‘Vunau Sara Vakavinaka’—Vakayagataka na Fomu ni iTukutuku ni Cakacaka e Veivale
1. Meda raica vakacava na noda cakacaka vakaitalatala?
1 “Au sa vunautaka vakavinaka sara na itukutuku vinaka baleti Karisito.” (Roma 15:19, NW) E laurai ena nona vosa na yapositolo o Paula ni gumatua ni vakayacora na nona ilesilesi me vunau, veivakavulici, qai tuberi ira e so tale mera tisaipeli.
2. Na cava e bibi kina meda vunau vakavinaka sara? Ena rawa vakacava nida cakacakataka vinaka noda yalava?
2 Eda vinakata tale ga meda vunau sara vakavinaka ena yalava e lesi vei keda. Eda bula tu qo ena gauna dredre duadua, e rivarivabitaki kina na bula ni tamata. Ke da sega gona ni veivakaroti eda na beitaki ena vakadave dra. (Isik. 3:18, 19) Eda vinakata meda kaya nida ‘galala mai na nodra dra na tamata kece ga’ me vakataka na yapositolo o Paula. Ena rawa vakacava nida cakacakataka vinaka noda yalava? Ena noda vakayagataka vinaka na fomu ni iTukutuku ni Cakacaka e Veivale.
3. Na cava e bibi kina me volai vakavinaka na itukutuku ni vale e lala?
3 Ni Lala na Vale: Me tarai vinaka noda yalava, meda vakalewena vinaka, vakadodonu tale ga na itukutuku ni vale e lala. Qo ena okati kina na yalava e tarai vakavudua se na kena e tarai wasoma. Meda sasaga tiko ga meda vosa ena vale yadua. Ke sega ni dua e tiko e vale, dodonu meda vola ena fomu ni itukutuku ni cakacaka e veivale da qai lesuva tiko na vale ya me yacova nida vunau vua e dua.
4. Na cava soti mo vola ni o vakalewena na fomu ni itukutuku ni cakacaka e veivale?
4 Me volai vakamatata qai maroroi vinaka na itukutuku ni cakacaka e veivale. Ni o biuta ga mai na vale o vosa kina, vola sara na yaca i taukeinivale kei na nona itikotiko. Kua ni vakilakila na naba ni vale se na yaca ni gaunisala—raica tale na ka o vola me donu. Vola na ivakamacala me baleti taukeinivale, na ulutaga drau veivosakitaka, na tikinivolatabu e wiliki, na ivola o solia kei na taro mo na sauma ni o sikovi koya tale. Vola tale ga na siga kei na tikinisiga o sotavi koya kina kei na siga mo na qai lesuvi koya tale. Maroroya vinaka sara na itukutuku qori me kua ni yali! Biuta ena vanua ena rawarawa nomu raica. Kua ni guilecavi taukeinivale, vakasamataka tiko na ka mo na tukuna ni o sikovi koya lesu.
5. Eda na vakayagataka vinaka vakacava na itukutuku ni cakacaka e veivale ena nodra lesuvi na sega ni tiko e vale?
5 E so era vakayagataka na itukutuku ni cakacaka e veivale mera raica kina na vale a lala ra qai lesuva ni oti ga nodra cakacaka e veivale ena siga ya. Se ra saga mera lesu ena dua tale na siga se na dua tale na gauna. E so era raica ni katoa nodra dau lako ena yakavi. O ira tale ga na tacida e dredre nodra veilakoyaki e dau vuavuaivinaka nodra qiri se volavola vei ira na itaukeinivale era sega ni dau tiko, dina nira sa lesuvi oti vakavica.
6. Na itukutuku yaga cava meda vola ena fomu ni itukutuku ni cakacaka e veivale?
6 Ni Kune na Tataleitaki: Ni o sotava e dua e vakarorogo, volatukutukutaka sara. Vola na yacana, itikotiko kei na so tale na itukutuku ena yaga ena veisikovi lesu. Ke o sega ni sotavi koya e tataleitaki ni oti e vica na siga, de vinaka mo veisautaka na siga kei na gauna. Mo kua ni soro koso ni lesuva e dua e tataleitaki.
7. Eda na vakayagataka vakacava na fomu ni itukutuku ni cakacaka e veivale nida vunau ena talevoni?
7 Ena basoga cava ga ni noda cakacaka vakaitalatala, e yaga meda vola vakadodonu na kena itukutuku. E okati tale ga kina na vunau ena talevoni. Vola vakavinaka na ulutaga a veivosakitaki, na ka e taleitaka o taukeinivale, kei na ulutaga ena veivosakitaki tarava. Mo vola na tikinisiga e dodonu mo qiri tale kina se sa tuvanaki tu mo na sikovi koya sara ga.
8. Eda na vakatotomuria vakacava na yapositolo o Paula meda vunau vakavinaka sara, na cava ena yaco kina?
8 E ivakaraitaki vinaka vei keda na yapositolo o Paula. A “vunau vakavinaka sara” ena yalava a lesi kina. Eda na vunau vakavinaka sara ena noda yalava nida vakayagataka vinaka na fomu ni itukutuku ni cakacaka e veivale. Sa dua na ka noda marau nira na levu tale na tisaipeli i Jisu Karisito! Ena rawa gona nida cavuta tale ga na vosa i Paula: “Au sa galala mai na nodra dra na tamata kece ga.”—Caka. 20:21, 26, NW.