solia kina ena cakacaka vakavunau?
2 Na “Cava o Vulica Vei Jisu”: O sa na rairai raica beka ni rawarawa na tekivutaki ni vuli iVolatabu ena ulutaga qo. Ke se bera ni o cakava vaka kina, tovolea mo wilika vua na itaukeinivale na ulutaga, qai vakamacalataka na ka e tukuna o Jisu me vaka e vakamacalataki ena imatai ni parakaravu ni ulutaga. Ke tataleitaki, tomana nomudrau veitalanoa ena ulutaga lalai e tarogi toka kina e so na taro vakavure vakasama. Sureta na itaukeinivale me vakamacala mai kina. Vakamacala vakalekaleka ena iyaloyalo era tu kina, toso sara ena parakaravu e tarava. Rawa ni drau kovuta na imatai ni veimama ni ulutaga ena imatai ni nomudrau veitalanoa qai drau tomana tale ena nomu veisikovi e tarava. Mo vakavakarau ena nomu na tomana na vuli ena ivola Kaya na iVolatabu.
3 “Yavu ni Vuvale Mamarau”: E dau tabaki ena veiyatolu na vula na ulutaga qo me vukei ira na tagane vakawati, yalewa vakawati, kei ira na itubutubu mera bulataka na ivakavuvuli vakaivolatabu ni dau yaco na leqa ena lomanivuvale, e vakavuna na tiko yavavala. Rawa tale ga ni o vakayagataka na ulutaga qo mo vukei ira na sega ni tiko ena dina mera raica na ivakasala vuku era tu ena iVolatabu.—2 Tim. 3:16, 17.
4 Baleti ira na iTabagone: Na ulutaga “Vei Ira na iTabagone” e vakarautaki vei ira na wilika mera vakasamataka kina e so na italanoa ena iVolatabu ra qai vakekeli kina. Rawa ni vakayagataki na ulutaga qo vei ira na itabagone ena cakacaka vakavunau mera kila kina na yaga ni kena vulici na iVolatabu. (Same 119:9, 105) Ni o veitalanoa kei ira na itubutubu, rawa ni o vakayagataka na ulutaga “Vakavulica na Luvemu” era tabaki ena so tale na vula. Rawa ni levu na ka era vulica na noda lalai me baleti ira era talanoataki tu ena iVolatabu. Sa bau tovolea mo wilika na ulutaga qo kei ira na luvemu?
5 So Tale na Ulutaga: Na ulutaga “Taro na Dauwiliwili” e tabaki ena veivula e dau tarogi kina na taro e rawa ni taroga na itaukeinivale. Rawa ni o vakayagataka qo ena cakacaka vakavunau. Na ulutaga “iVola Mai . . . ” e tabaki me baleta na ka dredre era sotava ena cakacaka vakavunau na daukaulotu kei na so tale na tacida. Ena uqeti ira na tataleitaki na ulutaga qo mera kila ni vunautaki tiko na itukutuku vinaka ena veiyasa i vuravura me ivakatakilakila ni nona tiko tawarairai na Karisito.—Maciu 24:3, 14.
6 Na ulutaga “Toro Voleka Vua na Kalou,” e tabaki e veivula e yavutaki ena tikinivolatabu ni wili iVolatabu ena Koronivuli ni Vuli Vunau, ena rairai uqeti ira na yalomalumalumu mera kila tale e levu na ka me baleti Jiova. Na ulutaga “Vakadamurimuria Nodra Vakabauta,” e tabaki vakava ena dua na yabaki me raitayaloyalotaki kina na veika e yaco ena gauna vakaivolatabu, me kilai kina o ira na volaitukutukutaki tu kina me baleta na ka era vakatulewataka, na ka dredre era sotava, nodra vakabauta—me vaka sara ga eda raici ira dina tiko nida wilika na kedra italanoa.
7 E ka marautaki dina nida taura na ilavelave vou ni Vale ni Vakatawa e tabaki mai meda vakayagataka ena cakacaka vakavunau! O koya gona, meda saga mada ga meda kila vinaka na veika e tabaki tu kina da qai vakayagataka vinaka sara ena cakacaka vakavunau.