Veisau Noda Vale ni Vakatawa!
1 E sa vakarogoi oti yani ena ivavakoso ena itekivu ni yabaki oqo e dua na veisau marautaki: Me tekivu ena Janueri 2008, e se rua tiko ga na itabataba ni Vale ni Vakatawa, ia e dua ga e sa tabaki vei ira na lewenivanua raraba, e dua tale vei keda ga na lewe ni ivavakoso! O na rairai taroga: ‘Na cava na kedrau duidui na ivoladraudrau oqo? Na cava na yaga ni veisau? Ena so tale beka na veika vou era na tabaki kina?’
2 Na Duidui: Na imatai ni itabataba ni dua na vula e baleti ira na lewenivanua raraba. E vakarautaki na ulutaga me baleti ira sara ga. Ia na itabataba ena ika15 ni vula e baleti keda ga na lewe ni ivavakoso, eda na sega ni veisoliyaka ena cakacaka vakavunau. Ena tabaki kina na ulutaga ni vuli vaka kina e so tale na ulutaga e baleti keda sara ga na lotu Vakarisito yalayala oti. Na ilavelave ni Vale ni Vakatawa e taba me baleti ira na lewenivanua raraba e yaga tale ga vei keda, vakauasivi vei ira na lewenivanua era vakabauta na iVolatabu. E sega ni veisau na Awake!, e vakarautaki tiko ga me baleti keda kece, okati kina o ira na dauvakatitiqa, kei ira na kaya nira sega ni lotu Vakarisito.
3 Yaga ni Veisau: Na ilavelave e tabaki me baleti keda ena sega ni gadrevi me vakamacalataki kina na vosa eda dau vakayagataka me vaka na “painia,” nida sa kila kece tu na kena ibalebale. Na ilavelave oqo ena vakarautaki kina e so na ulutaga me baleti keda na iVakadinadina i Jiova kei ira na vuli iVolatabu era sa toso tiko vakayalo. Ia vakacava ga na ilavelave e tabaki me baleti ira na lewenivanua raraba? Na ulutaga kei na iwalewale ni kena volai e baleti ira sara ga, oya na vuna era na taleitaka kina mera wilika tasevu na ivoladraudrau oqo, vaka tale ga kina o keda. Meda saga mada ga meda vakarautaka e dua na iwalewale vinaka me rawa nida na solia kina e dua na ilavelave ni Vale ni Vakatawa kei na Awake! ena cakacaka vakavunau e veivula.
4 So na Ka Vou: E so tale na veika vou e sa tuvanaki tiko me baleta na ilavelave e tabaki vei ira na lewenivanua. Dua oya na kena vakamacalataki vakarawarawa na yavu ni ivakavuvuli vakaivolatabu. Kena ikarua na yaga ni iVolatabu vei ira na vuvale. Na kena ikatolu na kena vakarautaki e so na ulutaga ni vuli iVolatabu me baleti ira na itabagone. Ena vakarautaki tale ga ena veitabataba kece e dua na ulutaga e vakabibitaka e dua na tikinivolatabu ena veivosakitaki kina na itovo qoroi i Jiova.
5 Sa noda masu ni na vakalougatataka o Jiova na veisau vou oqo. Me na uqeti ira mada ga na yalomalumalumu na itukutuku vinaka e tiko ena Vale ni Vakatawa kei na Awake!—Maciu 10:11.