Era na Rogoca Vakacava?

1. Na cava ena dredre kina ena so na gauna na cakacaka vakavunau, cava meda dei tiko ga kina?

¹ Ni sa roro mai na siga i Jiova, sa qai bibi ga me kilai na ka dina me baleta na Kalou kei na nona inaki vei keda na kawatamata. (Joni 17:3; 2 Pita 3:​9, 10) Ena dredre ena so na gauna baleta nira sega ni veikauaitaki e so, se ra vakalialia na noda cakacaka vakavunau. (2 Pita 3:​3, 4) Ia era na tiko ga e so ena noda yalava era na rogoca na itukutuku vinaka. Era na rogoca vakacava ke sega ni dua e vunau vei ira?​​—⁠Roma 10:​14, 15.

2. Na cava e uqeti keda kina na ivakaraitaki ni yapositolo o Paula?

² Nida Tusaqati: Me kua nida tu suka baleta nira tiko e so era via rogoca na itukutuku vinaka ni Matanitu ni Kalou. O Filipai e imatai ni koro e Urope me cakacaka vakavunau kina na yapositolo o Paula. Ni rau beitaki vakailasu kei Sailasa, rau laumoku ena kau, qai bala e valeniveivesu. (Caka. 16:​16-​24) E sega ni suka i muri o Paula ena ka mosimosi a sotava. Ni gole i Cesalonaika ena nona ilakolako tarava ni kaulotu, e ‘doudou ni vakaukauataki koya na Kalou.’ (1 Ces. 2:⁠2) Sega li ni uqeti keda na ivakaraitaki i Paula ‘meda kua ni soro koso’?​​—⁠Kala. 6:⁠9.

3. Na cava e rawa ni veisautaka na lomadra e so era sega ni taleitaki keda ena dua na gauna?

³ E levu era a sega ni dau taleitaka na itukutuku vinaka sa ra veisau ena gauna qo. E rawa ni vakavuna nodra veisau na dredre ni bula vakailavo, tauvimate, ni mate e dua na wekadra, se nodra rogoca e so na itukutuku ca e yaco tu e veiyasa i vuravura. (1 Kor. 7:​31) E so ra saqati keda ena dua na gauna na nodra itubutubu, ia era vakarorogo vei keda ena gauna qo nira sa tamatabula. Meda vunau tiko ga mera “masuta na yaca i Jiova” de ra qai bera.​​—⁠Roma 10:⁠13.

4. Na cava ena uqeti keda meda “sega ni cegu” na cakacaka vakavunau kei na veivakatisaipelitaki?

⁴ “Sega ni Cegu”: Me vakataki ratou ga na yapositolo ena imatai ni senitiuri, eda na “sega ni cegu” na vunau kei na veivakatisaipelitaki nida lomana na Kalou kei ira na wekada. (Caka. 5:​42, VV) E levu nikua era “vutugu ka qoqolou e na vuku ni ka vakasisila kecega” e yaco tu. (Isik. 9:⁠4) Ena veivakacegui, e solia tale ga vei ira na inuinui na itukutuku vinaka! Ke ra sega mada ga ni vakarorogo, e vakadeitaka vei keda na iVolatabu ni marautaka o Jiova na noda sasaga.​​—⁠Iper. 13:​15, 16.