Vei Kemuni na Dauwiliwili

TEKIVU ena itabataba ni Vale ni Vakatawa oqo, sa na veisau e so na ka. Ni bera ni vakamacalataki na ka ena veisau, me vakamacalataki mada na ka ena sega ni veisau.

Se tautauvata tiko ga na yaca ni ivola, Na Vale ni Vakatawa, Kacivaka na Matanitu i Jiova. Ena vakacerecerei Jiova tiko ga ni Kalou dina qai vakacegui kemuni na dauwiliwili ena itukutuku vinaka ni Matanitu ni Kalou. Ena tabana e 5 ina 9 ni ilavelave oqo, e veivosakitaki kina na Matanitu ni Kalou, ena veiliutaki e naica? Kena ikuri, Na Vale ni Vakatawa ena toroya cake nomuni vakabauti Jisu Karisito, e tokona na ivakavuvuli dina ena iVolatabu qai vakavotuya na parofisai vakaivolatabu ena veika e yaco tu e vuravura, me vaka sa vakayacora voli mai ena sivia na duanadrau na yabaki.

Ia na cava sa veisau? Me vakamacalataki mada e so na ulutaga veiuqeti ena tabaki vakavula tolu.a

Levu sara na ulutaga vakavure vakasama ena kune ena ilavelave e tabaki vakavula tolu. Na ulutaga “O Bau Kila?” e vakamacalataka na ibalebale ni so na itukutuku ena iVolatabu. ‘Toro Voleka Vua na Kalou,’ ena vakabibitaka na veika e rawa nida vulica me baleti Jiova mai na so na tikinivolatabu. “Taro na Dauwiliwili,” ena sauma na taro vakaivolatabu e tarogi vakalevu. Kena ivakaraitaki, levu era dau taroga, “E tiko beka e lomada na Matanitu ni Kalou?” Na isau ni taro oqori e kune ena tabana e 13.

Vica na ulutaga ena tabaki me yaga ina vuvale. Na ulutaga “Yavu ni Vuvale Mamarau,” ena vakamacalataki kina na leqa sara ga e sotavi ena vuvale kei na yaga ni ivakavuvuli vakaivolatabu ena kena wali. E baleti ira sara ga na itubutubu na ulutaga “Vakavulica na Luvemu,” mera wilika vata kei na luvedra. Na ulutaga “Ra iTabagone,” e baleta na vakatovotovo ni kena vakadeuci vakatitobu na iVolatabu, na vakekeli, vaka kina na kena bulataki.

So na gauna ena tabaki e vica tale na ulutaga ena ivola oqo. “Vakadamurimuria Nodra Vakabauta” ena uqeti keda meda vakadamurimuria nona ivakaraitaki e dua e volatukutukutaki ena iVolatabu. Kena ivakaraitaki, ena tabana e 18 ina 21 ni itabataba oqo, eda raica kina na itukutuku veiuqeti me baleti Ilaija na parofita da qai uqeti meda vakadamurimuria nona vakabauta. Dua tale na ulutaga, na nodra italanoa sara ga na daukaulotu kei na so tale mai na veiyasa i vuravura. “Cava O Vulica Vei Jisu” ena vakamacalataki kina na yavu ni ivakavuvuli vakaivolatabu.

Vei kemuni na dau taleitaka na iVolatabu, oni qai dau via kila se cava sara mada e kaya, e vakabauti ni oni na taleitaka tiko ga na wilika Na Vale ni Vakatawa. E nuitaki tale ga ni na yaga na ivola oqo ena nomuni kila na ka dina ena iVolatabu.

ITAUKEINIVOLA

[iVakamacala e ra]